Eqqartuussissuserisoqarfimmik mamianartuliortoqarnermik eqqugaasumik Nuna Advokatit suleqateqarput

Danmarkimi eqqartuussissuserisoqarfiit annersaasa ilaata Hortenip Nuna Advokatit 20 procentimik pigaat, eqqartuussissuserisoqarfiillu taakku marluk suleqatigiinnermikkut suliassaqarfinni aalajangersimasuni immikkut ittuni ilisimasaqarnermik Nuna Advokatit atuisinnaapput.

Hortenimi eqqartuussissuserisoq Nicolai Dyhr peqquserlunnerit ingasattut isiginngitsuusaarumallugit piumassuseqartoq TV2-mi aallakaatitassiami „Den sorte svane“-mi qulaarneqarpoq.

Qulaajaasoqareersorlu eqqartuussissuserisoq Hortenimi maanna soraarpoq, „isumaqatigiinnerup kingorna“ soraarniuteqarami. Eqqartuussissuserisuttaaq siunnersuisoqatigiivi suliamut akuliussimapput, eqqartuussissuserisullu ataatsimiititaliaannut suliaq ingerlateqqinneqarsinnaavoq, taakkualu eqqartuussissuserisoq akiligassissinnaavaat eqqartuussissuserisutulluunniit allagartaa arsaarinnissutigisinnaallugu. 

Eqqartuussissuserisoqarfimmulli suliaq ilungersunarpoq. Odense Kommuni Hortenimik atuisoq nassuiaatip suliarineqarnerani suleqatigiinneq unitsinniarlugu aalajangerpoq, tamatumalu kingorna ingerlaannartoqassanersoq imaluunniit eqqartuussissuserisunik allanik suleqateqassanerluni kommuni aalajangerumaarpoq.

Nuna Advokatit akerliliipput

Aammattaaq tusaamasaalluartumit Nuna Advokatimit, suliap qulaarneqarnerata kingorna Hortenimit nassuiaaffigineqartumit, suliaq tupaallaatigineqarpoq.

- Eqqartuussissuserisup Nicolai Dyhrip oqaaseqaatai taassumalu sulinerminut atatillugu periusai eqqartuussissuserisutut sulinermut naleqqutinngilluinnartut Nuna Advokatini piginneqataasut tamarmik akuersaarfiginngilluinnarpaat, Nuna Advokatimi eqqartuussissuserisoq piginneqataasorlu Peter Schriver, Nuna Advokatimi piginneqataasut tamaasa sinnerlugit, oqarpoq.

- Hortenimi aamma akuersaanngitsut tassunga atatillugu maluginiarparput, Hortenimi eqqartuussissuserisutut piginneqataasutullu sulinermut pissusilersuutigineqartut tulluanngimmata. Taamaattumillu sapaatip-akunneri arlallit siulianni pisup kingunerisaanik piaartumik Hortenip soraarsippaat, kingornalu iluminni misissuillutik aallartipput. Horten Danmarkimi eqqartuussissuserisutut suliffeqarfiit anginersaat ilagaat, suliaminnullu pikkorissutsimikkut kiisalu ileqqorissaartuunermikkut nalunnginneqarluartuullutik, Nuna Advokatit allapput. “Pissuserissumik, eqqortumik unneqqarissumillu siunnersuineq” Nunap pingaarnertut naleqartitaasa ilagigaat Nuna Advokatimi erseqqissarneqarpoq.

Nicolai Dyhr akiliisinnaajunnaarnermut inatsisinik immikkut ilisimasaqarpoq, paasissutissallu tamakkua saqqummiunneqarnerisa kingorna Nicolai Dyhr akiliisinnaajunnaartut 58-it pillugit sulianit peersinniarlugu Sø- og Handelsretten aalajangerpoq.

Eqqartuussissuserisoq suleqatigineqanngitsoq

Eqqartuussissuserisoq pineqartoq suleqatigineqarnikuunngitsoq Nuna Advokatimi piginneqatigiit Sermitsiap nittartagaanut ilisimatitsipput, apeqqutillu uku akissuteqarfigivaat:

Nuna Advokatit toqqaannartumik Nicolai Dyhr-imik suleqateqarnikuuppat? 

- Naami, suleqatiginikuunngisaannarparput. Hortenimik suleqatigiissutitta avataaniittunik suliassaqarfeqarpoq, Danmarkimi akiliisinnaajunnaarnermut attuumassutilinnik suliaqartarami. 

Kalaallit Nunaanni pissutsinut tunngasuni suliani Nicolai Dyhr suleqataanikuua?

- Ilisimasavut naapertorlugit Kalaallit Nunaanni pissutsinut tunngasunik Nicolai Dyhr suliaqarnikuunngisaannarpoq.

