Kinamiut dronii Da Jiang (DJI) Kalaallit Nunaanni oqartussanit, suliffeqarfinnit inuinnarnillu annertuumik atorneqarput.
– DJI nunatsinni dronini tunisaanerpaajugunartoq, Mads Petersen droninik suliffeqarfimmit Arctic Unmannedimeersoq oqarpoq.
Taassuma Kinamiut droniinik PET-p isumannaallisaanermi aarlerinartutut isigisaanik atuinermik unitsitsisimannginnerat tupigusuutigaa, tamannalu ukiut ingerlaneranni qallunat aviisiini arlalinni allaaserineqartarpoq.
– Toortagaq tuuinnarlugu Kinami oqartussat DJI-p droniinit tamanit paasissutissanut serverini toqqortanut tamanut isersinnaapput, Mads Petersen nassuiaavoq.
– Taakkulu aamma hackerinik Kinameersunik droninut aqutsilersitsisinnaapput, taakkumi aqutsineq tigullugu sumut timminissaat, sunik assiliinissaat, paasissutissanillu sunik tigusisussanut aalajangersimasunut nassiussinissaannik aalajangiisinnaapput, taanna oqarpoq, namminerlu suliffeqarfiutimi aamma droninik DJI-meersunik atuisarnera oqaatigalugu, taamaattoq sunut sumilu atussanerlugit eqqummaariffigisorujussuanngorsimavaa.
– Paasissutissat mianernartut pineqartillugit dronit Finlandimeersut atortarpakka, taamaalillungalu paasissutissat serverinnut taamaallaat ingerlatinneqarnerat serverimullu nalusannut toqqorneqannginnerat qularnaartarpara, Mads Petersen nassuiaavoq.
Taassuma suliffeqarfimminit Arctic Unmannedimit dronit Finlandimeersut tuniniartarpai, taamalu oqarnermini Kinamit unammillerneq akerleralugu oqarnani, nalunnginnamiulli dronit aamma sunut atorneqarsinnaanerat kiisalu pissaanilinnit takornartanit aamma atornerlunneqarsinnaanerat nalunnginnamiuk.
Politiit kaammattuutaat malittarpaa
Sulisitsisuni pisortap Christian Keldsenip inussutissarsiortuni arlalinni dronit atorneqartut oqaatigaa, assersuutigalugu sanaartornermi, takornarialerinermi tusagassiorfinnilu, GE-lli atuinerit sukumiisumik ilisimasaqarfiginngilai.
Kinamiut droninik atuineq isumannaallisaanermilu aarlerinaataasinnaasut pillugit Christian Keldsen ima oqarpoq:
– Malittarisassat kaammattuutillu malinneqarnissaat pingaarnertut politikkeraarput, assigiinngitsunilli patsiseqarluta ilaasortatta tunisassianik aalajangersimasunik atuisinnaanerannut isummersuuteqanngilagut. Namminersorlutilli inussutissarsiortut sukkulluunniit kaammattuutinik isumannaallisaanikkullu politikimi sammivinnik ikorfartuinissaat orniginartuutipparput. Kaammattuutaasinnaasullu ilaasortatsinnut aamma ingerlateqqissinnaavagut, taanna oqarpoq.
Pisiniarfiit DJI droninik tuniniaasut
Dronit DJI-meersut Brugsenimi, Pisiffimmi, Elgigantimi Pilersuisumilu inuinnarnut tuniniarneqartarput.
KNB-mi nittarsaassinermut attaveqarnermullu pisortaq Benny Reffeldt Otte ima oqarpoq:
– Taakkuninnga nioqqutissarpassuaateqanngilagut, taamaariarlunili DJI-p droniinik pisiniarfitsinni pisisoqarsinnaasarpoq. DJI Europami brandit annersaraat, taakkulu droninik gadgetsinillu allanik nunarsuaq tamakkerlugu tuniniarneqartartunik tunisassiortarput, taanna oqarpoq, KNB-llu Nuummi elektronikimik pisiniarfimmik Powered by Brugsenimik ammaaqqammernera ilassutigalugu, taannalu sapaatip-akunnerani kingullermi ammarnermini droninik pisiassaateqanngilaq.
– Piumaneqassappatali siunissami nioqqutissaatitsinnut ilanngussinnaavagut, taanna Sermitsiamut oqarpoq.
– Oqartussat kaammattuutaat malittarpavut, Kinamiullu droniliaannik tuniniaanissaq unitsinneqassasoq qinnuigineqarutta, taava soorunami tamanna malissavarput, Benny Reffeldt Otte ilaassusiilluni oqarpoq.
Brugseni maannakkuugallartoq droninik tuniniagaqanngitsoq taassuma ilanngullugu oqaatigaa.
– Aasalernerani takornariaqarnerpaaffianilu nalinginnaasumik ataasiakkaanik tunisassaqartarpugut, taanna oqarpoq.
Pisortatigoortumik mianersoqqussuteqanngitsoq
Pisiffiup dronit assiginngitsut tuniniagarai, taakkununngalu DJI ilaasoq, nittarsaassinermut, attaveqarnermut CSR-imilu pisortaq Tina Hansen oqarpoq, isumannaallisaanermilu aarlerinaat pillugu ima ilassusiivoq:
– Uagut pisiortorfippulluunniit Elgiganten oqartussanit saaffigineqanngilagut. Uppernarsaatinik ersarissunik pisortalluunniit malitassiaannik peqartoqalernissaata tungaanut DJI-nik tuniniaanerput nangissavarput. Oqartussat ilitsersuutaat soorunami tamatigut malittarpavut nioqqutissaatigullu pisariaqarfiani nalimmassartarlutigit, Tina Hansen Sermitsiamut oqarpoq.
