DR-ip piviusulersaarut tunuartippaa aaqqissuisuunerlu soraarsillugu
DR-ip piviusulersaarummut tunngatillugu paasissutissat nutaat pissutigalugit, 'Grønlands Hvide Guld' tunuartippaa. Piviusulersaarut tunngavigalugu oqallittoqarnissaa aamma taamaatiinnarneqarpoq.
’Grønlands Hvide Guld’, Ivittuuni kryolit-imik piiaaffik aamma danskit naalagaaffiata qallunaallu suliffeqarfiisa piiaaffimmit aningaasatigut iluanaarutaat pillugit piviusulersaarut, saqqummersinneqarmat oqallinneq annertusiartorpoq.
Pingasunngornermi kinguneqartitsisoqarpoq, tassa DR, Det Danske Filminstitut peqatigalugu piviusulersaarummik suliaqartoq, aalajangermat piviusulersaarut DR.dk-mi saqqummerseqqajunnaartinniarlugu, aaqqissuisuunerlu akisussaasoq soraarsillugu.
Nutaarsiassaqartitsivimmi pisortaq Sandy French tusagassiuutinut nalunaarummi allappoq piviusulersaarutip qanoq suliarineqarnera pillugu nutaanik paasisaqartoqareersorlu taama aalajangertoqartoq soraarsitsisoqarsimasorlu:
- Ullumi nalunaaqutaq 12.15 piviusulersaarutip ’Grønlands hvide guld’-ip suliarineqarnerani pissutsit ilaat pillugit ilisimatinneqarpunga, tamannalu pissutigalugu aalajangerpunga piviusulersaarut DR-TV-mi aallakaatinneqarsinnaajunnaartoq.
- Tamanna pissutigalugu ulluni kingullerni ajornartorsiuterpassuit nassuerutigineqartut ajuusaarutigineqartullu pissutigalugit taama aalajangerpunga, pisortaaneq allappoq.
Grafikimut paasissutissat nutaat
Ilanngullugu utoqqatsissuteqarpoq:
- Piviusulersaarusiaq qallunaat uagutsinnut naatsorsuutigisinnaasaannut naapertuutinngitsoq ullunilu kingullerni iliuuserisimasatsinnut tunngasoq saqqummersikkatsigu utoqqatserusuppunga.
Aaqqissuisuuneq Thomas Falbe, DR-imi piviusulersaarummut akisussaasuusimasoq, ingerlaannaq atuutilersumik suliunnaarpoq.
DR-ip tusagassiuutinut nalunaarutaani erseqqissarneqarpoq taamatut aalajangerneq paasissutissat nutaat pissutigalugit pisimasoq:
- Takussutissaq pineqarpoq piviusulersaarummi siullermi pingaarnertut takutinneqartoq. Grafimi takuneqarsinnaavoq ukiuni kingullerni kryolitip tunineqarsimanerata nalinga, BFI-indeks atorlugu ullumikkut koruuninut naliga naatsorsorneqarsimalluni, qallunaat naalagaaffiata Kalaallit Nunaannut aningaasartuutaannik ilanngaatitaqartinneqarani.
Eqqortumik takutitsinngilaq
- Grafimi takutinniarneqarpoq Kalaallit Nunaat ukiuni arlalinni Danmarkimut sinneqartoorfiungaatsiarsimasoq, taamaattoqarsimappallu Danmarkip Kalaallit Nunaatalu akornanni pissutsit allaanerulluinnarnerat takutinneqarluni. Grafi piviusulersaarummi atorneqartussaanngitsoq januaarimi aalajangerneqarpoq, eqqunngitsuunera maluginiarneqarmat, DR allappoq nangillunilu:
- Tamassumali pinnginnerani Mute B. Egede aamma Lars-Emil Johansen apersorneqareersimapput. Taamaalillutik apersorneqarneranni paasissutissat piviusulersaarummi allassimanngitsut tunngavigalugit qisuariartinneqarsimallutik. Apersorneqarsimasut aaqqissuisoqarfimmit attaveqarfigineqarsimapput paasissutissat piviusulersaarummi ilaasussaanngitsut tunngavigalugit oqaaseqartinneqarsimasut, taamaattoqarneralu akuerisimavaat.
Tamanna pillugu tusagassiuutinut pisortaq ima oqarpoq:
- Piviusulersaarusiaq pillugu oqallinnermut annerusumut sanilliullugu tamanna immaqa soqutaarpasinngilaq, paasisarpulli uannut pingaaruteqarluinnarpoq, tassami piviusulersaarusiami paasissutissat atorneqartut tatigineqarsinnaasariaqarput, piviusulersaarusiortut piviusulersaarusiami grafit tunngavigisaat atorneqarunnaarsimasut atornissaannut akuersisimagaluarpata akuersisimanngikkaluarpataluunniit.
