KL

DK

Erik Jensen: Siumut anguniakkaminik qimatsinngilaq

Siumup siulittaasua, Erik Jensen maanna erseqqissaavoq Siumup sulinera ataatsimeersuarnermi aalajangiussat tunngavigalugit ingerlanneqartoq. - Naalagaaffinngornissamut apeqqut inuit ataasiakkaat namminneq imminnut piginnittunngortinniagassarinngilaat aamma tusaamasanngorniutissarinngilaat, inuiaqatigiinuna anersaavat aallaavigalugu suliaq ingerlanneqartoq. 

Partii Siumut ilumini inunnit ilaasortanit ataasiakkaanit sakkukinngitsumik uparuartorneqarpoq naalagaaffinngornissamut kinguarsaaginnalerneragaalluni. Maanna partiip siulittaasua akissuteqarpoq minnerpaamilluunniit pissutissaqanngitsoq taamak uparuartuinissaq: - Siumup ataatsimeersuarnerani anguniakkat akuersissutigeriarlugit uparuartuilerneq pissusissamisuunngilaq, Siumut inuttut ataasiakkaatut tusaamasanngorniarfissatut atuinnarsimagaanni aamma pissusissamisuunngilaq, Erik Jensen erseqqissaavoq. Asseq Siumup juli 2023-mi ataatsimeersuarneraneersuuvoq.
Jensine Berthelsen
tusagassiortoq
Saqqummersinneqarpoq

Qineqqusaarneq aallartinngitsorli partiimi Siumumi ilaasortat ataasiakkaat tamanut saqqumisumik naammagittaalliorput partii naalagaaffinngornissamik anguniagaqarunnaarsimanerarlugu.

Pingaartumik Siumut sinnerlugu Inatsisartuni ilaasortaq Kuno Fencker naammaginnigani tamat takusinnaasaanik ersersitsisarpoq, maannalu DR-imut partii alla sinnerlugu sassaannassanerluni imaluunniit politikkimit tunuassanerluni isumaliuteqalersimalluni oqarsimaneragaavoq.

Ippassaq marlunngornermi, qinersinissamik Naalakkersuisut siulittaasuat suaaruteqaqqammiinnartoq inuttaa Facebookimini allappoq sassassanerarluni.

Ullumikkulli DR malillu sassassanerluni sassassagunilu partii alla sinnissanerlugu allaallumi sassanngitsuuginnassanerluni nalornilersimanerarpoq.

Malisungaannarlugulu Siumut sinnerlugu folketingimi ilaasortaq Aki-Matilda Høegh-Dam assingusumik aamma DR aqqutigalugu ilimasaarivoq partii alla sinnerlugu Inatsisartunut sassarsinnaanissani periarfissaasoq.

Erik Jensen: Parteerput inuit ataasiakkaat tusaamasanngorniartarfiattut atugassaanngilaq

Siumup siulittaasuata, Erik Jensenip erseqqisaatigaa allakkatigut allatigulluunniit isumaliutinik taamaattunik apuussivigineqarsimanatik aamma siulersuisuunerit sassartussat kikkuussanersut inaarutaasumik aalajangersaasimanngitsut.

Partii ilaasortaminit avoqqaarineqarmat aammalu naalagaaffinngornissamut tunngatillugu sulissutiginnikkunnaarsimaneragaammat Erik Jensen aperaarput Siumut politikkiminik allanngortitsisimanersoq:

- Naamerluinnaq, ataatsimeersuarnermi aalajangersakkat malilluinnarlugit sulivugut, aamma naalagaaffinngornissamut tunngatillugu anguniakkavut soorunami pimooruppagut sulissutigalugillu. Kisianni eqqaamasassaavoq inuit ataasiakkaat suliaq taamak pingaaruteqartigisoq namminissarsiorlutik tusaamasanngorniutissarinngimmassuk, Erik Jensen erseqqissaavoq.

Naggataatigut tassunga ilaliullugu Erik Jensen erseqqissaavoq, suliaq inuiaqatigiit anersaavat pisinnaatitsissusiinerallu malillugu ingerlanneqartariaqartoq, inuup ataatsip, partiip ataatsip eqimattalluunniit ataatsit kisimiillutik imminnut saqqarmiulerniassutigisassarinngisaat:

- Inuiaqatigiit nalunngilaat Siumut tassunga qanoq politikkeqarnersoq, pinnaassutissaanngilaq aamma immeraassutissaanngilaq, Erik Jensen oqarpoq.

Sermitsiamit Kuno Fencker attaviginikuuarput uterfigissallutalu neriorsuinikuuvoq.

aki-matilda høegh-dam kuno fencker inuiaqatigiit inatsisartut valg 2025 erik jensen siumut

ATORFIIT Se alle jobs

Powered by Labrador CMS