Erngup nukinganik innaallagissiorfik tusarniaassutigineqartoq: Uuliamik annertuumik atuinermut taartaassaaq
Illoqarfiit Aasiaat Qasigiannguillu Kalaallit Nunaanni pisortat nukissiamik pilersuinerata tamarmiusup 20 procenteraat, erngullu nukinganik innaallagissiorfiup nutaap tamanna allanngortissavaa.
Assi una erngup nukinganik innaallagissiorfiup eqqaanik talittarfilimmik, isaariamik, heliportimik innaallagissallu aqqutaanik takusassiatut sanaajuvoq.
Visualisering: Niras Greenland
Ullumikkut Aasiannut Qasigiannguanullu nukissiamik pilersuinermi orsussaq imerpalasoq annertunertigut atugaavoq.
Illoqarfiit marluk taakku nunatsinni pisortat nukissiamik pilersuinerata tamarmiusup 20 procenteraat, siunissamili piffimmi erngup nukinganik innaallagissiorfik nutaat sanaartorneqarpat, tamanna allaanerulluni mingutsitsinnginnerulissaaq.
Tamanna atortussiani annertuuni Naalakkersuisut tusarniaassutigalugu nassiuteqqammigaanni atuarneqarsinnaavoq.
Matumani VVM-mik nalunaarusiamik taaneqartoq, suliniutip – sanaartornerup nalaani innaallagissiornerlu aallartippat - avatangiisinut sunniutaanik nassiuaassisussaq pineqarpoq.
Sanaartorneq ukiut sisamassaat avillugu ingerlanneqassasoq ilimagineqarpoq
Matumani sanaartornermik suliniut annertooq ukiut sisamaat avillugu sivisussuseqartussaq pineqarpoq.
Suliniummi innaallagissiorfik Kangersunermi, Qasigiannguanit kujammut kangimut 20 km missaannik ungasitsigisumiittumut inissinneqartussaq suliassaavoq.
Erngup nukinganit innaallagissiap illoqarfinnut anngunnissaanut, Qasigiannguit tungaanut 38 km-erisut isorartutigisumik, Aasiaallu tungaanut 117 km-erisut isorartutigisumik innaallaagissamut aqqussiortoqassaaq.
Tamatuma saniatigut aqqusinerit sulinermi atorneqartussat, illoqarfinni marlunni transformereqarfiit kiisalu putorsuit marluk imermik tatsimut innaallagissiorfiusumut tatsinit allanit imermik ilapittuisussat sananeqassapput.
Avatangiisinut sunniinikinneruneq
Naak suliniut annertugaluartoq, taamaattoq suliniummi sanaartornermi avatangiisinut sunniutit annikitsuinnaallutilluunniit isumaqanngitsuunissaat naliliutaavoq.
VVM-mik nassuiaat naapertorlugu avatangiisinut sunniutit annertunersaat innaallagissiorfiup atulernerani Kangersunermi pissapput, tamaanimi ullumikkumut sanilliullugu pinngortitap ingerlaarnerani ukiup nikinnerani erngup kuuttarnera, ukioq kaajallallugu erngup nalimmassakkamik kuutsinneqarneranik, ukiuunerani annertunerusussaminngaanniissaaq:
- Pinngortitamulli sunniutai ataatsimut isigalugu annikinnerusuussasut, nalunaarusiami allassimavoq.
Tamatuma saniatigut innaallagissiorfimmit Aasiannut innaallagiap aqqutai sineriak atuarlugu Naternap avataanata kitaatigoortussaanerat, nalunaarusiami erseqqissarneqarpoq.
Piffik nunatsinni nerlerit aasaanerani pingaarutilimmik najortagaattut nassuiarneqarpoq. Innaallagiap aqqutai nerlernut annikinnerusumik sunniuteqarsinnaanerat naliliutaavoq.
Tusarniaanermut atortussiat naapertorlugit sanaartortitsisoq Aasianni Qasigiannguanilu suliniut pillugu innuttaasunik ataatsimiititsissaaq, avatangiisinullu sunniutissat pillugit VVM-imik nalunaarusiaq tamarmiusoq Naalakkersuisut nittartakkakkut qupperneranni atuarneqarsinnaavoq.
