Ernisussiortoq Grønlandsbankenip aallarnisaasunut nersornaasiuttagaanik 2025-mi nersornaaserneqartoq
Tupârnak Bernth-Andersenip angajoqqaanngortussat naartunerminni skannertinnissaat neqerooruteqarfigai. Maannalu nersornaaserneqarluni.
Tupârnak Bernth-Andersen suliffeqarfiutini naartusunik skannerisarfik Scan Inuk pillugu nersornaaserneqarpoq.
Assi: Grønlandsbanken
Grønlandsbankenip inuussutissarsiornermut aningaasaateqarfiata aallarnisaasunut akissarsiaritittagaa ukiuni arlalinni inunnut suliffeqarfinnulluunniit immikkut iliuuseqarusussuseqartut, pimoorussisut maluginiarnartumillu siulliullutik iliuuseqartut aallarnisaasunut nersornaasiuttagaannik ukiuni arlertuni nersornaasiisarpoq.
Ukioq manna nersornaat Tupârnak Bernth-Andersenimut, Scan Inuk ApS-imik pilersitsisumut, tunniunneqarpoq.
Grønlandsbanken tusagassiuutinut nalunaarummi allappoq.
Scan Inuk ApS suliffeqarfiuvoq namminersortoq Kalaallit Nunaanni angajoqqaanngortussanut, pisortat peqqinnissaqarfianni neqeroorutigineqarsinnaasut saniatigut naartunerminni skannertinnissamik neqerooruteqartartoq.
Tupârnak Bernth-Andersenip ernisussiortuunermi saniatigut niuernermik ingerlatsinera Grønlandsbankenip inuussutissarsiornermut aningaasaateqarfiani siulittaasup Kristian Lennertip nersornaasiinermut tunngavilersuutigaa.
- Peqatigitillugu Kalaallit Nunaanni peqqissaanikkut neqerooruteqarneq kivitseqataaffigaat, Righospitalimit immikkut ilisimasallit DIH/Sana peqatigalugu atassusernerisigut, taamaasillutit scannerinerit angajoqqaanngortussanik nammineq oqaaserisat atorlugit ilitsersuinermik neqerooruteqarfigalugit, Kristian
Lennert tusagassiorfinnut nalunaarummi oqarpoq.
- Kalaallit Nunaanni aallartisaasunut allanut maligassaavutit, 2025-milu Inuussutissarsiornermut Aningaasaateqarfiup aallartisaasunut akissarsiaritittagaanik pitsaasumik suliniuteqarninnut kajumissaasernissat kissaatigaarput, nangippoq.
Nersornaat 25.000 koruuninik aningaasartaqarpoq.
