Donald Trump tusarusunngikkaat

Tikeraartoqarneq nalunaaquttap akunnerinik tallimanik sivisussuseqartoq, pisortatigoortuunngitsumillu tikeraarnertut taaneqartoq, inuit qanoq oqaaseqarfigissaneraat pissanngatigalugu tusagassiivimmit anivunga. Naggataagut inuit soqutiginnilersinniarlugit ilungersortariaqassallunga aamma inaarutaasumik inerniliillunga juniorip tikeraarneranut inuit qisuariaataat januaarip nillataarneratut nillertigissanersut nalullugu.

Pisiniarfeqarfimmi Nuuk Centerimi angut utoqqasaaq naapippara piffissaqalaarsoralugulu aperalugu. Akuersinini qungujulluni ersersippaa.

- Inuinukua isumasiorniarikka, aallartippunga.

Soqutiginnilluarluni tusarnaarpoq.

– Tassaana isummanik tusarusuttunga Donald Tru...., apeqqutiginiagara naammassillugu oqaatiginngikkigaluunniit ileqimisaartorluni ingerlaqqippoq.

Nalunaaquttap akunnerata tulliuttup ingerlanerani amerlaqisut ateq Donald Trump tusaannarlugu oqaaseqarnissaminnik itigartitsisarput, taamaattorli apeqqutinnut akissuteqarusuttut inuit arfinillit akuersitillugit.

- Donald Trump juniorip Nuummut tikeraallatsiarnera qanoq isumaqarfigaajuk?

Annemette Ingemann:

- Timmisartoq allatut ittoq mittarfimmi takugakku tupaallaatigaara. Donald Trump junior Nuummut tikeraarniartoq tusarnikuugakku, taamaattumik eqqarsarpunga taannaassasoq. Tikeraarnera tupigusuutigaara tupigusuutigeqalugulu sooq Donald Trumpip ernera maaniinnersoq. Angummi taanna Kalaallit Nunaat pisiariniarlugu oqarnikuummat. Maani susunukua? Donald Trump suli præsidentinngortinneqanngilaq qanigisaminillu maanga aallartitsereerluni. Tupinnaqaaq! Naluaraluunniit qanoq oqassanerlunga. Taava tullianik qanormita susoqassaqaa?

Nunatta USA-mut ilanngussinnaanissaa qanoq isumaqarfigaajuk?

- Naamik. Danmarkimut atajuaannarnikuuvugut. USA nuna allaanerujussuuvoq anginerujussuugami, aamma ilisimanngilarput. Kajungernanngilaq. Arlaatigut quilertanartoqarami toqqissisimanaranilu.

Axel Reimer:

- Juniorip Nunarput nuannarisimagamiuk maanga tikippoq. Immaqa isumaqarpoq maani Nuummi issittorujussuusoq, silami USA-mit allaanerujussuummat. Taamanikkut Donald Trumpip Nunarput pisiariumallugu oqaatigimmagu kalaalerpassuit annilaarutigisorujussuuaat. Nunarput tuniniagaanngilaq nuna ataqqineqartariaqarpoq. Ujaqqanik nalitoorujussuarnik sumi tamaani peqarpoq, soorlu diamantinik.

Nunatta USA-mut ilaalernissaanik isumassarsiaq qanoq isumaqarfigaajuk?

Soorunami itigarterujussuarpara. Soorunami naaggaarpara, tassami uagununa nunarput, siuaasatta nunagisaat tamaanilu peroriartorpugut. Amerikamiunut naaggaarpunga.

Nadja Arnaaraq Kreutzmann:

- Isumaqarpunga maaniinnera ajornartorsiutaasorujussuusoq, ingammik uagut Inuit Danmarkimi USA-milu isigineqarnerput pillugu isummat illuatungaannarsiortorujussuummata. Oqaatigineqarpugut Danmark nuannarinngikkipput naalagaaffeqatigiinnermullu peqataarusunngitsugut. USA-mut ilanngukkusulluinnartugut USA-milu nunap inoqqaavi qanoq pineqartarnersut isornartorsiorsinnaanngikkipput.

