Dieseli Savalimmiuni nunguppoq
Suliumajunnaartoqarnera pissutigalugu Savalimmiuni dieselimik orsersortoqarsinnaajunnaarpoq.
Savalimmiuni sivisuumik suliumajunnaartoqarnera pissutigalugu ikummatissat amigaatigineqalerput.
Toqqorsivimmit assiliartaq: Kaj Joensen - Savalimmiormiut nutaarsiassaqartitsiviat
Maajip 14-ianili suliumajunnaartoqarnera pissutigalugu Savalimmiuni inuit pilersorneqarniarnerat ajornakusoorpoq.
Suliumajunnaarneq pissutigalugu qeqertani orsersortarfinni tamani dieseli nungulluinnarsimavoq, benziinamillu orsersorfiusinnaasut pingasuinnanngorlutik.
DR Effos-p Magnilu nittartagaat aallaavigalugit allappoq. Taakku Savalimmiuni orsersortarfituapput.
Sulisartut kattuffii arlallit, ilaatigut eqqaavilerisut, lastbilinik ingerlatsisut, quersuarni sulisut eqqiaasullu, suliumajunnaarput.
Sulisut 10 procentit sinnerlugit akissarsiamik qaffanneqarnissartik piumasaraat, tamannali sulisitsisunit itigartinneqarpoq, taamaattumillu suli isumaqatigiissinnaanatik.
Heri Reynheimip, Torshavnimi sulisartut kattuffianni Havnar Arbeiðarafelagimi siulittaasup suliumajunnaartunullu oqaaseqartartup, DR-imut uppernarsarpaa isumaqatigiinniartut maanna imminnut ungasissorujussuusut.
