Demokraatit Qeqertarsuarmi ajugaasut

Kommune Qeqertalimmi Qeqertarsuarmi sunngiffimmi pisortaq Simigaq Heilmann, 11. marts Inatsisartunut qinersinermi 70-inik qinerneqarluni Inatsisartunut ilaasortanngorpoq.

Taanna 2019-imiit 2021-p tungaanut Inatsisartunut ilaasortaanikuuvoq, 2021-mili qinersinermi 86-inik qinerneqarluni ilaasortanngunngitsoorluni. 

Qinigaaffimmi kingullermi Qeqertarsuarmit Inatsisartunut ilaasortaatitaqannginneq illoqarfiup ineriartorneranut assigiinngitsutigut sunniuteqarnerlussimasoq, illoqarfimmili ineriartorneq ilorraap tungaanut saatinniarlugu politikikkut suliniutit assigiinngitsut piffissami aggersumi aallartinneqassasut, Simigaq Heilmann oqarpoq.

Qinersisartunit tigulluarneqartoq

Inatsisartunut qinersinermi Demokraatit 8.563-inik qinerneqarlutik ajugaarujussuarput, Nunatsinnilu partiini annerpaanngorlutik. 2021-mi Inatsisartunut qinersinermi Demokraatit Qeqertarsuarmi 73-inik qinerneqarput, maannakkulli partii 179-nik qinerneqarluni illoqarfimmi partiinut allanut naleqqiulluni amerlanerpaanik aamma qinerneqarluni.

Qineqqusaarnerup nalaani saqqumilaarpallaarsimanani, taamaattumillu Inatsisartunut ilaasortanngornini nuannaarutigigini, Simigaq Heilmann oqarpoq.

- Qineqqusaarnermi KNR-TV-kkut aallakaatinneqartumi ataasiaannarlunga peqataavunga, Qeqertarsuarmilu ataasiaannarlunga aamma qineqqusaarlunga, qineqqusaarnerullu annerpaartaa namminneerlunga Facebookkikkut ingerlannikuuara, taamaattumik nammineq inuttut angusara partiillu angusaa naammagisimaarpakka, taanna oqarpoq.

Demokraatit Qeqertarsuarmi immikkoortortaqanngillat, kisiannili Kommune Qeqertalimmi ataatsimut suleqatigiiffeqarlutik, taamaakkaluartoq Qeqertarsuarmi tapersersorneqarluarnerat peqqutissaqarluartoq, Simigaq Heilmann isumaqarpoq.

- Qineqqusaarneq tamaat Demokraatit torersumik saqqummertarput allanillu mingutsiteriniartunut akulerunneq ajorlutik. Kisianni aamma siulittaasorput Jens-Frederik Nielsen takutitsilluarpoq, tamannalu qinersisartorpassuarnit tigulluarneqarsimavoq.

- Qinersinerup unnukkuani Demokraatit Nunatsinni partiini anginerpaanngortut paasinarsimmat, nuannaangaarama isikka assannik matuakka qissaserlungalu, takorluugarlu piviusunngortoq peqataaffigalugu ingasassuaarpoq, taanna oqarpoq.

Demokraatit qulinik Inatsisartunut ilaasortaatitaqalerput, piffissamilu matunami Naalakkersuisut nutaat inississornissaat pillugu isumaqatigiinniarnerit suli ingerlammata, Demokraatit Naalakkersuisoqatigiinni peqataalissappata, sinniisussat qassit Inatsisartunut isernissaat maanna oqaatigineqarsinnaanngikkallarpoq.

Sulinissaq tullinnguuttoq

Ukiuni kingullerni Qeqertarsuarmi innuttaasut ikiliartorput mannakkullu 799-iinnanngorsimallutik.

- Qeqertarsuarmi inuussutissarsiornikkut periarfissat pitsaanerulernissaat siunertaralugu piffissami aggersumi politikikkut suliniutit assigiinngitsut aallartinneqassapput.

- Qeqertarsuarmit Qeqertarsuarmullu imaatigut silaannakkullu ilaasunik angallassinerup pitsaanerulernissaa pingaaruteqarluinnarpoq, tassungalu atatillugu suluusalinnut mittarfissatut pilersaarutaasoq pimoorullugu ilaatigut aallartinneqartariaqarpoq, Simigaq Heilmann oqarpoq.

Illoqarfiup ineriartortinneqarneranut atatillugu innuttaasut peqataatinneqarnissaat pingaaruteqartoq, taanna isumaqarpoq.

Qinigaanngitsoortut

Maritha Broberg aamma Hans Jørgen Lukassen Atassumiit Inatsisartunut qineqqusaarput, taakkuli isinngitsoorlutik.

- Februaarimi pisut inuttut uannut sakkortusimapput, taassumalu saniatigut Ilulissani, Sisimiuni Nuummilu tv-kkut qineqqusaarnerit silamik angallannermillu peqquteqartumik peqataaffiginngitsoorpakka, taamaalillungalu qinersisartunut oqariartuutiginiakkakka naammaginartumik apuussimanagit.

- Taamaattumik qinersinermi taamatut inisseratarsinnaanera piareersimaffigereersimavara, Maritha Broberg Atassutip siulersuisuunerini ilaasortaasoq oqarpoq.

Qeqertarsuarmi Siumut aamma Inuit Ataqatigiit Inatsisartunut qinigassanngortitsinngillat.