Folketingimut ilaasortap EU-p akuunerunissaa kissaatigaa

Folketingimut ilaasortaq Aaja Chemnitz (IA) ulluni qaninnermi Bruxellesiliassaaq, tassanilu kommissionip siulittaasua Ursula von der Leyen suleqataalu ataatsimeeqatigissavai.

USA-p soqutiginninnerulernera ilaatigut Donald Trumpip ernerata Nuummut tikeraarnera kinguneqartoq pissutigalugu EU Kalaallit Nunaanni akuunerulertariaqartoq Aaja Chemnitz isumaqarpoq:

- Bruxellesimut angalanissarput qangalili pilersaarutaavoq, aammali pisariaqarluarluni, oqarpoq, nangipporlu:

- Ursula von der Leyenip suleqatai ataatsimeeqatigissavakka isumaqarpungalu von der Leyen nunatsinnut tikeraartariaqartoq EU Nuummi siorna allaffittaarpoq, EU-llu nunatsinni iliuuseqarnerunissaa pisariaqartipparput, Aaja Chemnitz oqarpoq.

EU-p Nuummi allaffeqarfittaarnerani Ursula von der Leyen Nuummut marsimi 2024-mi tikeraarpoq.

- USA-p Ruslandillu Kalaallit Nunaata aqunnissaanik soqutiginninnerat pissutigalugu isumannaallisaanermut politikkimut tunngasut oqallisiginissaat pissusissamisoorpoq. Piffissami matumani sammisat, soorlu nioqqutissat momsii, kalaallit biilersinnaanermut allagartaannik EU-mi atuutilersitsisinnaaneq EU-mullu tunngasunik allanik oqallisiginninnissaq tulluartoq IA-miit aamma isumaqarpugut, Aaja Chemnitz oqarpoq.

Ph.d.: Trumpip sioorasaarinera Kalaallit Nunaata EU-mut qaninnerulerneranik kinguneqarsinnaavoq

Præsidentinngortussap Donald Trumpip oqariartuuteqartareernerata kingorna EU-mut tunngasut Aaja Chemnitz kisimi eqqartunngilai.

Damien Degeorges, Kalaallit Nunaata Issittumi inissisimaffia pillugu Ph.d.-liornikoq siunnersortilu, tusagassiuutini Altinget Arktisimi isummersuutimini Donald Trumpip soqutiginninnerujussua Kalaallit Nunaata "EU-mut qaninnerulernissaanik“ kinguneqarsinnaasoq allappoq.

Finlandip Sverigellu Natomut ilaasortaanerup pisariaqarnerata paasinnilersimanerattut Trumpip oqariartuutigisartagai aallaavigalugit nuna EU-mut ilaasortaalluni toqqissisimanerussanersoq Kalaallit Nunaanni oqallisigineqartariaqartoq Damien Degeorges ilaatigut allappoq:

- Nunat avannarliit tamarmik NATO-mut EU-mullu ilaasortaappata, nunap immikkoortuani isumannaallisaanerup pitsaanerpaanissaa qulakkeerneqassaaq. Suliaq imaaliallaannarneqarsinnaanngilaq EU-mullu tunngatillugu apeqqut oqallisigineqarluaqqaartariaqarluni, ingammik Kalaallit Nunaanni.

Ilisimatusarfimmi isumasiuinerup nutaap takutippaa Kalaallit Nunaanni inuit isumaat allanngorsimasit. Tassa innuttaasut EU-mut isumalluarnerujartortut, amerlanerussuteqartullu EU-mut ilaasortaanissaq tapersersoraat.

Piffissami 2021-2027-mi Kalaallit Nunaat EU-mit 1,6 milliardit koruuninik piujuartitsisumik ineriartornermut, ilinniartitaanermut mingutsitsinngitsumillu ineriartornermut tapiissutinik pissarsissaaq.