Ersarissumik oqariartuut: Kattunneqarnissaq pingaarnerpaatinneqassaaq
INI-p Illuutillu ataatsimeersuarneranni suliffeqarfiit taakku marluk kattunneqarnissaat pingaarnerpaatinneqaanissaa naatsorsuutigineqartoq, Naalakkersuisut ersarissumik oqaatigaat.
INI Illuummut kattunneqassaaq.
Assiliisoq: Leiff Josefsen
Ingerlatseqatigiiffiit marluk INI Illuullu kattunneqassasut, politikkikkut aalajangiunneqarpoq.
Sapaatip-akunnerata siuliani tallimanngornermi ingerlatseqatigiiffiit taakku marluk ataatsimeersuarput, kattunneqarnissallu suliarineqarnerata pingaarnerpaatinneqarnissaa erseqqissarniarlugu tassani Naalakkersuisut periarfissaq atorpaat:
- Tamassuma pingaarnerpaatinneqarnissa, kattussinissamullu tunngatillugu INI A/S-imit tapersiinerup maluginiarneqassaa Naalakkersuisut naatsorsuutigilluinnarpaat, ilaatigut attaveqaasersuutinut naalakkersuisoq Hans Peter Poulsen (S) INI-p ataatsimeersuarnerani oqarpoq.
Kattunnissamut periarfissaq siulersuisut akuersissutigigaat
Kattunnissamut periarfissat ingerlatseqatigiiffiup allaaserisimagai, siulersuisullu 2023-mi decembarimi ataatsimiinnerminni kattunnissamut periarfissaq akuersissutigigaat INI-p ukiumoortumik nalunaarusiaani atuarneqarsinnaavoq, tamannalu BDO-mit Nuna-Law-imillu oqaaseqarfigineqarpoq.
- Suliniut pillugu nalunaarusiaq ingerlatseqatigiiffimmik piginnittumut tunniunneqarpoq, Naalakkersuisullu kissaatigisaattut alloriarnerit tulliuttut utaqqivavut, INI ukiumoortumik naatsorsuutini allappoq.
Kattunnissaq sulissutigineqassasoq Naalakkersuisoq Hans Peter Poulsen ataatsimeersuarnermi oqarpoq, „ingerlatseqatigiiffillu nukittunerulersimasoq Namminersorlutillu Oqartussat Kalaallit Nunaanni inissiaataannik illuutaannillu aqutsinermik ineriartortitsinermillu suliassamik annertuumik pingaarutilimmik aaqqissuussineq kivitsisinnaasoq“ kattunnerup qulakkiissavaa.
Pimoorussisoqarnissaa naatsorsuutaasoq
- Ingerlatseqatigiiffiit suli pimoorussissasut, kattunnissarlu pillugu suleqatigiissasut Naalakkersuisut naatsorsuutigaat, naalakkersuisoq oqarpoq.
Akileraarutit ilanngaatigereerlugit INI A/S 818.000 koruuninik sinneqartoorsimasoq ataatsimeersuarnermi nalunaarutigineqarpoq, tamannalu 2022-mut sanilliullugu 421.000 koruuninik qaffariarneruvoq.
2023-mi akileraarutit ilanngaatigereerlugit 23,4 millionit koruuninik Illuut A/S sinneqartooruteqarpoq.
