Ernisussiortut Kattuffiat toqusoqarsimaneranut tunngatillugu: – Pisoq ajornerpaaq
Arnat pingasut erninermut atatillugu toqukkut qimagummata nunarput aalassatsinneqarpoq. Toqunerat peqqinnissaqarfimmi isumalluutinik atuinerup nukittorsarneqartariaqarneranik takutitsisoq, Ernisussiortut Kattuffianni siulersuisut oqariartuutigaat.
- Pisut alianartut takutippaat isumalluutit atuuttut nukittorsarneqartariaqartut, Ernisussiortut Kattuffianni siulersuisut oqarput.
Arnat pingasut ernereernerup kingorna erninerminnilu qaammatit pingasut ingerlaneranni toqukkut qimagupput.
Ernisussiortut Kattuffianni siulersuisut qanigisaasunut peqqinnissaqarfimmilu sulisunut misiginneqatiginningaarnertik oqariartuutigaat:
- Pisut pisinnaasut ajornerpaartaat tassaavoq ilaqutariit amerliartornerat ajunaarutaasumik kinguneqaraangat. Taamaattumik tamanna pinngitsoortinniarlugu sapinngisarput tamaat iliuuseqartariaqartarpugut, Ernisussiortut Kattuffianni siulersuisut Sermitsiamut oqarput.
- Isumalluutit atorneqartut nukittorsarneqartariaqarput
Nunatsinni sumiiffiit ernisarfiusut nunatsinni oqallisaasarput, toqusoqarneranilu aamma oqallisaapput.
Ernisussiortut Kattuffiata oqariartuutigaa arnat ernisussat sumiluunniit najugaqaraluarunik toqqissisimasumik isumannaatsumillu erninissaat pingaaruteqartoq - erninnginnermi, erninermi ernereernermilu.
- Pisut alianartut takutippaat isumalluutit atuuttut nukittorsarneqartariaqartut, siulersuisut oqarput.
Ernisarfiit tallimat
Ernisussiortut Kattuffianni siulersuisut isumalluutit atuuttut suut nukittorsarneqartariaqarnersut suunersut taakkartornerlugit itinerusumik oqaatigerusunngilaat.
Ernisussiortut nammineerlutik ajornaatsumik ernisitsinissamik ilinniagaqarput, kiisalu naartunermi erninermilu ajoqutaasinnaasunik takunnissinnaanissamik aamma ilinniagaqarlutik.
- Ernisussiortutut ilinniagaraarput ajornaartumik ernisitsinissaq, kiisalu naartunerup erninerullu nalaani ajoqutaasinnaasunik takunnissinnaanissaq.
Peqqinnissaqarfik ullumikkut tallimanik sumiiffinnik ernisarfeqarput.
Nuummi Dronning Ingridip Napparsimavissuani ernisoqarsinnaavoq, aamma Tasiilami, Sisimiunim Ilulissani peqqinnissaqarfimmi ernisoqarsinnaavoq kiisalu piffissap ilaani Qaqortumi ernisoqarsinnaasarluni.
Maniitsumi Uummannamilu peqqissaavinni 2012-imi aamma 2017-imi ernisoqarsinnaajunnaarpoq, kingullermillu Aasianni peqqissaavik 2019-imi erniortarfiusinnaajunnaarpoq, erninissamut piareersimanermik pisariaqartunik attatiinnarneqarsinnaanngimmat.