Namminiilivinnissamik kissaateqarneq tassaanngilaq Danmarkimik nuannarinninnginneq imaluunniit maannakkorpiaq namminiilivinnissamik kissaateqarneq. Siunissami namminiilivinnissamik kissaateqarsinnaavugut, nunanillu allanik, assersuutigalugu USA-mik, suleqateqarusulluta. Tamannali ima paasisariaqanngilaq USA-mit pigineqarusunnitsinnik. Kissaatigigaluarpara avammut isigaluta inuttut silatusaartutut ilinniagaqarluarsimasutut, nammineernerup qanoq paasisariaqarneranik ilisimasaqarluartutut, isigineqarnissarput.

Nunatta USA-mut ilaalernissaanik isumassarsiaq qanoq isumaqarfigaajuk?

- Tamanna kissaatiginngilluinnarpara. Piumanngilluinnarpara. Tamanna arlalinnik pissuteqarpoq, ilaatigut soorunami Amerikamiut inuiaqatigiit atugarissaarnerat ajortumik inissisimammat. Tamatumalu kinguneranik suut tamaasa nammineq akilertariaqalissavavut.

Eqqarsaatigeriaruk maani qassit naartuersittarnersut, taakkulu tassanngaannaq namminneq timiminnik aalajangiisinnaatitaajunnaartut. Amerikamiut inuiaqatigiit iluaqutissartaqanngitsorujussuupput. Inuiaqatigiit taakkua aaqqissuussaanerat uagut aaqqissuussaanitsinnut taarsiukkusunngilara. Pisiarineqarsinnaanngilagut.

Inuuvugut, inuiaavugut. Nunagaarput. Kisianni annertunerusumik suleqatigineqarsinnaavugut, soorlu sakkutooqarnikkut aatsitassallu pillugit.

Elisabeth Kristiansen:

- Donald Trump juniorip tikeraarnissaa aqaguttoq tusarpara. Naluara qanoq isumaqarfigissanerlugu. Angutaa oqarmat Nunarput pisiarerusullugu tupaallaatigaara, aamma juniorip tikinnera tupaallaatigaara. Maaniuna sulerisoq?

Nunatta USA-mut ilanngunnissaanik isumassarsiaq qanoq isumaqarfigaajuk?

- Naaggaarpara. Ullumikkut pissutsit ajortutut oqaatigisinnaanngilakka, pissutsit taamaattuaannarmata USA-mullu ilaalerutta inuunerput qanoq ikkumaartoq takorloorsinnaanngilara.

Mette Kreutzmann:

- Donald Trump junior Nuummut tikinniartoq tusarakku eqqarsarpunga qanoq pisoqassanersoq. Susoqassanerpa? Susoqalernerpa? Nunatta USA-mut ilaalernissaa soqutigisarigakku. Tamanna uagutsinnut qanoq allannguinerussava avammut niuernermut tunisassiornermullu tunngatillugu? Tamanna eqqarsaatigisarpara. USA-mut qaninnerulerutta uagutsinnut pitsaanerussasoq, ikinngutigalu oqaloqatigiissutigeqqammerparput. Immaqa pitsaanerussaaq?

Kirstine Mogensen:

Tikeriasaarnera uatsinnut eqqumiippoq. Qanoq kinguneqassanersoq pissanngatigaara. Tikeraarnerata kingorna qanoq pisoqassanersoq eqqarsaatigisorujussuuara. Angutaa aamma maangassanerluni?

Nunatta USA-mut ilanngunnissaanik isumassarsiaq qanoq isumaqarfigaajuk?

- Tamanna kissaatiginngilara. USA sungiusimanngilarput, Danmarkip iliuusereriigai USA-mit ataqqineruakka. Nunarput USA-mut ilanngutissappat sakkutooqarfiit Pituffik Kangerlussuarlu eqqarsaatiginngitsoorsinnaanngilakka. Qanormita inissisimalissappat?