Erfalasut siunissami sumi amuneqartassappat?

Misigissutsinik aalassatsitsisartut tassaapput inuiaassutsimut ilisarnaatit.

Erfalasorlu tassaalluni soorlumi Lars-Emil Johansenip oqaatiginikuusaatut ”Nunatta oqaluttuarisaanerani pisut pingaarnerpaat ilaat”.

Erfalasorput ukiunik 40-nngortorsiorlugu aappaagu nalliuttorsiutigineqassaaq; ukiuni qulikkuutaanni sisamani erfalasoq innuttaasunit nuannarineqarlunilu atorluarneqartarpoq. Folketingimut ilaasortap Nunatsinneersup oqaatigaa, takussaanerusariaqartoq. Aamma imaatigut angallannermi!

Issittumi Sakkutooqarfik Nunatsinni sinerissami angalagaangami Dannebrogimik erfalasulertarpoq. Aaja Chemnitzili (IA) isumaqarluni sakkutuut umiarsuaat Kalaallit Nunaata imartaaniikkaangata Dannebrogimik Erfalasorput-millu erfalasulertassappata eqqornerussasoq.

- Sooq tamanna isumassarsiatsialaava?

- Sakkutuut Naalagaaffeqatigiit ataqqiniarlugit kalaallit erfalasuannik erfalasoqartariaqarput, soorlumi ministeriunerup nammineq oqaatigisaatut naalagaaffeqatigiit tassaagamik nunat assigiinngitsut pingasut, assigiinngitsunik pingasunik oqaaseqarfiusut, assigiinngitsunik pingasunik kultureqartut, aamma aap assigiinngitsunik pingasunik erfalasoqartut.

- Issittumi Sakkutooqarfiup najuuffigisaanni tamani tamanna atuuttariaqarpoq, ilaatigut Kangerlussuarmi, Aaja Chemnitz akivoq.

Tamanna pillugu Danmarkimi illersornissamut ministeri Troels Lund Poulsen (V) saaffigisimavaa akissutisinissanilu utaqqillugu, akissutisinissaali aasaanerani sulinngiffeqarnerup kinguneranik kinguaattooqqalluni.

- Dannebrog sakkutuunit Kalaallit Nunaanniittunit atorneqarpallaartoq isumaqarpit?

- Isumaqarpunga inatsisit allanngortinneqartariaqartut, Kalaallit Nunaanniinnermi Dannebrog aamma Erfalasorput atisalersoriaatsimi aamma umiarsuit timmisartullu Kalaallit Nunaanniittut erfalasuini atorsinnaaniassammatigit, Aaja Chemnitz akivoq.

- Qanoq iliussavit?

- Issittoq pillugu illersornissaq pillugu ukiaru isumaqatiginninniarnermi tamanna sammissavara.

Sakkutuut ilinniarluarsimasut

Naleqqap siulittaasuata Pele Brobergip Aaja Chemnitzip Erfalasorput takussaanerulersinniarlugu siunnersuutaa isornartorsiorpaa. Maannami Issittumi Sakkutooqarfiup Nuummi qullersaqarfiata saavani Dannebrog aamma Savalimmiormiut erfalasuat peqatigalugit amuneqartarmat.

- Takoqqusaarluni politikernertut taarusuppara. Allaammi Danmarkimi sakkutuunik illaruaatiginninnertut taaneqarsinnaalluni, sakkutuummi qallunaajupput kalaaliunatik, Pele Broberg oqarpoq nangillunilu:

- Sakkutuut Danmarkimeersut sakkutuullu ilinniarluarsimasut ataqqilluinnarpakka. Tamannali pineqanngilaq. Taakkumi sakkutuut qallunaajupput, soorlu aamma Amerikamiut sakkutuui USA-meersuusut. Taava sooq tallimik qulaatigut erfalasutsinnik ilisarnaateqassappat, aperivoq.

Pele Brobergip periarfissaq atorluarlugu siunnersuutini, tassa Kalaallit Nunaanni sinerissamik nakkutilliisunik pilersitsinissaq saqqummiuteqqippaa.

