Folketingimi ilaasortat Trumpip oqarnera isumaqatigiinngissutigigaat

Trumpip Nunarput pillugu juullip nalaani oqaasii Nunatsinniinnaanngitsoq aammali Danmarkimi uissuummissutigineqarput.

Venstret Folketingimi inatsisinut akileraartarnermullu oqaaseqartartua Preben Bang Henriksen tusagassiorfimmut Nordjyskemut decembarip naalernerani allappoq, USA-p Kalaallit Nunaannik nakkutiginnikkusunneranik piginnikkusunneranillu Trumpip oqaasii qallunaat kalaallillu politikeriisa kamaatigimmassuk paasiuminaatsinnerarlugu:

- Naluneqanngitsutut kalaallit politikeriisa naammaginninngilluinnarnertik ersersittuartarpaat, naak Danmark Kalaallit Nunaannut ukiut tamaasa 4 milliardit koruunit missaanniittunik ataatsimoortunik tapiissuteqartaraluartoq (innuttaasumut ataatsimut 72.000 koruunit, inuusuttut utoqqaallu ilanngullugit), „naalagaaffiup ingerlataasa“ soorlu politiit illersornissamullu tunngasut saniatigut.

- Folketingimi suleqatiginnikkusussuseqarneq malugineqarsinnaanngilaq, soorlumi aamma qujaniarnissaq eqqarsaatigineqartanngitsorluunniit, Henriksen Nordjyskemi allappoq.

Trumpip neqeroorutaa kalaallinut naammagittaalliortuaannartunut “aaqqiissutissaasinnaasoq”, nangilluni allappoq.

- Trumpip neqeroorutaa – kalaallinut qallunaanik naammaginninnginnerminnik ersersitsiuartunut iluaqutaalluarsinnaaqaaq, Preben Bang Henriksen allappoq.

Ajornannginaariniarpallaartoq

Taamali allattoqarnera “ajornannginaariniarpallaaqaaq”. Anders Kronborg, Folketingimi Kalaallit Nunaat pillugu ataatsimiititaliami Socialdemokratit sinnerlugit ilaasortaq taama isumaqarpoq.

Ekstra Bladet-imut oqarpoq, Preben Bang Henriksen Trumpip piumasaatut iliorniarpasittoq:

- Pissutsit taama ilungersunartigitillugit tamanna ajornannginaariniarneruallaaqaaq, tamannalu sumulluunniit naleqqutinngitsoq isumaqarpunga, Anders Kronborg Ekstra Bladet-imut oqarpoq.

Anders Kronborg nangilluni oqarpoq, isumaqarluni kalaallit Folketingimi ilaasortat qujasuitsutut oqaatigissallugit naapertuilluanngitsuusoq.

- Kalaallit suleqativut qujasuitsutut saqqummiunneqarnissaat isumaqarpunga naapertuilluanngitsuusoq. Aamma ilumoorsinnaanngilaq kalaallit seeqqummerlutik Danmark qutsavigissagaat. Naalagaaffeqatigiinnermi naligiilluta suleqatigiippugut, Anders Kronborg oqarpoq.

Trump: Piginnittuuneq nakkutiginninnerlu pingaaruteqarluinnarput

USA-mi præsidentinngortussaq Donald Trump Nunatta nakkutigineqarnera pigineqarneralu pillugit inoqatinut attaveqaqatigiittarfimmini Truth Social-imi decembarip 22-anni ima allappoq:

- USA-p isumannaatsuunissaa nunarsuarmilu kiffaanngissuseq eqqarsaatigalugit, Kalaallit Nunaata piginissaa nakkutiginissaalu pingaaruteqarluinnarput, Trump allappoq.

Trumpip erseqqissumik allassimanngilaa, Amerikamiut nakkutilliinerat aalajangiisuusoq, aamma USA-p Kalaallit Nunaat pisiariumagaa allassimanngilaq.

Ullut arlaqanngitsut qaangiuttut Trumpip juullimi inuulluaqqusinermini Nunarput eqqaaqqippaa:

- Soorluttaaq Kalaallit Nunaanni innuttaasunut pilluaqqusiniarpunga, tassami USA-p nunap isumannaatsuunissaanut tunngatillugu Kalaallit Nunaanni innuttaasut pisariaqartippai, USA-llu tamaaniinnissani kissaatigaa, peqataajumaarpugullu, Trump allappoq.

Naalakkersuisut siulittaasuata Múte B. Egedep (IA) qisuariaateqarluni erseqqissarpaa, Nunarput tuniniagaanngitsoq, suleqatigiissinnaannerli annertunerusoq ammaffigineqartoq. Danmarkimi ministeriuneqarfiup Naalakkersuisut siulittaasuata akissutaa innersuussutigaa, annerusumilli oqaaseqarfiginagu.

- Naalakkersuisut nipangersimanerat Mette Frederiksenip qisuariarneranit allaanerulluinnarpoq, taanna siullerpaamik Kalaallit Nunaata pisiarineqarsinnaanera eqqartormagu.

Danmarkimi naalakkersuisut Trumpip Nunatsinnik piserusunnerminik siullermik oqaaseqarneranut Mette Frederiksenip qisuariaataanit allaanerulluinnartumik nipaapput. Taamanimi eqqarsaat tamanna Mette Frederiksenip silaqarluanngitsuliornerunerarpaa, tamatumalu kinguneranik Donald Trumpip Danmarkimut pisortatigoortumik tikeraarnissaraluani taamaatiinnarpaa.