Demokraatit Inatsisartunut qinersinissamik piumasaqarput

Naggaterpiaa tikillugu naalakkersuisooqatigiit partiivisa aammalu illuatungiliuttut partiivisa akornanni avissaaqqanerujussuaq aammalu politikkikkut oqaloqatigiissinnaajunnaaqqaneq ersersinneqarpoq.

Tamanna kingumut uppernarsarneqarpoq Naalakkersuisut politikkikkut aningaasaqarnikkullu nalunaarutaat, upernaaq manna ataatsimiinnerup ulluisa kingullersaanni oqaluuserisassat kingullersaattut inissinneqarsimasoq marlunngornermi maajip 28-iani oqallisigineqarmat.

Naalakkersuisut aamma naalakkersuisooqatigiit partiivisa upperaat aalajangiusimallugulu, aningaasaqarnikkut politikki ingerlanneqartoq tassaasoq aqqutissaasoq naleqquttoq, nunap aningaasaqarnikkut nammineersinnaaneranut suliniuteqarnermi.

Kisianni illuatungiliuttut partiivi, pingaartumik Demokraatit isumaqarput, naalakkersuisooqatigiit piliaannik nunatsinni aningaasarsiorneq innuttaasullu aningaasarsiornissaat aarlerinartorsiortinneqartut. Taamak isornartorsiuinermi pingaartumik innersuussutigineqarpoq aalisarnermut inatsisissap akuersissutigineqarnera:

- Aalisarneq pillugu inatsit nutaaq isumaqarpoq, naatsorsuutigisaraluatsinnit ikinnerusunik aningaasanik isertitsissasugut. Tamanna kalaallit privaatimik aningaasaqarneranut ajoqutaavoq, ataatsimoorluta pigissaarnissatsinnut inuunerissaarnissatsinnullu ajoqutaavoq aammalu aningaasatigut namminiilivinniarsarinitsinnut ajoqutaalluni aningaasaqarnermut, politikkikkut namminiilivinnissamik pilersitsisussamut, Jens-Frederik Nielsen oqaaseqartartutut oqaaseqaatimini taamak oqarpoq.

Aningaaseriviit qisuariaataat pillugu naapiffeqanngitsumik oqallinneq 

Politikerit aamma aningaaseriviit qisuariaataannut tunngatillugu aalisarnermut inatsisip kingunerisassai pillugit isumaqatigiinngissuteqarput, pingaartumik Grønlandsbankenip qisuariaataa oqallisigineqarluni. Politikerit aningaaseriviit qisuariaataannik qanoq paasinninnertik pillugu, pineqartoq erseqqissaatinneqarsinnaanngikkaluartoq, illuatungeriillutik assortuussutigingaatsiarpaat.

Naalakkersuisooqatigiit partiivi isumaqarput, Grønlandsbanken bankillu allat aalisartut taarsigassarsiniarsinnaanerannik ammaassisut. Tamanna isummersuutigaat illuatungiliuttut muminganik isummersortut, tassa aningaaseriviit aatsaat taarsigassarsisitsisinnaalissasut "aqutsiveqarfinni pisassiisarneq piujuartitsinermik tunngavilik" aatsaat pippat, illuatungiliuttut naapertorlugit tamanna aamma isumaqarpoq aalisartut, pingaartumik aqutsiveqarfik 47-miittut, annertuumik ikilisinneqassasut, tassami kvotat biologit siunnersuutaannut appartinneqassammata.

Silaannaap salinneqarnissaanik pisariaqartitsineq

Jens-Frederik Nielsen (D) Naalakkersuisut sakkortuumik isornartorsiorpai tusarnaarsinnaassuseqannginnerarlugit aamma isumaqatigiinniarusussuseqannginnerarlugit:

- Naalakkersuisoqarpugut, unittoorsimasunik, aammalu pisariaqarluni silaannaap salinnissaanut Inatsisartunut qinersinikkut.

Nielsen isumaqarpoq, Naalakkersuisut aamma naalakkersuisooqatigiit, Demokraatit isumaat malillugu, aningaasat innuttaasunit aariarlugit aningaasat taakkoqqissaat atorlugit akileraarutitigut aaqqissuussinerup aqqutigalugu agguataareqqinniarsarisut.

Assersuutigalugu puiaasat pillugit nalunaarut taaneqarpoq, tassanngaanniit 85 millionit koruunit puiaasat utertittakkat akitsuutaasigut pissarsiarineqarsimapput, taassuma saniatigut aamma Tusass aqqutigalugu akileraarutitut paasineqartariaqartumik akigititai pissutigalugit aallertoqartarneraavoq, aningaasatigut iluanaarutit ilarpassui nunatta karsianut tunniuneqartarmata.

Tamakku saniatigut aamma peqqinnissaqarfimmi sulisussarsiornermi aamma sulisussarsiarineqarsimasut pigiinnarnissaannut annertuumik ajornartorsiuteqartoqartoq Demokraatit isumaqarput, Naalakkersuisullu sattaaserlutik tukattumik aaqqissuussiniarsaralutik ingerlanerarlugit.

Jens-Frederik Nielsen oqaaseqaatini pillugit apersorneqareerluni naggasiivoq siunissami aningaasaqaarnikkut ingerlatsineq pillugu nassuiaataasalertussat ersersikkumaaraat inuiaqatigiit aningaasarliuleriartortinneqarsimasut, naalakkersuisooqatigiit massakkut atuuttut pilersitaannik, pingaartumik aalisarnermut inatsisip akuersissutigineqarnerata kingunerisaanik.

Kattuffik allanngortinneqarsinnaanngitsoq

Oqallinnermili sivisuumi tassani Naalakkersuisut imaaliallaannaq nikeriartitassaanngitsutut inissisimapput.

Aningaasaqarnermut naalakkersuisoq Siumumullu siulittaasua, Erik Jensen, ilaatigut oqarpoq:

- Suleqatigiinnissaq pillugu assavut illuatungiliuttunut isaattaraluarpagut, kisianni saaffiginnissutit tamarmik itigartitsissutigineqartarput, Demokraatillu akileraartarnermut aaqqissuusseqqinnissaq pillugu naggatissaa tikillugu suleqatigivagut, kisianni naggaterpaatigut tunuarput, taamaattumillu partiip nammineq nassuiaateqarfigisariaqarpaa, sooq tunuarnerlutik.

- Maanna 2025-imut aningaasanut inatsisissatut siunnersuut piareersarneqassaaq aamma tassunga tunngatillugu isumaqatiginninniartoqartussaalluni, partiillu tamarmik aggersarneqassapput. Naammanngilaq immitsinnut naapiffeqanngitsutut nipituuliorfiginneqattaarnerput, iliuuseqartariaqarpugut innutaasut atukkamikkut oqilisaanneqarnissaat timitalerlugu. Aamma ukiorpassuarni aningaasaqarnermut siunnersuisoqatigiinnit aaqqissuusseqqinnissat aallartittariaqarigut kaammattorneqartuarsimavugut, maannalu iliuuseqarnissamut aallartitsivugut, ajuusaarnaraluartumik illuatungiliuttut partiivi iliuuseqarnissamut piviusunngortitsinissamullu peqataarusunngillat, aningaasaqarnermut akileraartarnermullu Naalakkersuisoq, Erik Jensen eqikkaanermini ilaatigut oqarpoq.