KL

DK

Estlandimi sakkutuut kabelit arlallit kipineqarnerisa kingorna akuliupput

Umiarsuaq uuliamik assartuut „Eagle S“ Estlandip Finlandillu akornanni kabelinik arlalinnik ajoqusiisimasutut pasineqarpoq.

Finlandimi sinerissami alapernaarsuisut umiarsuarmut uuliamik assartuummut ”Eagle S”-imut sisamanngormat apuupput, kingornalu Finlandimi politiit ilagalugit umiarsuarmut ikipput. Umiarsuaq Østersømi kabelinik arlalinnik ajoqusiisimasutut pasineqarpoq.
Ritzaus Bureau
Saqqummersinneqarpoq

Estlandimi sakkutuut Østersømi immap naqqatigut kabelimik Estlink 1-imik illersuiniarlutik tallimanngornermi aallartipput.

Reuters naapertorlugu nunap nunanut allanut ministeria Margus Tsahkna taama oqarpoq.

Piffissami kingullermi Østersømi kabeli arlallit ajoqusersimanerat pissutaavoq.

- Nunatsinni immap naqqatigut attaveqaatit pingaarutillit ulorianartorsiortinneqarpata akiuisoqassaaq, nunanut allanut ministeri inuit nittartakkatigut naapittarfianni X-imi tallimanngornermi ullaap tungaani allappoq.

Kabeli Estlink 2 pingasunngornermi decembarip 25-ani ajoquserpoq.

Kabeli Østersøkkut Estlandimut Finlandimullu ingerlavoq.

Kabelip ajoquserneri innaallagiaarunnermik kinguneqarput.

Sinerissami alapernaarsuisut umiarsuaq uuliamik assartuut tiguaraat

Estlink 2-p ajoquserneqarneranit nalunaaquttap-akunnialui qaangiuttut Østersømi attaveqaatit kabelii pingasut attaveeruttut pingasunngornermi unnukkut paasineqarpoq.

Estlink 2-tut Finlandip Estlandillu akornanni ingerlapput.

Finlandimi politiit Finlandimilu sinerissami alapernaarsuisut umiarsuarmut uuliamik assartuummut „Eagle S“-imut kabelinik ajoqusiisimasutut pasisamut sisamanngormat ikipput.

Sinerissami alapernaarsuisut umiarsuaq uuliamik assartuut tigusarisimallugu Finlandillu imartaanut ingerlateqqillugu kingusinnerusukkut nalunaarput.

Illersornissamut peqatigiiffiup Estlandi Finlandilu kabelinik kittorarsimasunik suliami tapersersorumaarai NATO-p generalsekretæria Mark Rutte sisamanngornermi neriorsuivoq.

- NATO-p suleqatini tapersersorpai, attaveqaatinullu pingaarutilinnut saassussinerit tamaasa assuarai.

- Estlandip Finlandillu misissuinerat malinnaaffigaarput, tapersersuinerunissamullu piareersimavugut, Mark Rutte X-imi allappoq.

Umiarsuaq russit sakkutuuisa isertortumik umiarsuaannut ilaasorineqartoq

“Eagle S” Cookip qeqertaani, New Zealandip Manerassuarmi namminersorluni oqartussaaffiani, nalunaarsorneqarsimavoq.

Umiarsuaq Ruslandimi umiarsualivimmit Sankt Petersborgimit decembarip 25-ata unnuaani aallarpoq. Umiarsuaq uuliamik assartuut tallimanngornermi ullaakkukt Helsinkip kitaata kujataani Finlandip kangerliumarnganiippoq.

Umiarsuaq „Eagle S“ Ruslandip umiarsuaanut isertortunut ilaasoq Finlandimi ilanngaaserisut ilimagaat.

Umiarsuit taakku tassaapput umiarsuit uuliamik assartuutit Ruslandip erfalasuanik erfalasoqanngitsut, taamaalillutik Rusland nunanit allanit pillagaasimagaluartoq uuliamik avammut tuniniaajuarsinnaalluni.

/ritzau/

inuiaqatigiit estlink 1 estland eagle s østersøen samfund margus tsahkna

ATORFIIT Se alle jobs

Powered by Labrador CMS