Dronning Margrethe napparsimalluni sulinngiffeqareernermi kingorna sulileqqissinnaanngortoq
Ebbe Munck-ip nersornaasiuttagaa novemberip tallimaani 2024-mi dronningimit tunniunneqassaaq. Dronningi uppinnermi kingorna napparsimalluni sulinngiffeqartitaasimagaluarpoq.
Dronning Margrethe Rungstedlundprisen 2024-mik tunniussinermi Karen Blixen Museum-imi Rungsted Kyst-imi ataasinngornermi septembarip 16-anni 2024.
Ida Marie Odgaard
Qaammat ataaseq sinnilaarlugu napparsimalluni sulinngiffeqareerluni dronning Margrethe pisortatigoortunut pisunut peqataasinnaanngoqqippoq.
Nutaarsiassaqartitsivik B.T., kunngikkormiut ullorsiutaat misissorsimallugit taama allappoq.
Ullorsiutini allassimavoq dronning Margrethep Ebbe Munckip nersornaataa marlunngornermi novemberip tallimaani 2024 Christiansborgimi tunniutissagaa.
Dronningi 84-inik ukiulik septembarip qiteqqunnerani angerlarsimaffimmini uppikkamili sulinngiffeqartitaalerpoq. Uppinnermi kingorna Rigshospitalimi aamma uninngatinneqartussanngorsimavoq.
Ulloq ataaseq uninngatinneqareerluni, aqaguani angerlartinneqarpoq, kunngikkormiulli nalunaarsimapput sivisunerusumik sulinngiffeqartariaqartoq.
Sulinngiffeqartariaqarnini pissutigalugu Folketingimi ukiaanerani ataatsimiinnerup oktobarip aallaqqaataani ammaanersiorneqarnerani peqataanngilaq, naak tamanna ileqquugaluartoq.
B.T.-li naapertorlugu, oktobarip arfineq-pingajuanni Islandimit pisortatigoortumik Danmarkimut tikeraartoqarnerani tupaallatsitsilluni najuuppoq.
Tikeraartoqarnerup nalaani Amalienborgimukarpoq, Islandip præsidentia aappaalu naapikkumallugit nammineq kissaateqarsimagami. Tamanna kunngikkormiut B.T.-mut uppernarsarpaat.
Amalienborgimili pisortatigoortumik tikilluaqqusinermi najuutinngilaq, soorluttaaq nalliuttorsiorpalaartumik nereqatigiinnermut peqataanani.
