Demokraatit
Kommuneqarfik Sermersuumi kommunalbestyrelsimut qinersinissamut qulinik
qinigassanngortitsipput.
Qineqqusaartut Inatsisartunut qinersinermisut
taaguunneqartigissagunik Poul Petersen borgmesterissatut
qinigassanngortinniarlugu iluminni aalajangersimapput.
Demokraatit
Kommuneqarfik Sermersuumi kommunalbestyrelsimut qinersinissamut qulinik
qinigassanngortitsipput.
Qineqqusaartut Inatsisartunut qinersinermisut
taaguunneqartigissagunik Poul Petersen borgmesterissatut
qinigassanngortinniarlugu iluminni aalajangersimapput.
- Qinersisartut
suleqatigisartakkattalu tamanna qanoq isumaqarfigissaneraat apeqqutaalervoq.
Tamatta innuttaasut sullinnissaannut suleqatigiinnissaq ukkatarissagipput
uannut pingaarnerpaavoq, Poul Petersen ataasinngormat utoqqaat ornittagaanni
Pilutami utoqqarnut tunngasunik qinersisartunik ataatsimiititsinnginnermini
Sermitsiamut oqarpoq.
Poul
Petersen aamma Justus Hansen qinigaaffimmi kingullermi Kommuneqarfik
Sermersuumi kommunalbestyrelsimut ilaasortaasimapput, tassanilu Nuummi
ineriartorneq annertuumik maluginiarsimavaat. Taamak ineriartortoqartillugu
malinnaalluarnissaq unammillernartunullu aaqqiissutissaqarnissaq pisariaqarpoq.
- Ajornartorsiutit ilisimareerlugiilu
aaqqiissutissarsisariaqarpagut. Utoqqaat amerliartuinnarnera inuillu
sulisinnaasut ikiliartuinnarnerat pineqarpoq, oqarpoq.
Utoqqarnut
tunngasunut aaqqiissutissatut siunnersuutit
Ukiuni aggersuni utoqqaat amerliartorumaartut, aamma innuttaasut sulisinnaasut ikiliartorumaartut
Kalaallit Nunaanni innuttaasut amerliartornissaat pillugu missingersuummit
erserpoq. Utoqqarnik isumassuinermut aningaasartuutit amerliartorlutillu
isertitat nikinngippata attassiinnarnissamut ajornartorsiutaassasoq, tamannalu
inuiaqatigiit aningaasaqarnerannut oqimaaqatigiissaarinnginnerulissasoq
Aningaasaqarnermut Siunnersuisoqatigiit saqqummiuppaat.
- Utoqqaat amerliartorlutillu
sivisunerusumik inuusarput, ajornartorsiutillu taakkua kingunerisaat
aaqqiissutissarsisariaqarpagut. Tamanna utoqqaat pillugit aningaasanik
amerlanerusunik immikkoortitsinikkut aaqqissinnaanngilarput. Utoqqaat
soraarninngorpata kikkut akisussaaffimmik tigusissappat? Inuiaqatigiit
aningaasaqarniarnerannut qanoq sunniuteqassava? Utoqqaat paaqqutarinissaannut
aningaasartuutit amerligaluttuinnassapput, utoqqaallu peqqiilliortut
amerliartortillugit kommuni peqqinnissaqarfillu tatineqarnerulissallutik.
Kommunini nunamilu tamarmi politikkimi pissutsit maanna atuuttut
tunngavigalugit pisariaqartunik suli aaqqiissutissaqannginnatta tamanna
ernummatigaara, Poul Petersen oqarpoq.
Suliffimmi
avatangiisit atugassarititaasullu pitsaanerulersinnerisigut utoqqarnik
sullissisut amerlanerusut kajungilersikkusuppai.
- Sulisussarsiortariaqarpugut,
tamannalu ullormiit ullormut pisinnaanngilaq. Aappaattut utoqqarnik
isumaginninnerup pitsaassusaa isumaginninnermillu suliaqartut sullivimminni
atugassarititaat pitsanngorsaavigisariaqarpagut. Sullivimmi avatangiisit
pitsanngorsarlugillu sulisut pikkorissarnissaat qulakkiissavarput.
Aningaasarsiat toqqaannartumik sunniuteqarfigisinnaanngikkaluarlugit kattuffiit
suleqatigalugit aningaasarsiat pitsanngorsaaffiginissaat anguniarsinnaavarput.
Aningaasarsiat utoqqarnik isumaginninnermi sulisussanik kajumilersitsiniarnermi
pingaaruteqarput, Poul Petersen oqarpoq.
Sulisartunik
amigaateqarnerulernissaq ilimagineqartoq
Kommunimi 2023-mi akileraarutitigut akitsuutitigullu isertitat 241 million
koruuninik amerleriarsimammata kommunimut akileraarutip appartinnissaa aamma
qineqqusaarutigaa. Ukiuni sisamani kommunip missingersuutaani 2 procentimik
siuariartoqarsinnaanera killilerlugu kommunimut akileraarutip appartinnissaa
Poul Petersenip kissaatigaa.
- Innuttaasut akileraarutitigut
oqilisaaffigineqarnissaat kommunip akileraarutitigut
isertitaqarnerulernissaanit pitsaaneruvoq.
- Maannakkut kommunitsinni
suliffissaaleqineq appasippoq. Utoqqaat sumiluunniit suligaluarlutik
soraarninngorpata suliffiit tamarmik – pisortani namminersortuniluunniit –
sulisussaaleqissapput. Sulisussarsiortariaqarpugut, inuusuttunullu
ilinniagaqanngitsunut suliniuteqareerpugut, kisianni sulisussaaleqinerup
matussuserneqarnissaanut naammanngilaq.
- Nunanit allanit sulisussaaleqineq
pinngitsoorneqarsinnaanngilaq. Aatsitassarsiorneq ineriartortikkusukkutsigu
ullumikkumut naleqqiullugu suli amerlanerusunik sulisoqartariaqarpugut, Poul
Petersen oqarpoq.
