Danskit kommuniat kalaallinut atugarliortunut immikkut ittumik illuliorniartoq
Københavnip kommuniani illu Assak-mik atilik pilersaarutigineqarpoq. Kalaallit atugarliortut illumi tassani oqalutseqarnissamik periarfissaqarlutillu initaarnissamut, ilinniagaqarnissamut, suliffissarsiornermut peqqissutsimullu tunngasunik siunnersorneqarsinnaassapput.
- Kommunip kalaallit atugarliortut ikiorneqarnissaminnut pisinnaatitaaffiat naammassinissaa qulakkeertussaavaa, isumaginninnermut borgmesteri Karina Vestergård Madsen oqarpoq.
Assi: David Trappaud / Københavns Kommune
Danmarkimi kalaallit pisinnaatitaaffiinik malinninnginnerit sakkortuumik isornartorsiorneqartuarput. Københavnip Kommunea kalaallit Københavnimukartut ikiorneqarnissaminnik pisariaqartitsisut pisinnaatitaaffillillu ikiorneruniarlugit maanna iliuuseqarpoq.
Kommuni naapertorlugu kalaallit Kalaallit Nunaanniit Københavnimut nuuttut amerlanersaat ajunngitsumik ingerlasarput, ukiulli tamaasa innuttaasut 75-it 100-llu akornanniittut ikiorneqarnissamik tapersersorneqarnissamillu pisariaqartitsisarput:
- Taakku tassaasinnaapput tarnikkut inuttullu ajornartorsiuteqartut, sakkortuumik nalaataqarsimasut katsorsarneqanngitsut imaluunniit atornerluisut. Taakku ingerlaannaq iliuuseqarfigisinnaasussaavagut, taamaaliornikkut atugarliornerulernissaraluat pinaveersaartissinnaallugu, isumaginninnermut borgmesteri Karina Vestergård Madsen (EL) oqarpoq.
Tamanna tunngavigalugu Enhedslistenimit illu "Assak"-mmik atiliut siunnersuutigineqarpoq. Taanna kalaallinut atugarliortunut Københavnimut tikinniartunut aqqutaassalluni.
- Illoqarfimmi sumi katersuuttarnersut takusinnaavagut, kalaallillu atugarliortut ilaat mittarfimmiit toqqaannartumik tassungartarput. Assak siullertut orninneqarsinnaanngornissaa kissaatigaara, Københavnip Kommuneani ikiorneqarnissamik tapersersorneqarnissamillu piareersimasunit siunnersuisorneqarsinnaaqqullugit, Karina Vestergård Madsen oqarpoq.
Assak pillugu siunnersuut ippassaq sisamanngornermi akuerineqarpoq. Aningaasallu ukiaru missingersuutit isumaqatigiinniutigineqarneranni nassaarineqassapput.
