Kulusummi mittarfimmi dieseli 120.000 literi 2022-mi decembarimi kuuppoq.
Naak ukiut marluk qaangiutereeraluartut Greenland Airports Regionalip naatsorsuutaanut suli sunniuteqarpoq.
Kulusummi mittarfimmi dieseli 120.000 literi 2022-mi decembarimi kuuppoq.
Naak ukiut marluk qaangiutereeraluartut Greenland Airports Regionalip naatsorsuutaanut suli sunniuteqarpoq.
Suliffeqarfik taamani Mittarfeqarfimmik ateqartoq mingutsitsinermut akisussaasuuvoq, taamaattumillu aamma saliinissaq akisussaaffigalugu.
Uuliakoortoqarnerani saliinermut 3,6 millionit koruunit immikkoortinneqartut suliffeqarfiup ukiumoortumik nalunaarusiaani qanittukkut saqqummersumi allassimavoq.
8,4 mio. koruuninik akiligassinneqartoq
Tamanna pissutigalugu suliffeqarfiup kukkunersiuisuisa nalunaarusiaq ima oqaasertalerpaat:
- Suliap qanoq annertutigisimaneranik takussutissaqannginnatta saliinermut qanoq annertutigisumik immikkoortitsisoqartariaqarnersoq taamaattumillu nalilersinnaasimanngilarput, Grønlands Revision allappoq.
Mittarfiit ingerlatseqatigiiffiat saliinerup saniatigut aamma ajutoornermi akiligassinneqassaaq. Akiligassiinermut suliaq aatsaat 2025-mi naammassineqassaaq, Greenland Airports Regionalillu ilisimatitsissutigaa akiligassiissut 8.440.000 koruuniusoq tiguneqareerlunilu akuerineqarsimasoq.
Kulusummi mittarfimmi 2022-mi decembarimi uuliakoornermut atatillugu avatangiisit illersorneqarnissaat pillugu Inatsisartut inatsisaanni nr. 9-mi 22. november 2011-meersumi § 15, imm. 1 aamma § 37, imm. 2-mi unioqqutitsinerit pillugit akiligassiissutigineqarpoq, Greenland Airports Regional allakkatigut nalunaarummi ilisimatitsivoq.
Ukiuni arlalinni nakkutilliisoqartuarnissaa naatsorsuutigineqarpoq
Uuliakoornerup kingorna saliineq pillugu oqartussat attuumassuteqartut qanimut attaveqarfigisimallugit Greenland Airports Region ilisimatitsivoq.
Uuliakoortoqarneranik nakkutilliisussatut siunnersuisartut aamma atorfinitsinneqarput.
- Pisup kingorna nakkutilliineq ingerlajuarsimavoq, ukiunilu arlalinni ingerlanneqassasoq naatsorsuutigineqarpoq. Aasaq manna pisunik nalilersuisoqareerpat mingutsitsisoqarnikuunera pillugu naliliineq nutarterneqassaaq, Greenland Airports Regional allappoq.
Suliffeqarfiup oqartussat suleqatigalugit uuliamik mingutsitsinerup qanoq iliuuseqarfigineqarnissaa aamma pilersaarusiorpaa.
- Aasaq manna nakkutilliinerup inernera suliniutissanullu pilersaarusiaq saqqummiunneqareerpata saliinerup naggataarneqarnissaanut tunngaviussaaq, Greenland Airports Regional allappoq.
