Folketingimi sinniisoq kannguttaatsuliorsimasutut eqqartuussaavoq
Folketingimut ilaasortap Aki-Matilda Høegh-Damip sulinngiffeqarnissaminik nalunaaruteqarnerata kinguninngua folketingimi sinniisuusoq siulleq Markus E. Olsen kannguttaatsuliorsimasutut Nunatta Eqqartuussisuuneqarfiani pisuutinneqarpoq.
Assi: Morten Okkels
Obs: Allaaserisaq Aki-Matilda Høegh-Damip oqaaseqarnera ilanngullugu nutartigaavoq.
Palasiusimasoq politikeriusimasorlu Markus E. Olsen Sisimiuni arnamut kannguttaatsuliorsimasutut sisamanngormat ualikkut eqqartuunneqarpoq.
Nunatta Eqqartuussisuuneqarfiani ulluni 14-ini pineqaatissinneqarsimasunut inissiisarfimmiittussanngortinneqarpoq, pinerluuteqaqqikkaluarpallu atuuttussanngortinneqassalluni. Taamaalilluni Eqqartuussisoqarfik Qeqqani 2025-mi februaarimi pineqaatisiissut Nunatta Eqqartuussisuuneqarfiani maanna atuutsiinnarneqartussanngorlugu aalajangiunneqarpoq.
Eqqartuussisut tamarmik isumaqatigiillutik eqqartuussisoqarfiup aalajangernera attatiinnarpaat.
Markus E. Olsen arnamik akiuussinnaanngissusilimmik kunissuisimasutut pineqaatissinneqarpoq. Sisimiuni 2024-mi marsip 17-iani nangikkiartoqarnernai tamanna pivoq.
Markus E. Olsen kannguttaatsuliorsimasutut unnerluutigineqarnerminut pisuussuteqannginnini aalajangiusimaannavippaa.
Arnap nassuiaataa tunngavigineqartoq
Pinerlineqartup nassuiaataa eqqartuussisut tutsuiginarnerusutut nalilerpaat. Taamaammat arnap taassuma nassuiaataa tunngavigalugu aalajangiisoqarpoq.
Eqqartuussisut isumaqarput arnaq tutsuiginartuusoq, taxartitsisullu nassuiaanera arnap oqaluttuarisaanut tapersiivoq. Markus E. Olsenip utoqqatsernera pinerlineqartup oqaasiisa ilumoornerannik tapersiisutut aamma isiginiarneqarpoq.
Markus E. Olsen ulluni 14-ini parnaarussaasussanngortinneqarnerata saniatigut 5000 koruuninik taarsiisussanngortinneqarpoq.
Sermitsiamit suliaq siusinnerusukkut allaaserinikuuarput, tassanili atermik saqqummiusseqqusaannginneq pissutigalugu Markus E. Olsenip aqqa eqqaanikuunatigu. Nunatta Eqqartuussisuuneqarfiani pineqaatissiinerup attatiinnarneqarnera pissutaalluni atermik saqqummiusseqqusinnginneq atorunnaarpoq.
Suliaq politikkikkut pingaaruteqarpoq, folketingimimi ilaasortap Aki-Matilda Høegh-Damip (N) Inatsisartut ukiakkut ataatsimiinneranni peqataajumalluni sulinngiffeqarusulluni nalunaarutigiqqammerpaa.
Markus E. Olsen 2022-mi folketingimut qinersinermi sinniisussatut siullertut taaguunneqarpoq, taamaattumillu Høegh-Damip Folketingimi sulinngiffeqarnerani sinniissutut sulinissamik neqeroorfigineqassalluni.
Taanna eqqartuussut pillugu Sermitsiamut oqaaseqarusunngilaq.
Høegh-Damip pisoq oqaaseqarfigaa
Sermitsiamit Aki-Matilda Høegh-Dam pisoq pillugu oqaaseqartikkumagatsigu ima akissuteqarpoq:
- Nalunngisattut taanna sinniisussatut akuersisimanersoq suli paasineqanngilaq, akuersisimassappalli tupaallannassaaq. Taamaattumik maanna oqaaseqarfigissanngilara.
- Oqaaseqartitserusukkuit pineqartup partiianut Siumumut saaffiginninnissat innersuussutigaara. Sinniisussattut inissittussaq kisiat pillugu oqaaseqarsinnaavunga.
- Taamaakkaluartoq eqqartuussiviit aalajangiineri pineqartullu tamarmik inatsisitigut isumannaatsumik pineqarnerat ataqqivara. Eqqartuussineq taanna tusagassiuutitigut paasisaqarfigaara, tamannalu uannut sammisaq eqqarsaatigalugu sakkortuumik kalluaavoq.
