Folketingimi ombudsmandip pineqaatissinneqarsimasunut inissiisarfiit isertitsiviillu misissorai
Ombudsmandip Kalaallit Nunaannut nakkutilliiartorluni tikeraarnerminut atatillugu Nuummi pineqaatissinneqarsimasunut inissiisarfik isornartorsiorneqangaartoq ornitassaasa ilagaat.
Pineqaatissinneqarsimasunut inissiisarfik 2019-imi atulersoq ima ulikkaartigaaq Europami naalliutsitsinerup pinaveersaartinnissaa siunertaralugu ataatsimiititaliaanit isornartorsiorneqarluni.
Assi: Leiff Josefsen
Folketingimi ombudsmandi Kalaallit Nunaanni pissutsinik inunnik nammineersinnaajunnaarsitsiffiusimasut ilaatigut misissoriartorlugit tikissaaq.
Ombudsmandip nakkutilliisui Kalaallit Nunaanni pineqaatissinneqarsimasunut inissiisarfiit, politeeqarfiit kommunefogedillu arlallit aggustip naanerani septembarillu aallartinnerani aamma tikeraassavaat.
- Kalaallit Nunaannut tikeraartarpugut. Kalaallit Nunaanninnginnerput sivitsulaarpoq. Nuummi pissutsit aamma eqqartorneqarput, Folketingimi ombudsmandi Christian Britten Lundblad oqarpoq.
Nuummi pineqaatissinneqarsimasunut inissiisarfik Europami naalliutsitsinerup pinaveersaartinnissaa siunertaralugu ataatsimiititalianit isornartorsiorneqarsimasoq pillugu oqarpoq.
Pineqaatissinneqarsimasunut inissiisarfiup ulikkaaqqaanera pisinnaatitaaffiaasinnaasoq
Pineqaatissinneqarsimasunut inissiisarfik 2019-imi ammarneqarpoq, ukiulli arfinillit qaangiuttut ima ulikkaavissimatigaaq ataatsimiititaliamit isornartorsiorneqarluni.
Pineqaatissinneqarnikut piffissaligaanngitsumik inissiisarfimmiittussanngortinneqarnikkut sakkortuumik pinerluuteqarsimasut arlallit tassaniipput.
Inissiisarfik ulikkaaqqammat tigummigallagassanngorlugit inissitat pineqaatissinneqarsimasunik ineqateqartarnerat Europami naalliutsitsinerup pinaveersaartinnissaa siunertaralugu ataatsimiititaliamit ilaatigut nalunaarutigineqarpoq. Taamaaliorneq ajornartorsiutaasinnaavoq, taakkumi tunngaviusumik pisinnaatitaaffitik pilliutigisinnaasariaqarnerannik kinguneqarsinnaagami.
Nakkutilliisut tikeraarnermi tamanna "pinngitsooratik" nalunaarutigisussanngorsimavaat.
- Pissutsit misissoqqissaarneqartariaqarnerannik paasitinneqarutta soorunami taanna siunertaralugu tikeraassaagut. Taamaaliorpugullumi, Ombudsmandi oqarpoq.
Erseqqissarpaali Nuummiinnaanngitsoq, aammali Tunumi Kitaanilu pineqaatissinneqarsimasunut inissiisarfiit nakkutilliisunit aamma alakkarneqassasut. Katillugit aqqanillit tikeraarneqassallutik.
/ritzau/