Nicolai Dyhr-ip atuuffeqarnera pillugu saqqummertoqareernerata kingorna Hortenimik suleqateqarnersi piginneqatigiillusi eqqartorpisiuk?

- Aap.

TV2-p paasinarsaareernerata kingorna Hortenimit nassuiaammik Nuna Advokatit piumasaqarpat? 

- Aap, Hortenimit nassuiaammik pissarsivugut.

Nuna Advokatit Hortenimik piginneqataajunnaarsitsisinnaappat? 

- Isumaqatigiissutitut allatulli atorunnaarsitsinermut aalajangersakkanik isumaqatigiissuteqarpugut.

Hortenip Nuna Advokatimik piginneqataajunnaarnissaa anguniarlugu Nuna Advokatit iliuuseqassappat?

- Naami.

Nuna Advokatit tusaamaneqarneranut suliaq ajoqutaasinnaasoq Nuna Advokatimi suleqataasut isumaqarpat?

- Suliaq ilungersunartorujussuuvoq, suliaqarfiup tamat pimooruttariaqagaat. Suleqatigiinneq eqqarsaatigalugu Nicolai Dyhrimut Nuna Advokatit attuumassuteqanngillat. Tamanna suleqatigiinnermut attuumassuteqanngitsutut isigaarput, Hortenillu qisuariarnera naammagisimaarlugu.

Eqqartuussissuserisut akornanni ajornartorsiutit pillugit aallakaatitassiami qulaarneqartunut tunngatillugu Nuna Advokatit oqaasissaqarpat?

- Suliassaqarfinni tamani ajornartorsiuteqartoqarpoq, kisianni eqqartuussissuserisuulluni aamma tatiginartutut sulinissaq ersarippoq, suliassaqarfitsinnilu kikkut tamarmik eqqortumik pissuserissumillu pissusilersortassasut naatsorsuutigisariaqarparput piumasarisariaqarlugulu, Nuna Advokatimi piginneqataasut naggataatigut taama oqarput.

Piginneqatigiit

Peter Schriverip saniatigut Nuna Advokatimi piginneqataapput:

• Helen Kibsgaard
• Charlotte Pedersen
• Kista Høegh Niclasen
• Thor Suhr

Nuna Advokatit Sermitsiamit saaffigineqareernerup kingorna nittartakkaminni tusagassiuutinut nalunaarummik saqqummiussipput, ilaatigut ima allassimasulimmik:

- Ulluinnarni sulinitsinnut siunnersuisarnitsinnullu Horten attuumassuteqanngillat suleriusitsinnullu attuumassuteqaratik. Nuna Advokatit aamma Horten suliffeqarfiit inatsisilerinermut tunngasunik suliaqartut immikkoorput, paasissutissanillu ingerlaavartunik paarlaasseqatigiittoqarneq ajorpoq. Nuna Advokatini sullitanut tatiginartumik ingerlatseriaatsit sukannersut ingerlanneqartarput, eqqartuussissuserisutullu ileqqorissaarnermut malittarisassat naapertorlugit   sulianut aalajangersimasunut Hortenimit suleqateqarnissaq sullitatta akuersissutigeqqaartarpaat. Taamaattumillu sullitavut akuersiteqqaartinnagit suliat Hortenimi immikkut ilisimasalinnut ingerlateqqinneqarneq ajorput.

Eqqartuussissuserisup peqataaffigisaa immikkoortoq isiginnaaruk

"Advokatsamfundimit eqqartuussissuserisut oqartussaanerannik nakkutilliisunit, eqqartuussissuserisut pineqartut piaartumik misissuiffigineqarmata Nuna Advokatit naammagisimaarpaat. Oqaaseqaatigineqartut eqqartuussissuserisutut sulinermi naleqqutinngillat, naatsorsuutigaarpullu Advokatsamfundip Advokatnævn-i ilanngutitissagaat. Taakku eqqartuussissuserisunut pineqaatissiillunilu eqqartuussissuserisut allagartaat arsaarinnissutigisinnaavaat"

Piviusulersaarut Danmarkimi uissuumminartumik saqqummiussivoq, inuiaqatigiinni appasinnerusumik qaffasinnerusumillu inissisimasut akornanni qanoq suleqatigiinnerannik aammalu millionilikkaanik pisortanut qanoq peqquserluttuliortarnerannik ersersitsigami.

Piviusulersaarusiami immikkoortoq taanna, Hortenimi eqqartuussissuserisumit Nicolai Dyhrimit peqataaffigineqartoq, marlunngornermi Danmarkimi nalunaaqutaq malillugu 20.00 takutinneqassaaq. Piviusulersaarut tamaat TV2 Playimi isiginnaarneqarsinnaavoq.