Donald Trumpip Danmarkip Issittumi sakkulersornerulernera pillugu nutaarsiassaq siammarterpaa
Trumpip pingasunngornermi ullaakkut USA-mi tusagassiuutini talerperlerneersuni qallunaat illersornissamut isumaqatigiissutaat pillugu nutaarsiassaq, tamat attaveqatigiittarfiini Truth Socialimi saqqummiuppaa.
Donald Trump siusinnerusukkut oqarsimavoq USA-p “Kalaallit Nunaat tigujumaaraa”. Danmarkimi Issittumi aningaasaliineruneranut allaaserisaq præsidentip "illersornissaq pillugu pilersaarutaanut nutaamut" naapertuuttutut taaneqartoq, Truth Socialimi pingasunngornermi ullaakkut siammarterpaa.
Foto: Kevin Lamarque/Reuters
USA-p præsidentiata Donald Trumpip pingasunngornermi ullaakkut Danmarkip Issittumi aningaasaliinera pillugu allaaserisaq saqqummiuppaa.
Tamanna præsidentip nammineq tamat attaveqatigiittarfiutaani, Truth Socialimi, pivoq.
Allaaserisaq USA-mi tusagassiuutini Newsmaximeersuuvoq sapaatiummat saqqummersinneqarluni.
Tassani illersornissaq pillugu isumaqatigiissut nutaaq, ilaatigut Danmarkip Issittumi Atlantikullu avannaani 27,4 milliardit koruuninik aningaasartaqartoq, allaatigineqarpoq.
Illersornissamut ministeriaqarfik tallimanngornermi nalunaarpoq politikkikkut amerlanerussuteqartut isumaqatigiissut akuersissutigigaat.
Donald Trumpip allaaserisaq ingerlateqqippaa, namminerli oqaasertaliinani.
Taamaattumik erseqqinngilaq sooq allaaserisamik ingerlatitseqqiinersoq, Danmarkillu illersornissamut isumaqatigiissutaanut qanoq isummernersoq.
Tusagassiiviulli Newsmaxi, talerperlertut tusagassiisartutut ilisimaneqartoq, allaaserisami præsidenti Republikaneriusoq eqqaavaa.
Allaaserisami allassimavoq Danmarkip Newsmaximik sakkussiornera Trumpip „illersornissaq pillugu pilersaarutaanut nutaamut“ naapertuuttoq.
Allaaserisami erseqqissarneqarpoq Trumpip Kalaallit Nunaat pillugu arlaleriarluni oqaaseqareernerata kingorna Issittumi isumannaallisaanermut aningaasaliiniarlutik qallunaat aalajangersimasut.
Trump siusinnerusukkut oqartareerpoq USA-p “Kalaallit Nunaat tigujumaaraa” aamma USA isumaqarpoq Kalaallit Nunaata piginissaa aqunnissaalu pingaaruteqartoq “nunap isumannaatsuunissaa nunarsuarmilu eqqissinissaq” pillugu.
Illersornissaq pillugu isumaqatigiissummi, Issittoq Atlantikullu Avannaa pillugit isumaqatigiissutip immikkoortuata aappaani, ilaatigut allassimavoq Issittumi Sakkutooqarfiup Kalaallit Nunaata illoqarfiisa pingaarnersaanni Nuummi nutaamik qullersaqarfittaassasoq.
Aammattaaq Kalaallit Nunaata Danmarkillu akornanni Atlantikup avannaani immap naqqatigut kabeliliortoqassaaq.
Isumaqatigiissummi ilanngunneqarsimavortaaq umiarsuarnik marlunnik issittumi misissuisussanik, dronenik amerlanerusunik timmisartunillu imarsiornermik nakkutilliisunik pisisoqassasoq.
Isumaqatigiissummi aamma 29 milliardit koruuninik nalilinnik timmisartunik sorsuutinik F-35-nik nutaanik 16-inik pisinissamut immikkoortitsisoqassasoq ilanngunneqarpoq.
/ritzau/
