Danskit ministerii mittarfiup ajornartorsiornera pillugu nassuiaateqassasut
Nuummi mittarfimmi ajornartorsiuneq Kalaallillu Nunaanni siunissami silaannakkut angallanneq eqqarsaatigalugu naalagaaffik qanoq isumaqarnersoq Folketingimi ilaasortap danskit ministerii marluk apeqquteqarfigai.
Sascha Faxe (nikorfasoq) Alternativetimi Kalaallit Nunaat pillugu oqaaseqartuuvoq.
Assi: Jens Dresling/Ritzau Scanpix
Nuummi mittarfimmi ajornartorsiorneq Folketingimi aamma maluginiarneqarpoq. Tassunga tunngassuteqartunik apeqqutinik marlunnik Alternativemi ilaasortaq Sascha Faxe danskit naalakkersuisuinut apeqquteqaqqammerpoq.
Nuummi isumannaallisaanerup qanittukkut ajalusoornera taakku qanoq isumaqarfigineraat apeqqutit ilagaat.
Nunanut allanut timmisartuussisinnaaneq Trafikstyrelsip sapaatip-akunnerani kingullermi piffissami sivikitsumi unitsippaa. Isumannaallisaavimmi angalasunik nakkutilliisut ilinniartinneqarnerat naammannginnera tunngavilersuutigineqarluni.
Naalagaaffiup Namminersorlutik Oqartussat peqatigalugit Kalaallit Nunaanni nunanit tamalaanit mittarfiit qanoriliornikkut aqqutissiuunneqarsinnaanersut apeqqutip aapparaa.
Apeqqutit aningaasaqarnermut ministerimut Nicolai Wammenimut (S) angallannermullu ministerimut Thomas Danielsenimut (V) apeqqutigineqarput. Ministerit ataatsimoorlutik immikkulluunniit namminneq iluarinerusartik atorlugu akissuteqarfigisinnaagaat, Sascha Faxe allappoq.
Danskit naalakkersuisuinut apeqqut pingaaruteqarpoq, tassami naalagaaffik Nuummi mittarfissuarmik Ilulissanilu mittarfissuassamik piginneqataavoq.
