DR-ip piviusulersaarusiaani nutaami isiginnaartut Kalaallit Nunaanni annaassiniarnerit pissanganartut isiginnaarsinnaavaat
Piviusulersaarummi issittumi annaassiniartartut nunatsinni suliassaat pingaarutillit, tassa issittumi avatangiisini sakkortuuni ajutoortoqartillugu ikiuiniarlutik piareersimasarnerat isiginnaarneqarsinnaapput.
Foto: DRTV
Issittumi annaassiniartartut nunatsinniittut DR-ip Kangerlussuarmi qulimiguulimmik ujaasinermik annaassiniarnermillu suliaqartut malinnaaffigisimasai isiginnaarneqarsinnaapput.
Immikkoortumi siullermi ilisimatuut sermersuup quppaani marlunni akornanniillutik kalerrisaaripput, ulorianartumillu anorersuassamaalerluni.
Aammattaaq sermersuarmi angalanermi ajutoortoqarpoq, taannalu qulimiguulimmik annaassiniartartumik sukkanerpaamik annaanneqartariaqarpoq.
Air Greenland tulluusimaartoq
Air Greenland Facebookimini allappoq tulluussimaarutigalugu inuttat annaassiniarnermi pingaarluinnartumi Issittumi Sakkutooqarfimmut suliaat pingaarluinnartoq DR-ip uppernarsarsinnaammagu.
Qulimiguulik atorneqartoq Airbus H225-meersuuvoq annertuumik amoorisinnaassuseqartoq taamaalilluni ujaasinissamut annaassiniarnissamullu tulluarluni, allapput.
- Ujaasinermi annaassiniarnermilu suleqatigiit ”nittarsaakkusuppavut” unnugulu nal. 20 DR1-imi tv-kut aallakaatitassiortartut annaassiniartartullu suliaasa takunissaannut qilanaarluta.
