Facebookimi quppernerit 10 millionit nittartakkakkut peqquserlunniat akiorniarlugit nunguterneqartut

Suliffeqarfissuup Facebookimik piginnitup, META-p, nittartakkakkut peqquserlunniat akiorniarlugit allaasuusaarluni Facebookimi quppernialiat 10 millioninit ikinnerunngitsut 2025-mi qaammatit siulliit arfinillit ingerlaneranni nunguterpai.

Amerikamiut nutaarsiassaqartitsiviat CNBC taama allappoq.

Meta quppernernik ullut tamaasa nunguterisarpoq, 10 millioninilli ikinnerunngitsut maannamut nungutereersimalerpai. 

Nutaarsiassaqartitsivimmi input.dk-mi aaqqissuisoq Torben Vognsen taama oqarpoq. 

- Allaasuusaarluni peqquserluttuliorfissamik qupperniliorsinnaanerup ajornanngippallaalersimanera ajornartorsiutaavoq. Quppernerit tamaattut nittartakkakkut attaveqatigiittarfinni soorlu Facebookimi Youtubemilu sakaluutaapput, taanna oqarpoq.

Nungutikkat Metamit oqarnerat naapertorlugu allaasuusaarluni qupperniliaapput silassorissuusiarluunniit atorlugu pilersitanik siammarteriffiusimapput. 

- Assersuutigalugu ikkussaq ataaseq aalajangersimasoq, memeusinnaavoq, tassa assiusinnaavoq allanngortiterneqaqattaarsimasoq immiussaaraasinnaalluniluunniit, siammarterneqakulaartarpoq – soorlu allaasuusaarluni nittartakkakkut attaveqatigiittarfimmi quppernilianit assigisaaniilluunniit, Metamit tusagassiorfinnut nalunaarummi allassimavoq.

Meme tassaavoq asseq allanngortiterneqaqattaarsimasoq ataatsimik arlalinnilluunniit oqaasertalik quiasuutissatut nittartakkakkut siammarterneqaqattaartussiaq.

Silassorissuusiaq allaasuusaarluni quppernilianik inunninngarnit ilisarinnillaqqinnerunera Metap allaasuusaarluni qupperniliarpassuarnik nunguterisinnaaneranut pissutaasoq, Torben Vognsen oqarpoq.

- Silassorissuusiartimmi allamik silassorissuusialerpaat, taamaammat taamaaliorsinnaapput, taanna oqarpoq. 

Inoqatinut attaveqaatit pisoqaanerit atorneqarunnaariartornerat Meta iliuuseqalertorneranut pissutaaqataagunavittoq, taassuma aamma oqaatigaa. 

- Inoqatinut attaveqaatinik pisoqaanernik suli atuisut taakkuninnga kigaatsumik atuisuujunnaariartuartuaartussaassallutillu qularnanngitsumik atuisuujunnaartussaassapput. Tamannalu soorlu Facebookimut Youtubemullu ajutoorujussuartitsisinnaavoq, Torben Vognsen oqarpoq. 

Tamanna Danmarkimi atuisut silassorissuusiaannarmik videoliaaqqanik Facebookimi quppernerminin siammarteriffiginikinnerusalernerannik kinguneqassagunarpoq. 

Siammartikkalli taamaattut amerlangaarmata, ajornartorsiut tamanna anigoruminaatsorujussuusoq, Torben Vognsen oqarpoq.

- Suulluanngitsut amerlangaarmata, ajornartorsiut tamanna qaangeruminaatsorujussoorpasippoq. Inoqatinummi attaveqaatit silassorissuusiamik sulianik siammarteriffioqaat, taanna oqarpoq. 

/ritzau/