EU-kommissæri: Qimaguteqqikkallarunnanngilagut
Finlandimiup Jutta Urpilainenip ulluni makkunani Kalaallit Nunaanniippoq. Tikeraarnermini atuarfeqarfiit ilinniarfiillu pulaarpai aamma inuussutissarsiortut politikkerillu oqaloqatigalugit. Kalaallit Nunaata EU-llu imminnut suleqatigiilluarsinnaanerat qularinngilaa.
Nunani tamalaani suleqatigiinneq pillugu kommissæri Jutta Urpilainen Nuummut ataasinngornermi Ilulissanullu marlunngornermi tikippoq. Tikeraarnermini Hans Lyngep Atuarfiani 7.A-mi atuartut ilaatigut pulaarpai. Uani ilinniartitsisoq Nivi Lyberth (talerperleq) peqatigaa.
Leiff Josefsen
– Nuummi EU-p allaffiata ammarnissaa anguniagarisimavara. Aqqut manissuinnaasimanngilaq maannali maaniippugut, tamannalu nuanneqaaq, nunat tamalaat suleqatigiinnissaannut kommissæri Jutta Urpilainen Finlandimeersoq oqarpoq, taannalu ulluni makkunani Nuummiillunilu Ilulissaniippoq.
Kalaallit Nunaat nunani allaniittuni EU-mit aningaasaliiffigineqarsimanerpaavoq. Piffissami 2023-27-mi ilinniartitaanermut 1,7 milliardit koruunit aningaasaliissutigineqarput. Tamatuma saniatigut aalisarnermut isumaqatigiissutit ukiumut 100-200 millionit koruuninik naleqartoq, taavalu takornariartitsinermut, aatsitassarsiornermut nukissiuutinullu ataavartut suliniutinut 29-nut 168 millionit koruunit 2023-mi immikkoortinneqarput. Kiisalu Naalakkersuisut aatsitassanut piujuartitsiviusumik aningaasarsiorfissat pillugit periusissatigut peqatigiinnissaq pillugu EU-mut aamma isumaqatigiissuteqarput.
Isumaqatigiissuterpassuit taakkua kingunerisinnaavaat Kalaallit Nunaata aningaasaqarnerata pitsanngorsarneqarnissaa, suliffinnik amerlanerusunik pilersitsisoqarsinnaanera nunaqavissullu suliffeqarfiutaannut periarfissanik nutaanik pilersitsisoqarsinnaanera.
Hans Lyngep Atuarfianut pulaarneq
Jutta Urpilainenip inuussutissarsiortut ataasinngornermi ataatsimeeqatigai aamma naalagaaffinngornissamut nunanullu allanut naalakkersuisoq Vivian Motzfeldt atorfilittaalu nereqatigillugit.
Meeqqat atuarfiannut Hans Lyngemut Qinngutsinniittumut meeqqanut, inuusuttunut, ilinniartitaanermut, kultureqarnermut, timersornermut tlageeqarnermullu naalakkersuisoq Aqqaluaq B. Egede peqatigalugu marlunngornermi siulliullugu pulaarneqarpoq. Arctic Hub kingorna ilisaritinneqarluni tassanilu Jutta Urpilainenip EU-p Kalaallit Nunaatalu suleqatigiinnerat oqaluttuaraa.
Aningaasaliissutissat annikitsut mingutsitsinngitsumillu ineriartorneq
Jutta Urpilainen marlunngornermi ualikkut Ilulissanukarpoq, tassani Kangiata illorsua ilaatigut pulaassavaa. Nuummut pingasunngornermi uteqqissaaq, tassani inatsisilerituunngorniaq Naja-Theresia Høegh peqatigalugu illoqarfik inuusuttut isaannit takornariassallugu. Naggataatigut Inuk Hostelimi aningaasaliissutit annikitsut mingutsitsinngitsumillu ineriartortitsineq pillugit saqqummiisoqassaaq.
EU-p allaffeqarfia niuernermik septembarip naanerani isumasioqatigiisitsissaaq, tassani inuussutissarsiornermik suliaqartunik suleqateqarnerup nukittorsarneqarnissaa sammineqassaaq.
