Frederik frimærkemi 

Nunatta allakkerivia 1963-imiilli Danmarkimi kunngiusartunik saqqummersitsisalerpoq: Kunngit Frederiit Qulingiluaannit, Dronningit Margrethet Aappaannut aamma Kunngit Frederiit Qulingannut.

Kunngit Frederiit Qulingannut frimærkit siullersaat, kunngip maajip 26-anni 2025-mi 57-inik ukioqalerneranut atatillugu saqqummersinneqarpoq. Kunngip qaqortumaarluni assinga kigartuisartumit Martin Mörckimit suliaavoq assiliisartup Steen Brogaardip assilisaa najoqqutaralugu kigartorneqartoq. Kunngikkunnik saqqummersinneqartartut nutaamik naleqartillugit allanillu qalipaaserlugit saqqummerseqqinneqartuaannarput. nalilikkat qalipaatillu nutaat ilanngunneqartarput. Sapaatip akunnerani matumani frimærki sungaartoq 25,00 koruuninik naleqartoq saqqummerpoq, taannalu Nunatsinni allakkanik 20 gramit ataallugit oqimaassusilinnut timmisartukkut nassiussinermut akigitinneqarluni.

– Frimærkit kunngip assinganik assitallit ulluinnarni allakkatigut nassiussinerni atorneqartalernissaat pissusissamisoorpoq, innuttaasullu katersuisullu ukiorpassuarni frimærkinik taakkuninnga takusassallutik, frimærkinut pisortaq Allan Pertti Frandsen oqarpoq.

 Oqaatsit ataasiakkaat pillugit assortuunneq

Ukiuni makkunani oqaatsit ataasiakkaat pillugit allanngortoqarpoq, naalagaaffeqatigiinnermut taarsiullugu kunngeqarfik atorusunneqarnerulerluni.

Oqaaseq „naalagaaffeqatigiinneq“ oqaatsinut paatsoorneqarsinnaasunut ilaalerpoq, tassani naalagaaffik pingaartinneqarnerusutut nipeqarami ataatsimoorussaqarneq pineqarani. Tamatumunnga taarsiullugu, ingammik Danmarkimi politikerit akornanni amerliartuinnartunit "kunngeqarfik" atorusunneqarnerulerpoq, tassa Danmarkip, Savalimmiut Nunattalu akornanni immikkut ilusilerneqarnerannut atatillugu. 

Naleqqap siulittaasuata Pele Brobergip "naalagaaffeqatigiinneq" sakkortuunik oqaaseqarluni eqqunngitsumik taaguusiussaanerarpaa. 

Oqaaseq „kunngeqarfik“ oqaatsimit „naalagaaffeqatigiinnit“ tulluarnerua?

– Naamik, oqaatsit taakku marluk Nunatsinnut Kalaallinullu attuumassuteqanngillat. Danmarkip Nunarput 1953-imi Danmarkimut ilaalersippaa, taamanimiilli Naalagaaffiup Danmarkip tunngaviusumik inatsisai naapertorlugit iliortariaqalerpugut. Tassani Kalaallit Nunaat immikkut allassimanngilaq, aamma tunngaviusumik inatsit pillugu maani innuttaasunik taasisitsisoqarsimanngilaq, tassani § 1 naapertorlugu taanna Danmarkip naalagaaffianut ilaasunut tamanut atuuppoq, Pele Broberg Sermitsiamut oqarpoq.

– Kunngeqarfik Danmark pisortatigoortumik taaguutigineqarpoq. Pisortatigoortumik taaguutigineqartoq tassaavoq naalagaaffik Danmark. Imaluunniit Qallunaat naalagaaffiat. Kalaallit naalagaaffiat pineqarani, Savalimmiut naalagaaffiat pineqarani, kisiannili tassaalluni naalagaaffik Danmark. Oqaluttuarisaanermut aamma ilaavoq kunngeqarfik Danmark ukiuni 1000-ini pioreersoq, qinigaaffimmilu tulliuttumi Kalaallit Nunaata ilaajunnaarnerata kingorna kunngeqarfik sivisuumik piujumaarluni.

Kunngikkormiulli illoqarfimmut nunaqarfimmulluunniit tikeraaraangata, innuttaasut tamarmik malinnaaffigisarpaat?

– Kunngikkormiut tamatigut ataqqinnittumik pisassavakka, soorlumi inuit allat tamaasa ataqqinnittuliorfigineqartartut. Danmarkilli kunngiata aamma nunat allamiut kunngeqarfiisa assigiinngissutaat tassaavoq, nunat allamiut oqaluttuarisaanerminni »oqaluttuarisaanermik ataatsimoorussaqarneq«-mik oqaluttuamik kusassaaneq ajormata. „Naalagaaffeqatigiinneq“-mik imaluunniit „kunngeqarfik“-mik atuineq ataqqinngisaannassavakka, oqaatsini taakkunani marlunni Nunatta qanoq pineqarsimanera oqaatigineqanngimmat, Pele Broberg oqarpoq.