Elite Sport Greenlandip politikkikkut iliuuseqartoqarnissaa neriuutigaa
Timersornikkut killiffik attatiinnarneqassappat aningaasaliissuteqartoqarnerusariaqartoq Elite Sport Greenland paasissutissiivoq.
Siunissami timersornerup iluani angusaqarluarnermi nuannattoqassappat aningaasaliisoqartariaqarpoq Elite Sport Greenlandip kajumissaarutigaa.
Assiliisoq: Leiff Josefsen
Elite Sport Greenlandip aningaasaatai timersornermik pikkorissunik siuarsaanermut atortagai nungulerput.
Maanna aningaasanut inatsisissatut isumaqatiginninniarnernut atatillugu tapersersorneqarnerunissaq siulittaasup Nikolaj Christoffersenip neriuutigaa.
Elite
Sport Greenland ukiuni tallimani kingullerni periusissiaqarnerup nalaani
uninngasuutit peqqutigalugit tapersersuinikkut kiisalu,
pisussaqartitsinerunikkut aningaasat pisartakkaniik annerusumik atuinikkut iliuuseqartarsimasut kattuffik tusagassiutinut nalunaarummi allappoq.
Ukiuni tallimani kingullerni suliniuteqarnerup ingerlanerani aningaasat atorneqarsimapput:
- Piviusorli unaavoq aningaasat
uninngasuutigineqarnikut atorneqalersimalermata, tamannalu Elite Sport
Greenlandimut pisussaqartitsinikkut tapersersuinikkut qaffasissusaanik
attanneqarsinnaajunnaarneranik kinguneqassaaq, aningaasalersorneqarnikkut
sinaakkutanut pikkorivissortut qaffaaffigineqanngippata, Elite Sport Greenland allappoq.
Aningaasanik kinguneqartitsisoqassasoq neriuutigigaat
Politikkikkut soqutigineqarneq aningaasanik malitseqassasoq kattuffiup neriuutigaa:
- Neriuppugut
politikkikkut partiinit eqqumaffigineqarnera aningaasanik
kinguneqartinneqartumik iliuuseqarfigineqassasoq, unammisartut pikkorivissortut
pitsaanerpaamik atugassaqartinniarlugit, nunarsuarmioqatitsinnullu unammillersinnaassuserput
pitsanngorsarumallugu, siulittaasoq Nikolaj Christoffersen oqarpoq.
Naalakkersuisut aningaasanut inatsisissatut siunnersuumminni Elite Sport Greenland 2025-mi ukiunilu tulliuttuni 1,2 millionit koruuninik aningaasaliiffigineqarnissaa siunnersuutigaat. 2024-mi aningaasaliissutinit 100.000 koruuninik amerlanerupput. Tamatuma saniatigut Danske Spilimit sinneqartoorutinit kattuffik 3,8 millionit koruunit missaannik pissarsissasoq naatsorsuutigineqarpoq.
Assammik arsartartut kattuffia TAAK aningaasaarutoq ukioq manna siusinnerusukkut saqqummiunneqarpoq, kattuffillu aningaasatigut ajornartorsiutit qaangerniarlugit suliniutinik arlalinnik unitsitsisariaqarsimavoq nunanullu allanut unammisartunut sungiusaasut akissarsititsisarunnaarluni.
Arnat nunanut allanut unammisartut Norgemi 2023-mi VM-ertoqarnerani peqataanerat aningaasaataarunnermik kinguneqartoq TAAK-p ilisimatitsissutigaa.
