KL

DK

INATSISARTUT

Erik Jensen (S): Siumumit pisinnaatitsissummik tunniussinngilagut

Inatsisartunut ilaasortaq Kuno Fencker (S) nammineq akilikkaminik USA-miippoq, Republikanerinut akuliulluni ilaatigut oqarluni: "Danmark Kalaallit Nunaata piginissaanut inatsisitigut tunngavissaqanngilaq."

Kunngeqarfimmik Danmarkimik isumaqatiginninniarnissanik siunnersuuteqartoq Republikaanerineerspq Andy Ogles Kuno Fenckerip nalunaaquttap akunnerata affaani oqaloqatiginerani nammineq isummani naapetorlugu namminiilivinnissaq pillugu Kalaallit Nunaata qanoq iliortariaqarnersoq oqaluttuaraa.
Jensine Berthelsen
TUSAGASSIORTOQ
Saqqummersinneqarpoq

Kalaallit partiivi USA-p Kalaallit Nunaannik aqutsilernissamik soqutiginnileruttorfiani partiit qalipaataat isummallu assigiinngissutaat akimorlugit ataatsimoorniarlutik nalunaaruteqaraluartut, Inatsisartunut ilaasortaq ataaseq “nammineq akiliilluni” Donald Trumpip USA-mi præsidentinngortinneqarnissaanut atatillugu USA-mut angalaniarluni aalajangersimavoq.

Kuno Fenckerip USA-mi inatsisartut aappaanni ilaasortap, Andy Oglesip (rep.), akunnerup affaani "oqaloqatiginerani" Kalaallit Nunaata namminiilivinnissaanik anguniagaqarnini inuit attaveqaqatigiittarfianni X-imi saqqummiunneqartumi oqaluttuaraa.

"Danmark Kalaallit Nunaannik nunasiaateqarnissamik inatsisitigut pisinnaatitaaffeqarsimanngisaannartoq“ ilaatigut tikkuarpaa, Kalaallit Nunaallu piaarnerpaamik naalagaaffinngortinneqarnissaa kissaatigalugu. Kalaallit Nunaanni uuliasiortoqarlunilu gas-imik qalluisoqarnissaa aamma kissaatigaa.

Kalaallit Nunaat naalagaaffiussasoq namminersortoq, USA-mulli Danmarkimulluunniit kiffaanngissuseqarluni suleqateqarsinnaasoq Kuno Fenckerip apersorneqarnermini erseqqissarpaa.

Andy Ogles kinaluunniiunngilaq

Politikeri Andy Ogles Trumpip Kalaallit Nunaata pisiarinissaanik pigilernissaanillu pilersaarutaanut tunngatillugu kinaluunniiunngilaq. Taannami "USA-p Kalaallit Nunaata pisiarinissaa qulakkeerniarlugu præsidentip Kunngeqarfik Danmark isumaqatiginninniarfigisinnaanngorlugu piginnaatinnissaanut" inatsisissatut siunnersuuteqarpoq.

Kalaallit Nunaata pisiarineqarnerata qanoq akeqassanersoq pisortatigoortumik toqqartumik tagginneqarnikuunngilaq, pisortatigoortuunngitsumilli Kalaallit Nunaata pisiarinissaanut Danmark 10,8 milliardit koruuninik akiliissasoq taassuma oqaatiginikuullugu.

Video Inatsisartunut ilaasortap Kuno Fenckerip (S) aamma Trumpimik tapersersuisup Jørgen Boassenip oqaloqatigiinnerat tamakkiisoq uani takujuk.

Jensen: Pisinnaatitsissummik tunniussinikuunngilagut

Kisianni sooruna Inatsisartuni ilaasortaq Kuno Fencker (S) aalajangersimasoq Repuplikanerit politikkikkut maskinaqarfianut toqqaannartumik orniguttoq?

Aamma erseqqissaagaluarluni "nammineq inuttut" USA-p Kalaallit Nunaannik “piginnilerumalluni aqutsiniarluni” soqutiginninnera annertooq pillugu Kalaallit Nunaanni naalakkersuisut partiillu ataatsimoorussamik oqariartuuteqarniarnera Kuno Fencker "nammineq inuttut" pissutsit maanna atuuttut eqqarsaatigalugit Republikanerit politikkikkut sulinerannut akuliuttoq?

Kuno Fenckerip "nammineq anguniagaqarnera" pillugu partiimit ilisimaneqarnersoq Siumup siulittaasua Erik Jensen Sermitsiap aperaa.

- Inatsisartuni ilaasortat ataasiakkaat USA-mi kongressimi ilaasortanik qinikkanillu allanik ataatsimeeqateqartoqarnissaanik pisinnaatitsissummik tunniussaqarnikuunngilagut, taamaattumik arlaannik oqaloqateqarnini nammineq akisussaaffigaa. USA-mukarnini ineqarnini nammineq akileraa aamma tusarpara.

Partiimimi ileqqorissaarnissamik malittarisassat eqqarsaatigalugit? Nunap soqutigisai eqqarsaatigalugit qanoq iliornissartik qinikkat ataasiakkaat namminneq aalajangiinnarsinnaavaat?

- Partiimi malittarisassat sukannersumik piumasaqaatigaagut, tamannalu qinikkat tamarmik malittussaavaat, partiimilu siulittaasutut partiimi malittarisassat pillugit sukannersumik ersarissumillu malittarisassagut malinneqassasut siulittaasutut nukippassuit atorpakka. Taamaattumik naamik, partii sinnerlugu qinikkat malittarisassat aalajangersimasut maleruartussaavaat, taakkulu partiip anguniagaanut aalajangersimasaanut naapertuuttariaqarput. Kisianni aamma inuit ataasiakkaat susinnaanerat susinnaannginnerallu pillugu naalakkersorsinnaanngilakka.

- Angerlareersimalerpat pisariaqarpat oqallisigiumaarparput.

inuiaqatigiit samfund

ATORFIIT Se alle jobs

Powered by Labrador CMS