Earl L. Carter: Kalaallit Nunaat "Red, White, and Blueland"-inngortinneqassaaq
Kalaallit Nunaanni Danmarkimiillu politikerit minnerunngitsumillu innuttaasut Ivittuuni orsugiassiorsimanermit qanoq iluanaarutigineqartigisimanersoq pillugu oqallinnermi kissatsikkiartuinnarfianni, USA-mi allaanerusumik ingerlasoqarpoq, nunammi taassuma Kalaallit Nunaata pigilernissaanik aqunneqalernissaanillu piumasarilluinnarpaa. Kongresimi ilaasortap allap maanna siunnersuutigaa Kalaallit Nunaat nutaatut taaguuserneqassasoq "Red, White, and Blueland".
Republikanerit inatsisartuni ilaasortaatitaasa ilaannit siunnersuut nutaaq takkuppoq, taassuma siunnersuuteqartutut siulimisut Trumpip isumaqatigiinniarneranut inissisimanerata nukittorsarnissaa kisiat pinnagu, aammali nunap atia "Kalaallit Nunaat" taarserneqassasoq "Red, White, and Blueland"-imik ilanngullugu siunnersuutigaa.
Ilusilersuineq: Buddy Carter
Qularnanngitsumik USA-p præsidentiata, Donald Trumpip piffissaqarfigisimavaa eqqarsaatigissallugu qanoq ililluni politikkikkut angorusutamini annersaasa ilagisaanik, tassalu "USA-p nunavittai annertusineqarnissaannik" piviusunngortitsissanerluni, tassunga ilanngullugu Danmarkimik isumaqatigiinniarnerit Kalaallit Nunaata pisiariniarneranut tunngasut, 10 milliardit dollarsinik naleqassusilerneqarsinnaaasumik, siunnersuuteqartup Andrew Ogles (Rep.) nammineq tagginnikuusaa naapertorlugu.
"Red, White and Blueland" Kalaallit Nunaat/Grønlandip taaguutaanut taarsiullugu
Maannali republikanerineersoq alla siunnersuuteqartunut ilannguppoq, taassuma Oglesitut Trumpimut Danmarkimik isumaqatigiinniarnissamut mandatimik tunniussinissaminnik kissaatigaa, aammalu Kalaallit Nunaata siunissami qanoq taaguuteqartinneqarnissaa pillugu siunnersuummik saqqummiussilluni.
Andrew Ogles-ip suleqataa, USA-p inatsisartuini ilaasortaq Earl L. "Buddy" Carter (rep.) siunnersuuteqarpoq Kalaallit Nunaata taaguutaa "Red, White, and Blueland"-imik taarserneqassasoq.
Siunnersuutit marluusut ataatsimiititaliamut suliassanngortinneqarsimapput, suli arlaannaalluunniit isumaqatigiinniarnissamut siunnersuutinik takusaqarsimanngikkaluartut aammalu USA-p Danmarkimik isumaqatigiinniarnissamik pilersaarutai qaqugu aallartinneqassanersut pillugit oqaaseqartoqanngikkaluartoq USA-mit sukataarneq ingerlajuarsinnarpoq.
