Demokraatit: Sapaatip-akunneranut akunnerit suliffiusut 40-niit 35-nut ikilineqarpata qanoq kinguneqassava?
Sapaatip-akunneranut akunnerit suliffiusut 40-niit 35-nut ikilineqarpata qanoq kinguneqarsinnaanersoq Naalakkersuisut misissoqqissaassagaat Demokraatit siunnersuutigaat. Siunnersuummi, Inatsisartut pingasunngorpat oktobarip 16-iani oqaluuserisassaanni, sapaatip-akunneranut akunnerit suliffiusut ikilineqarpata aningaasaqarnermut, inuiaqatigiinnut peqqissutsimullu qanoq kinguneqarsinnaanera sammineqassapput.
Assiliisoq: Leiff Josefsen
Misissuineq 2025-mi upernaakkut ataatsimiinneq sioqqullugu naammassineqareersimassasoq Demokraatit kissaatigaat, taamaalilluni Kalaallit Nunaanni sapaatip-akunneranut akunnerit suliffiusut ikilineqassanersut Inatsisartuni isummerfigineqarniassammat.
- Sapaatip akunneranut sulinerput maani nunatsinni 40 tiimiuvoq, Danmarkimi 37 tiimiulluni. Demokraatini
isumaqarpugut maani nunatsinni sulinerup apparneqarnissaa piffissanngortoq. Kissaatigaarput, maani
nunatsinni sapaatip akunneranut sulineq siunissami 35 tiiminik sivisussuseqassasoq, Anna Wangenheim (D) Inatsisartunut siunnersuutimini allappoq.
Sapaatip-akunnerani akunnerit suliffiusut ikilisinneqarnerisigut suliffiup sunngiffimmilu sammisassat oqimaaqatigiissarneqarsinnaasut Demokraatit isumaqarput, taamaalillunilu innuttaasut inuunerat pitsaanerulerluni, sulinermut nuannarinninnerulerlutik isumakkullu peqqissuunerulissallutik.
Nunani allarpassuarni, ilaatigut Islandimi Danmarkimilu, sapaatip akunneranut sivikinnerusumik sulinermi suliat naammassineqartut annikillisinnagit misileraanermi iluatsilluarsimasut ilanngullugu tikkuarpaa:
Sulilluarnerunermik kinguneqassasoq
- Demokraatit isumaqarput, sulinerup sivisussusaa appartinneqassappat sulisunik nuannaarnerusunik
sulilluarnerusunillu kinguneqassasoq. Taamatuttaarlu isumaqarpugut, sulinermi piffissarititaasup
appartinneqarnerata malitsigissagaa napparsimaneq pissutigalugu sulinngitsoornerit apparnerinik aammalu
malunniuteqarluassalluni inuit uippakajaarnermik eqqugaasarnerannik annikillineqarnissaanik, Anna Wangenheim allappoq.
Sulinerup 35 tiiminik sivisussuseqalernissaata
piffissami sivikitsumi ungasinnerusumullu kingunissai nalilersorneqaqqaassasut Anna Wangenheimip kissaatigaa. Ilanngullugu sulisut timikkut tarnikkullu peqqissusaat, aningaasaqarneq kiisalu Kalaallit Nunaanni kulturikkut atugassarititaasut sunniutaat misissorneqassapput.
Aammattaaq nunani allani sapaatip-akunnerani akunnerit suliffiusut ikilisinnerisigut misilittakkat misissuinermi ilanngunneqarnissaat siunnersuutigineqarpoq.
- Tamanna tunngavigalugu neriuppugut, Naalakkersuisut aammalu partiit allat misissuinissamik siunnersuut
tapersissagaat.
Anna Wangenheimip siunnersuutaa Inatsisartuni pingasunngorpat oktobarip 16-ianni siullermeerneqassaaq.
