Eqqartuussivik: Rusland Ukrainemi inuit pisinnaatitaaffiinik unioqqutitsivoq

Rusland Ukrainep kangiani 2014-imi akerleriinnermut atatillugu kingornalu 2022-mi Ukrainemi sorsunnermut atatillugu inuit pisinnaatitaaffiinik aaqqissuussaasumik unioqqutitsisarpoq.

Rusland aammattaaq 2014-imi Malaysia Airlinesip timmisartuanik qaartitsinermut atatillugu inuit pisinnaatitaaffiinik unioqqutitsisimavoq.

Taama Europami Inuit Pisinnaatitaaffii pillugit Eqqartuussivik (EMD) pingasunngormat Strasbourgimi aalajangiivoq.

Matumani naalliutsitsinerit, inunnut naakkittaatsumik nikanarsaataasumilluunniit pinnittarnerit pinngitsaaliillunilu sulisitsinerit pineqarput.

Ukrainep Hollandillu Rusland eqqartuussivimmut suliassanngortissimavaat.

Unioqqutitsinerit 2014-imi maajip 11-annit 2022-mi septembarip 16-annut pisimapput.

Rusland ulluni taakkunani saassussinermik aallartitsillunilu Europami Inuit Pisinnaatitaaffii pillugit Isumaqatigiissummik atuutsitsiunnaarpoq.

Suliaq sisamanik immikkoortoqarpoq, eqqartuuviullu taakku ataatsimut suliarai.

Unnerluutiginnissutit immikkoortui siulliit marluk 2014-imeersuupput, Ukrainellu kangiani akerleriinnermut atatillugu inuit pisinnaatitaaffiinik aaqqissuussaasumik unioqqutitsinerit pillugit unnerluutiginnissutinut tunngassuteqarput.

Tassani Rusland Ruslandimik tapersersuisunik tapersersuisutut unnerluutigineqarpoq.

Matumani Ukrainep Ruslandi meeqqanik eqimattanik pingasunik aallarussisimasutut pisuutippaa. Ukrainep meeqqat taakkua Ruslandimut aallarunneqarallarsimanerinut Rusland unnerluuppaa.

Hollandip Rusland timmisartumik Malaysia Airlinesip timmisartuutaanik MH17 2014-imik raketti Buk-mik taaneqartartoq atorlugu qaartitsissimanerarlugu 2020-mi unnerluutigaa. Timmisartoq Amsterdamimiit Kuala Lumpurimut ingerlavoq. Taanna unnerluussutit pingajoraat.

Suliap immikkoortua kingulleq 2022-mi pivoq. Ukrainep Rusland taamanikkut 2022-mi februaarip 24-ani Ukrainemik tiguaanermi kingorna sakkutuulersornerminut atatillugu inuit pisinnaatitaaffiinik aaqqissuussamik unioqqutitsisimanerarlugu unnerluupppaa.

Ruslandimi naalagaaffik sinnerlugu eqqartuussinermi peqataasoqanngitsoq eqqartuussisup paasititsissutigaa.

Rusland Malaysia Airlinesimut tunngatillugu Europami Inuit Pisinnaatitaaffii pillugit Isumaqatigiissutip immikkoortuanik 38-mik unioqqutitsisimasoq eqqartuussivik isumaqarpoq, tassani Rusland suliap suliarineqarnerani ikiuunnissaminut pisussaaffilerneqarsimavoq.

Eqqartuussivik Malaysia Airlinesimut tunngatillugu taarsiissutissat qanoq amerlatiginissaat suli aalajangersinnaanagu nalunaarpoq. Taamaammat eqqartuussutip immikkoortua taanna eqqartuussutip immikkoortuinit pingasunit allanit immikkoortinneqarsimavoq.

Eqqartuussivik naapertorlugu Ruslandip 2022-mi septembarip 16-ia sioqqullugu nunap immikkoortuini tiguakkamini tigusarisimasani tamaasa piaartumik iperagaatissavai.

Aammattaaq Rusland nunat tamalaat akornanni oqartussaaffimmik attuumassuteqanngitsumik meeqqat piffissami tamatumani Ruslandimit aallarussaaqqasut kikkuunerannik paasiniaasinnaasumik pilersitsisoqarnissaanut suleqataassaaq.

Suleqatigiissitat aamma meeqqat ilaqutaasalu imaluunniit paaqqinnittuisa naggataatigut ataatsimuulerseqqinniarlugit attaveqarfigilernissaat isumagissavaa.

/ritzau/