Dronet pillugit aalajangiineq Aki-Matildap Aajallu sakkortuumik isornartorsiorpaat
Dronet marluk ungasissumut ingerlasinnaasut illersornissaqarfiup aningaasaliissutigisaasa Aalborgimut inissinneqarnissaanik aalajangiineq kalaallit Folketingimut ilaasortat marluk isornartorsiorpaat. Taama allappoq DR.dk.
Dronet ungasissumut ingerlasinnaasut Aalborgimi inissinneqarnerat Aki-Matilda Høegh-Damip aamma Aaja Chemnitzip naammaginngilaat.
Toqqorsivimmit assi: Leiff Josefsen
Dronet ungasissumut ingerlasinnaasut nutaat, Issittumi Atlantikullu avannaani nakkutilliinermik pitsanngorsaaqataasussat, Aalborgimi timmisartoqarfimmut inissinneqassasut, sapaatip-akunnerata siuliani illersornissamut ministeriaqarfik nalunaarpoq.
Aalajangiineq tamanna Folketingimi ilaasortanit marlunnit, Aaja Chemnitz Larsenimit (IA) aamma Aki-Matilda Høegh-Damimit (S), sakkortuumik isornartorsiorneqarpoq.
Tamanna DR.dk-mi allaaserineqarpoq.
Aki-Matilda Høegh-Dam DR-imut allakkatigut akissuteqarluni allappoq, dronet inissinneqarpata nakkutilliiffigisassaminnit 3000 kilometerit sinnerlugit ungasitsigisumiissasut, tamannalu annaassiniarnermut nakkutilliinermullu ilungersunartumik kinguneqarsinnaasoq, politikeri naliliivoq.
Illersornissamut ministeriaqarfiup tusagassiuutinut nalunaarutaa naapertorlugu Kangerlussuaq Kalaallit Nunaanni suliaqarnermi aallaaviusinnaavoq:
- Dronenik Kalaallit Nunaanni atuinerup qanoq ingerlanneqarsinnaanera pillugu erseqqissaanerit Illersornissaqarfiup Issittumi Atlantikullu avannaani suliassaqarneranut tunngatillugu isumaqatiginninniarnernut atassuteqartinneqassapput, illersornissamut ministeriaqarfik allappoq.
Taamatulli oqarnera Aaja Chemnitzip (IA) isumalluarnarinngilaa, taassumalu dronet Aalborgimi inissinneqarnerat isornartorsiorpaa:
- Tamanna Illersornissaqarfiup tungaannit kukkorujussuarneruvoq, tamannalu inuiaqatigiinnut kalaallinut iluaqutaanngivippoq – aningaasatigut piginnaaneqarnermulluunniit tunngatillugu, politikeri DR.dk-mut oqarpoq.
Illersornissamut ministeriaqarfik naapertorlugu dronet taakku nutaat marluk malitsigisaannik 76-it angullugit sulisorineqassapput. Aalborgimi sakkutooqarfimmi 70-it missaanniittut atorfinitsinneqassapput, Karupimilu sakkutooqarfimmi arfinillit atorfinitsinneqassallutik.
Illersornissamut Qullersaqarfiup siunnersuisimanera pillugu dronet sumi inissinneqarnissaat aalajangerneqarsimasoq, illersornissamut ministeri Troels Lund Poulsen tusagassiuutinut nalunaarummi allappoq.
Inatsisitigut akuerisaanera pillugu apeqqut
Aaja Chemnitzip Sermitsiamut itisiliilluni oqaatigaa Issittumi piginnaasanik annertusaanissamut isumaqatigiissummi isumaqatigiissutigineqartut unioqqutinneqartut, tassani dronenut marlunnut 2,3 milliardit koruuninik immikkoortitsisoqarnissaa aalajangerneqarmat.
Aalborgimi dronet inissinneqarnissaat ernumagisimavaa:
- Aalborgimi inissinneqarpata Issittumi piginnaanngorsaanermut ilaassava, Aaja Chemnitz aperivoq.
Maanna tamanna ministerimut apeqquteqaatigaa:
- Kalaallit Nunaanniinnerusoqartussaatillugu annertunerusumillu suliaqartoqartussaatillugu, Illersornissaqarfiup inatsisitigut akuerisaanissaa uannut pingaaruteqarpoq. Taamaappat ilaannikkuinnaq ungasissumut dronenik timmisarneq iluaqutaanavianngilaq, Aaja Chemnitz oqarpoq, taassumalu aamma erseqqissarpaa Kalaallit Nunaanni suliffiit piginnaasanillu ineriartortitsinerup qulakkeerneqarnissaa pineqartut.
