Eqqartuussivik sioorasaarutaareersorlu:
–Nipangiunnavianngilakka
Kalaallit Nunaannut tunngasunut ministeriusimasup aningaasaqarnermut naalakkersuisoq Múte B. Egede, spiralilersuisimaneq pillugu inuiannik toqoraanertut taallugu oqaaseqarnikuunera, eqqartuussivimmut suliassanngortinnialersaarlugu danskit tusagassiorfiannut Politikenimut oqaatigaa.
Assi: Oscart Scott Carl
Kalaallit Nunaannut tunngasunut ministeriusimasup Tom Høyemip Múte B. Egede eqqartuussivimmut suliassanngortinniarlugu sioorasaarpaa. Spiralilersuisinermut suliaq pillugu oqallinnermi "inuiannik toqoraanertut" oqaaseqarnera eqqunngitsumik pasilliinertut aamma mamarliisutut eqqartuussivilersuunnissaa eqqarsaatersuutigaa.
Danskit aviisiat Politiken oktobarip aqqarngani taama allaaserisaqarpoq.
Tom Høyer Kalaallit Nunaannut tunngasunut 1982-imiit 1987-imut ministeriusimavoq. "Inuiannik toqoraanertut" pasilliineq ingattajaarnerummat folketingimi suleqatigisimasami illersornissaat pisussaaffigigamiuk taamaaliorusulluni oqartoq, Politiken allappoq.
Naalakkersuisut siulittaasorisimasaata maanna aningaasaqarnermut akileraartarnermullu naalakkersuisup Múte B. Egedep eqqartuussivimmut tunniunneqarniarnerminik sioorasaarneqarnini eqqissisimasumik tiguaa.
Oqaaserisimasani utertinnaviarnagit Facebookimi quppernermini allappoq:
- Spiralilersuisimaneq pillugu oqaatigisimasakka sioorasaarneqarnikkut utertinnaviarnagillu nipangiunnavianngilakka. Taamaaliuinnarsinnaasorineq qangarsuarli qaangiutereerpoq. Oqaatigisimasakka aamma inunnut ataasiakkaanut tunnganatik, danskit naalagaaffiannut tunngassuteqartuaannarnikuupput. Taamaammat qanorluunniit pisoqarnissaanut piareersimavunga, Múte B. Egede allappoq.
