Folketingimi nakkutilliisut utoqqaat illuat isumakuluutigigaat
Tasiilami utoqqaat illuat najugaqartut ataasiakkaat pisariaqartitaannik, pingaartumik puigortunngorsimasut pisariaqartitaannik, naammassinninnissamik pisariaqartunik atortorissaaruteqanngimmat ernumanarpoq, Folketingip nakkutilliinerani tamanna oqaatigineqarpoq.
Utoqqaat illuanni najugaqartut toqqissisimanissaat atugarissaarnissaallu anguniarlugu ingerlatsinermi iliuuseqartoqartoq Kommuneqarfik Sermersuumi ingerlatsivik ilisimatitsivoq.
Assi: Leiff Josefsen
Folketingimi nakkutilliisut Tasiilami utoqqaat illuannut pulaarput.
Utoqqaat illuanni avatangiisit ernumanartut nakkutilliisutut nalunaarusiami allapput. Avatangiisit najugaqartut pisariaqartitaannut naleqqutinngillat — ingammik puigortunngorsimasut pisariaqartitaannut, naliliinermi allassimapput.
Nakkutilliisut pulaarneranni najugaqartut quliusut naapinneqarput, taakkunanngalu pingasut qisuariapiloortartut oqaatigineqarput.
Nakkutilliisut aamma ernummatigaat tikeraarnermi nalaani utoqqaat angerlarsimaffianni inissaqannginnera pissutigalugu utoqqaat arlallit illoqarfiup napparsimmaviani uninngatinneqarmata, aamma utoqqaat puigortorujussuit isumaginissaannut naammattumik piginnaasaqanngitsoqarnera.
Aamma nersualaarneqartut
Aammali nersualaarinnittoqarpoq. Sulisut utoqqaat najugaqartut "ulluinnaasa ajunngitsuunissaat
toqqissisimanarnissaallu tunniussinnaammassuk naak
tigussaasunik atortussanik amigaateqarluinnaraluarlutik" nakkutilliisut eqqaavaat.
Nakkutilliisut misissuinerisa aamma takutippaat sulisut najugaqartunit nuannarineqartut.
Nakkutilliineq § 71 naapertorlugu nakkutilliinermik taaneqartoq siorna septembarimi pivoq. Nakkutilliinermi utoqqaat illuini puigortunngorsimasut sammineqarput, tikeraarnermiillu nalunaarusiaq Kommuneqarfik Sermersuumi Isumaginninnermut Suliffeqarnermullu Ataatsimiititaliami sapaatip-akunnerani kingullermi suliarineqarpoq.
Kommunimi ingerlatsivik nakkutilliinermik politikkerinut nalunaarusiami allappoq ajornartorsiutit eqqaaneqartut ilisimallugit aaqqiissutissanillu suliniuteqartoqarsimasoq.
Utoqqaat illuat nutaaq piareersarneqarpoq
- Utoqqaat illuanni najugaqartut ingerlatsinermi
isumannaatsuunissaat atugarissaarnissaallu siunertaralugit Suliffeqarnermut Isumaginninnermullu
ingerlatsivimmit assigiinngitsutigut iliuuseqarfigineqarput. Pissaanermik atuinermi malittarisassat
pillugit sulisut ilinniartinneqarput.
Suliffeqarnermut
Isumaginninnermullu ingerlatsivik sulisunik ilinniartitsinissamik aamma
piginnaasatigut qaffassaanissamik ukioq manna aappaagulu pilersaaruteqarpoq.
Nutaamik
utoqqarnut illuliortoqarnissaa Kommunalbestyrelsimit akuersissutigineqareertoq ilanngullugu eqqaaneqarpoq. Suliarli suli ingerlalluni.
Kommuneqarfik Sermersuup Suliffeqarnermut Isumaginninnermullu
Ataatsimiititaliaata ilisimatitsissut tusaatissatut tiguaa.
