Ippassaq pingasunngornermi Kommune Kujallermi aningaasaqarnermut inuussutissarsiornermullu ataatsimiititaliap ataatsimiinnera ingerlanneqarpoq. Siunertaagaluarpoq ataatsimiititaliap ataatsimiinnerata malitsigisaanik kommunalbestyrelse immikkut ittumik ataatsimiisinneqassasoq.
Maannali Margrethe Thårup Andersen (D) nassuiaavoq aningaasaqarnermut inuussutissarsiornermullu ataatsimiititaliami ataatsimiinneq kingusinnerusukkuty nanginneqassasoq:
Ippassaq pingasunngornermi Kommune Kujallermi aningaasaqarnermut inuussutissarsiornermullu ataatsimiititaliap ataatsimiinnera ingerlanneqarpoq. Siunertaagaluarpoq ataatsimiititaliap ataatsimiinnerata malitsigisaanik kommunalbestyrelse immikkut ittumik ataatsimiisinneqassasoq.
Maannali Margrethe Thårup Andersen (D) nassuiaavoq aningaasaqarnermut inuussutissarsiornermullu ataatsimiititaliami ataatsimiinneq kingusinnerusukkuty nanginneqassasoq:
- Maannamut nassuiaanneqarnerput naammaginanngilluinnarpoq, isumarput malillugu ilaannakortumik nassuiaanneqarpugut, A-skattit akileraarutit namminersorlutik oqartussanut nassiunneqartussat qanoq ililluni puigorneqarsimanersut, aammalu aningaasat 40 millionit koruunit sinnerlugit sumut atorneqarsimanersut pillugit paasissutissat naammanngillat.
- Paasissutissat naammanngitsut saniatigut, missingersuutinik malinnaaneq piumasaqaatit malillugit ingerlanneqarsimanngitsoq aamma paasivarput, politikkikkullu aqutsineq akisussaassuseqartumik ingerlanneqartariaqarpoq. Tamanna attanneqarsinnaanngilaq, Kommune Kujallermilu innuttaasunut taamatut kiffartuussisinnaanngilagut, taamaattumik kinguneqartitsisoqartariaqarpoq, Margrethe Thårup Andersen Sermitsiamut oqarpoq.
Taamaattorli kinguneqartitsineq qanoq ittoq Demokraatit Kujataani piumasaqaatigissaneraat suli aalajangiunneqanngilaq:
- Aningaasaqarnikkut ingerlatsineq taamak tukatsigimmat massakkuugallartoq suli isummerfigisinnaanngilarput kinguneqartitsineq qanoq ittorpiaq tulluartuartuussanersoq. Kisianni qinikkatut ataatsimoorluta aamma tamatta immikkut akisussaaffeqarpugut kommunip aningaasaqarnera innuttaasut sinnerlugit isumagilluassallugu. Taamaattumik Demokraatit tungaanniit aningaasaqarnikkut ingerlatsineq akuersaanngilarput arlaleriarlutalu piaartumik ersarissumillu iliuuseqarnissamik piumasaqarsimavugut ajornartorsiutit aaqqiivigineqaqqullugit, aamma nassuiaatit maannamut pissarsiarisimasagut naammaginanngilluinnarput, taamaattumik kinguneqartitsisoqartariaqarpoq, Margrethe Thårup Andersen (D) nassuiaavoq.
Naammaginartumik nassuiaatissaqannginneq kommunalbestyrelsimut ataatsimiinnissamik innuttaasunillu ataatsimiititsinissamik kinguartitsivoq
Pilersaarutaagaluarpoq aningaasaqarnermut inuussutissarsiornermullu ataatsimiititaliap ataatsimiinnissaa juunip qulingani pissasoq kingornalu kommunalbestyrelsi immikkut ittumik ataatsimiinnissamut aggersarneqassasoq, taakkulu pereerpata borgmesteri Stine Egede (IA) kommunip illoqarfiini angalassasoq innuttaasunik ataatsimiititsilluni, taamaalilluni innuttaasut aningaasaqarnermik ingerlatsinermut paasisaqarnissaat isumannaarneqarluni.
Kisianni aningaasaqarnermut inuussutissarsiornermullu ataatsimiititaliap ataatsimiinnera ingerlateqqinneqassaaq juunip 26-ani, kommunalbestyrelsillu qaqugu aggersarneqassanersoq borgmesterilu qaqugu innuttaasunik ataatsimiititsinissaasa pilersaarusiorneqarnera suli nalunaarutigineqanngillat.
Kommune Kujallermi Demokraatit isumaqarput tulluartuusoq utaqqinissaq Juunip 26-ata kingornanut.
