KL

DK

Eqqakkanik ikuallaasinnaaneq akuerineqartoq

Avannaata Kommuniani illoqarfiit nunaqarfiillu 25-t Naalakkersuisut akuersissuteqareersut maanna eqqakkanik ikuallaanissamut akuerisaapput.

Tôrtia Reimer-Johansen
Tusagassiortoq
Saqqummersinneqarpoq

Naalakkersuisut Avannaata Kommunia illoqarfinni nunaqarfinnilu 25-ni eqqakkanik ikuallaanissamut utaqqiisaarutaasumik akueraa.

- Eqqakkanik ikuallaasinnaasunut ikuallaavinni avatangiisinut akuerisanut ikuallaasoqassaaq.Taamaakkaluartoq Naalakkersuisut kommunimi siulersuisut ikuallaavinni eqqakkanik immikkut ittumik ammaannartumi ikuallaasoqarallarnissaanik qinnuteqarneratigut immikkut ittumik 31. juuli 2025 tikillugu akuersissuteqarpoq, tusagassiutitigut nalunaarummi allassimavoq.

Avatangiisinut ajoqutaasinnaasut annikinnerpaatinniarlugit Eqqakkat ikuallaavinni akuerineqartuni ikuallanneqartartussaapput. Naalakkersuisulli eqqakkat ammaannartumi ikuallanneqarnissaannut 2025-mi juulip 31-ata tungaanut kommunemut akuersissuteqarniarlutik aalajangerput.

- Nuummi ikuallaavik nutaaq atuutilereerpoq, ikuallaaviullu Sisimiuniittup aasamut atuutilernissaa naatsorsuutigineqarpoq. Ikuallaaviit siunissami eqqagassalerinerup pitsaanerulertussaanera qularnaassavaat, ammaannartumi ikuallaasarneq pisariaqarunnaarsillugu. Tassami ammaannartumi ikuallaasarneq peqqissutsimut avatangiisinullu isumakuluutinut ilaalluinnarpoq, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Sumiiffinni ukunani eqqakkanik ikuallaasinnaaneq akuerigallarneqarpoq:

Qaanaaq nunaqarfiilu Qeqertat, Savissivik aamma Siorapaluk ilanngullugit.

Upernavik nunaqarfiilu Naajaat, Tasiusaq, Upernavik Kujalleq, Aappilattoq, Innaarsuit, Kangersuatsiaq, Kullorsuaq, Nutaarmiut aamma Nuussuaq.

Uummannaq nunaqarfiilu Ikerasak, Niaqornat, Qaarsut, Ukkusissat Saattullu.

Ilulissat nunaqarfiilu Oqaatsut, Qeqertaq, Saqqaq Ilimanarlu.

inuiaqatigiit samfund

ATORFIIT Se alle jobs

Powered by Labrador CMS