Demokraatit: Ilisimatusarfimmi pissutsit ernumanartut
Ilisimatusarfimmi aqutsisut ilisimatusartullu akornanni taarseraattoqarujussuarnerani pissutsit maanna atuuttut ernumanarput. Nunami ilinniarfiit qaffasinnerpaartaata ineriartornera patajaatsoq qulakkeerniarlugu politikkikkut sammineqarnissaa, Demokraatit ujartorpaat.
Ilisimatusarfimmi pissutsit iluarsineqarniassammata politikkikkut ukkatarinnittoqartariaqartoq, Demokraatit siulittaasuat Jens-Frederik Nielsen isumaqarpoq.
Assiliisoq: Leiff Josefsen
Aqutsisunik qaffasissunik marlunnik pissarsiortoqarpoq, Ilisimatusarfimmilu pisortat akornanni amerlasuuni atuukkallartut arlaqarlutik. Tamatuma saniatigut ilisimatusartut pisortallu arlallit Ilisimatusarfimmit soraarsimapput, Demokraatineersullu Jens-Frederik Nielsenip paragraf 37 naapertorlugu apeqqutaanut Ilinniartitaanermut Naalakkersuisup Aqqaluaq B. Egedep akissummini pissutsit ilungersunartutut taavai.
- Ilisimatusarfiup aqutsisuisa ataavartumik aqutsinissartik pigerpasinngimmassuk aarleraara. Ingerlatamummi angorusutat angorusukkaanni, uneqattaanngitsumik piginnaaneqarluartunillu pisortaqartoqartariaqarpoq, allanngorartuarnernut tulluarsagassanullu ingerlatat pisariaqartittuagaannut suliaqarnermi siuttuuneq pigiinnarusukkaanni, tusagassiuutinut nalunaarummi Demokraatit siulittaasuat Jens-Frederik Nielsen allappoq.
Politikkikkut ukkatarinnittoqartariaqartoq
Ilisimatusartut nunatsinneersut nunanillu allaneersut Ilisimatusarfimmut attuumassuteqarunnaartarneri Jens-Frederik Nielsenip ernumassutigaa, tamannami Ilisimatusarfiup ineriartorneranut kinguneqarsinnaavoq:
- Ilisimatusartut aamma ilinniartitsisuupput – ilisimatusartullu ph.d-mik tunuliaqutaqartut ikiliartuinnarpata, avataanit ilinniartitsisussanik sulititsisoqartariaqassaaq. Amerlanertigut ilisimatusarnermik tunuliaqutaqanngitsunik. Ilinniartunut ilisimatusarnermik tunngassutilimmik ilinniartitsinissamut periarfissat ajorseriassapput, uffa ilisimatusarfeqarnerup tamanna aallaavigigaluaraa.
- Ilisimatusarfiit tamarmik ineriartortuassagunik avataanit isummersortunik pisariaqartitsipput. Ilisimatusartut avataaneersut tamakkiisumik – ilaannakortumilluunniit Ilisimatusarfimmi suligaluarunik, ilinniarfeqarfimmut qaffasissumut aallaavittut iluanaarutaapput, ajornartorsiutit isiginiarnerannut nutaanik paasinnittaaseqartuusarmata. Ilisimatusarfiup imminut mattunnissaa maannakkut inissisimanermi ulorianaateqarpoq, allappoq.
Taamaattumik pissutsit politikkikkut ukkatarineqarnerulernissaat piumasaraa, Ilisimatusarfimmi aningaasanut inatsit aqqutigalugu 100 millionit koruunit missaannik aningaasaliiffigineqartoq ingerlallualerpat nuna tamakkerlugu iluaqutaassammat.