- Soorlumi Island namminerisaminik sinerissami nakkutilliisoqartoq, oqarpoq.

- Sinerissamik nakkutilliisut kalaallit erfalasuannik erfalasoqassappat?

- Aap, soorunami. Aallaqqaammut suliassat aaqqinniarlugit Danmarkimi naalagaaffik suleqatigissavarput, taamaalippat kalaallit ilisarnaatissaannik ilisarnaateqarumaarpoq, taamaattumillu soorunami kalaallit erfalasuat atorlugu.

- Sinerissamik nakkutilliisut sakkutuujunngitsut qanoq aningaasalersorneqassappat?

- Inuit isumaqartuaannaramik aningaasanut attuumassuteqartoq, aviisiliortutulli piareersarluarnerusimasuuguit nalunngissagaluarpat arlaleriarlunga ima nassuiaasarsimasunga: Inatsisit naapertorlugit Danmarkimi naalagaaffiup akisussaaffiit Namminersorlutik Oqartussanut tunniuttarpai, Danmarkimi najoqqutassiat naapertorlugit ingerlanneqarsinnaaniassammata, Pele Broberg nassuiaavoq piffissami ikaarsaariarfiusumi aningaasartuutit naalagaaffimmit akilerneqartuartussaasut oqarluni.

Taassuma tikkuarpaa sinerissamik nakkutilliisussanik kalaallinik timmisartortartunik sakkutuunillu atorfeqarsinnaasoqartoq.

- Soorunami suli amerlanerusut ilinniartinneqarnissaat pisariaqartinneqarpoq, itisiliilluni oqarpoq.

Sinerissamik alapernaarsuisut Siriusikkut

Pele Brobergip ataatsimut isiginnilluni kaammattuutigaa, nunami politikkikkut siuttut IA-llu folketingimi ilaasortaatitaa namminiilivinnissaq pillugu aaqqissuussaanerusumik suliniuteqaleqqullugit, ajornannginnersiuilluni takoqqusaarnissaq pinnagu.

- Soorunami akuerineqarsinnaavoq isumaqartoqarpat takoqqusaarnissamut politikki naammattoq, kisianni qallunaat naalagaaffiannut ilaarusukkutta tamanna nassuerutigisariaqarparput. Isumaqarpunga naleqqussaalluni politikernerusoq, oqarpoq.

Erfalasumik atuisarneq kingullermik oqallisigineqarmat, sinerissamik nakkutilliisut Siriusikkut pineqarput. Danmarkimi naalakkersuisut qimussimik alapernaarsuisuni Dannebrogip atornerata saniatigut Erfalasorpumik atuinissaq 2020-mi isumassarsiaraat.

- Kalaallit suleqativut peqatigalugit isumannaallisaanerup isumannaatsuunerullu pingaartinneqarneranik erseqqissumik ersersitsinissatsinnut tunngavoq. Ataatsimoorluta akisussaaffeqarpugut, taamanikkut illersornissamut ministeriusoq Trine Bramsen DR Nyhederimut taama oqarpoq.

Siunnersuut tamanna Rasmus Jarlovip Konservativineersup isornartorsiorpaa, isumaqarami tamanna „naalakkersuisuniit iliuuserineqartoq eqqumiitsuusoq“.

- Kalaallit erfalasuat naalagaaffeqatigiit illersorneqarnissaannut attuumassuteqanngilaq, DR-imut oqarpoq. Tamatuma akerlianik taamanikkut nunanut allanut tunngasunut naalakkersuisup Ane Lone Baggerip (S) Trine Bramsenip oqaasii pillugit nersualaarpaa.

- Siriusimi nakkutilliisut erfalasorput atortalerpassuk, tamanna Siriusikkut aamma kalaallinut inuiaqatigiinnut ilaanerannik oqariartuutaassaaq. Inuusuttut Siriusikkunnut alapernaarsuisunut ilanngunnissaat qilanaaraara, tassani erfalasorput atorsinnaavaat, taanna Sermitsiamut taama oqarpoq.