Eqqartuussivimmi kokainimut tunngatillugu suliarujussuaq aallartilersoq
Angut 44-nik ukiulik ikiaroornartunik eqqussuisutut, kokainimik anngiortumik tuniniaasutut cannabisimillu naatitsisutut unnerluutigineqarpoq sakkortunerpaamillu pineqaatinneqarnissaa piumasarineqarluni.
Nuummi Eqqartuussisoqarfik Sermersuumi kokainimut tunngatillugu suliarujussuaq juulip naanerani aallartissaaq.
Assi: Morten Okkels
Eqqartuussisoqarfik Sermersuumi ikiaroornartulerinermut suliat annersaasa ilaattut isiginneqarsinnaasoq juulip 24-ani aallartissaaq.
Angutit marluk, 44-nik ukiulik aamma 37-nik ukiulik, Nuummi maanna pineqaatissinneqarsimasunut inissiisarfimmiittut, unnerluutigineqarput.
Unnerluussisussaatitaasut angutip 44-nik ukiullip ukiuni qulini pineqaatissinneqarsimasunut inissiisarfimmiittussanngortinneqarnissaa piumasaraat. Pineqaatissiissut taanna Kalaallit Nunaanni sakkortunerpaavoq.
Angut 44-nik ukiulik kokainimik eqqussuinermut Kalaallit Nunaannullu agguaanermut pingaarutilimmik peqataasimasoq, tamatumalu saniatigut Nuummi cannabisimik naatitsisarnermut peqataasimasoq unnerluussisussaatitaasoq isumaqarpoq.
Kangerlussuarmi tigusarineqartoq
44-nik ukiulik kokainimik siorna eqqussuinermik aaqqissuussisoq unnerluussisussaatitaasoq isumaqarpoq. Tamannalu arnamik angummillu, 2024-mi maajimi juunimilu Danmarkimut timmisartumik Kalaallit Nunaannut eqqussuisoqarneranut tunngassuteqarpoq. Marluullutik iluatsinngillat, tamarmimmi immikkut Kangerlussuarmi ilanngaaserisuniit 209 aamma 167,5 gram kokainimik anngiartumik eqqusseriaraluartutut tigusarineqaramik.
Angut 44-nik ukiulik aamma Kalaallit Nunaanni kokainimik 112 gramimik piginnittuusutut tunniussisutullu unnerluutigineqarpoq. Aamma Nuummi sumiiffimmi suli ilisimaneqanngitsumi cannabisinik naatitsisuusutut unnerluutigineqarpoq, tassani naasut 96-it naatitassallu nassaarineqarsimapput.
Pisuunnginnerarpoq
Angut 44-nik ukiulik pisuunnginnerartoq illersuisua Sermitsiamut oqarpoq.
Angut 37-nik ukiulik kokainimik 112 gramimik tigusisuusimasutut tigumminnittuusimasutullu unnerluutigineqarpoq. Unnerluussissut naapertorlugu ikiaroornartoq inunnut amerlanerusunut tuniniarneqartussatut siunniussaavoq. Taanna ukiuni sisamani pineqaatissinneqarsimasunut inissiisarfimmiittussassanngortinneqarnissaa unnerluussisunik piumasarineqarpoq.
Angutip 37-nik ukiullip tamanna qanoq isummerfigineraa suli paasinngilarput. Taanna tarnikkut nakuusersimasutut angutillu pineqartut marluk sioorasaarisimasutut aamma unnerluutigineqarput.
Ulluni tallimani eqqartuussisoqarnissaa pilersaarutaavoq, juulillu 30-ani naammassinissaa naatsorsuutigineqarpoq.