- Naatsorsuutigisimagaluarparput naammaginartumik nassuiaateqartoqassasoq, taamaanngilarli, aamma kommunalbestyrelsimi immikkut ittumik ataatsimiinneq innuttaasunillu ataatsimiititsineq ingerlanneqassappata, taama amigartigisumik paasissutissiisoqarnera tunngavigalugu naammaginartuunngilaq, Thårup Andersen oqarpoq.
Demokraatit kommunimi suleqatigiissutisianiit aninissaat pillugu apeqqutigineqarami, Thårup Andersen suli akissuteqarsinnaanngilaq:
- Naammagittarsinnaanerput killissaminut peqqajaagaluartoq, taamaattoq utaqqerusuppugut juunip 26-ani ataatsimiinnermi qanoq angusaqarsinnaanitsinnut. Akisussaaffitsinnik qimarratiginnikkusunngilagut, aamma tunoqqutaarneqartutut pisunullu iliuuseqariarnissatsinnut periarfissinneqanngitsutut misigisimagaluarluta, aatsaallu pisut pereersut aningaasaqarnikkut qanoq tukatsiguisumik ingerlatsisoqarnersoq paasitinneqarnitsigut piffissaagallartillugu qisuariarnissatsinnut periarfissinneqarnikuunngikkaluarluta. Iliuuseqarusuppugut, uuttorneqarsinnaasumik isertuaatsumillu innuttaasut peqataaffigisinnaasaannik najoqqutassiueqataarusuppugut, tamannalu qulakkeerneqanngippat eqqarsaqqittariaqassaagut, Kommune Kujallermi kommunalbestyrelsimi ilaasortaq Margrethe Thårup Andersen (D) Sermitsiamut oqarpoq.
Borgmesteri Stine Egede (IA): Ingerlatsiviit annertusisamik nakkutigineqassapput
Sermitsiap Margrethe Thårup Andersen (D) apersoreeraa ualilluinnartoq Borgmesteri Stine Egede (IA) tusagassiuutitigut nalunaaruteqarpoq inissisimaneq pillugu.
Egedep ilaatigut nassuiaatigaa ingerlatsivinni suliassaqarfinni tamani aningaasaqarnermik nakkutilliinerup nukittorsarneqarnissaa aningaasaqarnermut ataatsimiititaliap ataatsimiinnermini akuersissutigaa. Siullertut, isumaginninermi annertusisamik nakkutilliinerit aqutsinerlu aallartinneqarput ilaatigut suliassaqarfiup taassuma ingerlatsivinni annerpaajunera aningaasatigullu ilungersunartorsiorfiunerpaajunera pissutigalugit.
- Aningaasaqarnikkut malinnaalluarsinnaalerumalluta atortorissaarummut aningaasaqarnermik aqutsissutaasumut nutaamut ikaarsaarnitsinnik akisunaarisimanerput nassuerutigisariaqarparput. Aningaasanik tigoriaannaateqarnikkut ajornartorsiut sunik pissuteqarnerinik Aningaasaqarnermut Ataatsimiititaliaq ataatsimut paasissutissinneqarpoq, ileqquusumillu ataatsimiinnermi tullermi sukumiinerusunik erseqqissaavigineqassalluni. Maanna pissutsinik qulaajaanikkut pissutsit qanoq issusiinik paasisimannillualernissarput pingaaruteqarpoq kiisalu suliassaqarfimmi oqimaannerpaami aningaasaqarneq sukanganerusumik nakkutigilertariaqarparput, taamatullu aamma aningaasaqarnermik suliaqarnermi piginnaasatigut qaffassaasoqartariaqarpoq.
Ilanngullugu Stine Egedep uppernarsarpaa aningaasaqarnermut inuussutissarsiornermullu ataatsimiititaliaq 26. juni ataatsimeeqqissasoq. Tamatuma saniatigut ilisimatitsissutigivaa kommunalbestyrelsi 27. juni immikkut ittumik ataatsimiissamut aggersarneqassasoq.
Ataatsimiinnerit taakku pereerpata borgmesteri innuttaasunik ataatsimiitsitsissaaq. Siullermik Nanortalimmi juulip aallaqqaataani, tamatuma kingorna Narsami juulip appaanni kiisalu naggataatigut Qaqortumi juulip pingajuanni ataatsimiitsitsinerit ingerlanneqassallutik.
Kinguneqartitsisoqarnissaanik piumasaqaateqartoqarnera pillugu borgmesteri oqaaseqartikkusukkaluarparput, tusagassiuutitigulli nalunaarut innersuussutigigallarpaa.
