KL

DK

Demokraatit aamma Liberal Alliance politikkikkut suleqatigiilersut

Liberal Alliance-p siulittaasua, Alex Vanopslagh, aamma Demokraatit siulittaasuat, Jens-Frederik Nielsen, ullumi politikkikkut suleqatigiinnissamut isumaqatigiissummik atsioqatigiipput. Partiit taakku marluk isumaqatigiipput Inatsisartuni folketingimilu sulinermi imminnut tapersersussallutik, tassuuna misilittakkanik ilisimasaannillu avitseqatigiittassallutik Kalaallit Nunaata Danmarkillu akornanni soqutigisat ataatsimoorussat pillugit.

Liberal Alliance-mi siulittaasoq, Alex Vanopslagh, aamma Demokratiit-mi siulittaasoq, Jens-Frederik Nielsen.
Jensine Berthelsen
JOURNALISTI
Saqqummersinneqarpoq

Innuttaasut akornanni inuit attaveqatigiittarfiisigut oqallinnerit qissimiinnarlugit, kalaallit danskillu innuttaasuisa akornanni avissaartuunneq assortuunnerlu annertooq takuneqarsinnaavoq. Oqaatsillu ilaanni sakkortoorujussuuullutillu akerleriinnermik annertuumik ersersitsisarput.

Pissutsit taamaalisimanerat Demokraatit Liberal alliancelu ilaatigut tamanna qaangerneqarsinnaaqqullugu sulissutiginninniarput. Isumaqatigiissuteqartummi  isumaqatigiissutertik nutaaq aqqutigalugu Kalaallit Nunaanni Danmarkimilu pissutsit pillugit ataatsimoorussat pillugit suleqatigiinnissaminnik isumaqatigiissuteqarput.

- Partiit taakku marluk tunngaviusumik pingaartitarpassuit politikkikkullu angorusutaat amerlasuut assigiipput, taakkualu saniatigut tamatta isumaqarluinnarluta, politikkikkut suleqatigiinneq partiini assingiinnik isumaqartunik Danmarkimi aammalu Kalaallit Nunaanni tamaginnut iluanaarutaaginnartussaasoq. Taamaattumik nuannaartorujussuuvunga, kalaallit nunaanni suleqatitsinnik Demokraatini suleqateqarnitta piviusunngortikkatsigu, ukiuni kingullerni ilisarisimalersimannik iluarinartitannillu Alex Vanopslagh, Liberal Alliance-mi siulittaasoq oqarpoq.

- Piffissaq pissanganartoq aalajangiiffiusussarlu

Demokraatit Siluttaasuat, Jens-Frederik Nielsen, asserluinnaanik danskit suleqatimik Liberal Alliance-mi qaninnerusumik suleqatigineqalernissaat qilanaaraa:

- Piffissami pissanganartumi aalajangiiffiusussamilu Kalaallit Nunaata Danmarkillu akornanni maannakkorpiaq inissisimavugut. Inernera qanoq ikkaluarpalluunniit, qularutissaanngilluinnarpoq, piffissami qaninnermi pitsaasumik isummersoqatigiinnissaq pitsaasumillu suleqatigiinnissaq annertuumik pisariaqartinneqassasoq. 

- Tassani uagutsinni Demokraatini pingaartuuvoq, pingaartitatta assiganik pingaartitsisunik aammalu tunngaviusumik Kalaallit Nunaata aalajangeeqataanerunissamik kissaateqarneranik tunngaviusumik ataqqinnittumik, suleqateqarnissaq. Suleqat taamaattoq Liberal Alliance-mi nassaaralugu isumaqarpugut, Jens-Frederik Nielsen oqarpoq.

Partiit siulittaasuisa marluk aalaakkaasumik ataatsimiittassapput, partiillu akornanni oqaloqatigiinneq ingerlaavartumik ingerlanneqassalluni.

Inatsisiliortuni oqallinneq ilisimasaqarnermik aallaaveqassaaq

Demokraatit siulittaasuat, Jens-Frederik Nielsenip nuannaarutigaa partiit taakku marluk suleqatigiinnissamik isumaqatigiissuteqarsimanerat:

- Piffissap sivikitsuunngitsup ingerlaneranni immitsinnut ilinniarpugut, aammalu paasivara Liberal Alliance Kalaallit Nunaanni pissutsinut tunngasunik ilisimasaqarluartuusoq, tamannalu pitsaasuuvoq politikkikkut naleqartitatigut paaseqatigiinnissamut, aammalu politikkikkut pisut pillugit immitsinnut immersoqatigiittarnissarput tamatta iluaqutigilluarumaarlutigu, taamatuttaaq Folketingimi suliarineqartuni, Kalaallit Nunaat Danmarkilu ataatsimoorussamik suliaqarfiusuni, Liberal Alliance-p isummersuutaanik apuussivigineqartarnissarput iluarisimaarparput.

Jens-Frederik Nielsen-ip assersuutigaa qanoq pingaaruteqartigisoq oqallinnerup ilisimasaqarluarnermik aallaaveqartumik ingerlanneqarnissaa:

- Takuinnarneqarsinnaavoq Folketingimi Kalaallit Nunaannut tunngasunik ataatsimiititaliaq. Assersuutissaqarpoq Kalaallit Nunaat pillugu qanoq ilisimasaqarneq ilaanni annikittartigisoq. Allaat takusarparput partiit ilaasa sinniisaat allaat eqqunngitsumik tunngavissaqanngitsumillu oqariartuuteqarsinnaasartut, taamaattumik pitsaasuuvoq maanna Liberal Alliance-mik suleqatigiinnerput aaqqissuussamik ingerlaleratsigu, aammalu qularinngilluinnarpara oqallinnerup pitsaassusaanik qaffassaataassasoq.

Folketingimi inissamik anguniagaqarneq

Politikkikkut suleqatigiinnermik saniatigut, partiit aamma teknikkikkut suleqatigiinnissamut pilersaaruteqarput, Demokraatit iluaqutigisinnaasaannik:

- Folketingimut iserternissarput anguniarparput, tamannalu sulissutigiuarparput, kingullermik folketingimut qinersinermi iluatsingajaavipparput, maannalu nangittumik  folketingimut iserternissarput anguniarlugu tulliani qinersinissamut (kingusinnerpaamik oktober 2026, aaqq.). Maanna folketingimut qinigassanngortinnissarput sulissutigisinnaavarput Liberal Alliance suleqatigalugu, Jens-Frederik Nielsen oqarpoq.

Naggataatigut Nielsenip erseqqissarpaa Demokraatit namminiilerumaarnissamik anguniagaqarnerat Liberal Alliancemit paasisimalluarmagulu ataqqineqarmat tamanna toqqissisimanartuusoq.

samfund samarbejde alex vanopslagh demokraatit inuiaqatigiit jens-frederik nielsen liberal alliance

ATORFIIT Se alle jobs

Powered by Labrador CMS