KNI-p pisiniarfiini 2018-miit maannamut droni tunineqarnerpaaq tassaavoq DJI Mini Drone, KNI-lu 2018-imiilli DJI-minngaanneersunik nioqqutissaateqanngilaq. Taama KNI-mi nioqqutissanut pisortaq Brian Weuge Chemnitz Sermitsiamut oqarpoq.
– KNI 2021-p kingorna droninik pisisimanngilaq, uninngasuutigullu ikittut (2021-meersut) nunguppata piseqqinnissamut pilersaaruteqanngilagut, Chemnitz oqarpoq KNI-lu pisortatigoortumik pisortatigoortuunngitsumillu dronit taakku atorneqarneranni isumannaallisaanermi aarlerinaateqartoqarneranik nalunaarummik tigusaqarsimanngitsoq ilassutigalugu.
Unitsitsisut
DJI-nik atuiunnaartuni Greenland Airports, sanaatornermut immikkoortoq siulliuvoq, taakku Autel droninik Amerikameersunik pisipput.
Sungiusimasalli qimallugit atortorissaarutinut allanut nuunnermi aningaasaliinermi aningaasartuutit annertupput, droninik immikkut ilisimasalik oqarpoq.
Droninik atuiunnaartut
Tusassimi pisortaq Toke Binzer ima oqarpoq:
– Oqartussat kaammattuutaasa malinnissaat Tusassip soorunami kissaatigaa, taamaammallu dronit marluk DJI-meersut, siusinnerusukkut atortuutitsinni uppernarsaasiinermi atortakkavut atorunnaassavagut.
Royal Arctic Linep pisortaata Niels Clemensenip suliffeqarfiup imaani droninik marlunnik timmisinnaasunillu marlunnik peqarnertik oqaatigaa. Taakku immami misissuinerni, sikunik alapernaarsuinermi, nittarsaassinernilu atorneqartartut Fifish-iminngaaneerlutillu DJI-meersupput.
Dronit taakku taarsernissaannut RAL pilersaaruteqarpa?
– Sikunik alapernaarsuinermut droniuterput nutaanersaavoq. Manna tikillugu dronit ukiut tamaasa taarsertarput. Dronimik pisiassatsinni tullermi DJI-meersut pisiarinaveersaassavagut, Niels Clemensen oqarpoq, nangillunilu:
– Dronit immap iluatigoortartut dronillu nittarsaassissutaasartut qaqutigut atorneqartarput, taamaammallu isumannaallisaanermut aarlerinaateqanngitsutut nalilerneqarlutik, maannali oqartussanit kaammattuutini tamanna allatut isigineqarpat soorunami malissavagut, Niels Clemensen oqarpoq.
Claus Nielsen, Kalaallit Nunaanni Aalisarsinnaanermut Akuersissutinik Nakkutilliisoqarfimmi (KANUAPNA) aalisarnermi piniarnermilu nakkutilliisuni pisortaq droninik Kinameersunik atuineq pillugu apeqqummut ima akivoq:
– Politiinit illersornissaqarfimmillu DJI-nik atuiunnaarnissarput pillugu saaffigineqassagutta, taava dronit taakku atorunnaassavagut. Novembarilli aallartinnerani pisortat isumasioqatigiinneranni isumannaallisaanermut aarlerinaateqartoqarneranik paasisaqarsimallunga pisortannut qaqilissavara.
Taarsernissaannut pilersaaruteqanngitsoq
Nukissiorfiit sisamanik droniuteqarput, taakkulu tamarmik DJI-upput. Dronit tassaapput DJI Mini 4 Pro, DJI Inspire aamma DJI Mavic 3, kingullerlu 2021-mi pisiarineqarpoq. Taama Nukissiorfinni attaveqarnermut siunnersorti Aja Neel Munkstrøm oqarpoq.
Maannakkut dronit taarsernissaat pilersaarutaanngitsoq taanna oqarpoq.
– Dronilli alapernaarsuinermilu atortut ilaannik atuinermi isumannaallisaanikkut aarlerinartortaqarsinnaanera Nukissiorfiit eqqummaariffigaat. Suliassanut dronit atorneqarfissaannut aalajangersimasunut tunngatillugu ingerlaavartumik isumannaallisaanikkut nalilersuisarpugut.
Dronit ilaatigut Nukissiorfiit tatsinik imermik pilersuiffigisaannik uuttortaanerni, ungasianit kiassarnermut aqqutit ernarneranni assiliissut infrarød atorlugu ujarlernerni atorneqartarnerat oqaatigaa. Assersuutigaluguli ungasianit kiassarnermut aqqutinik misissuineq mianernartutut paasissutissatut isigineqanngillat, Nukissiorfiillu nittartakkakkut qupperneranni ungasianit kiassarnermut aqqutit pillugit paasissutissat ivertinneqareerput.
Paasissutissat uppernarsineqanngitsut malillugit makku aamma DJI droninik atuisarput:
– Ineqarnermut Attaveqarnermullu Naalakkersuisoqarfik.
– Aatsitassanut Naalakkersuisoqarfik.
– Upalungaarsimasut arlallit.
– Inuplan.
