Gazami illorsuaq Israelimit qaartinneqartoq, amerlanerusullu saassunneqarnissaat pilersaarutaasoq
Illoqarfimmi Gazami illorsuit Israelimit saassunneqartassasut, sakkutuut Israelimeersut oqarput.
Gazami inissiaq isralimiit saassunneqareernerata kingorna pujuliorpoq. Inissiat portusuut arlallit, sakkutuut Hamasimeersut pigigaat, Israelimit paasineqarpoq.
Assi: Omar Al-Qattaa/AFP/Ritzau Scanpix
Israelikkut sakkutuuisa Gazami illorsuaq saassussimallugu tallimanngornermi nalunaarutigaat.
Nutaarsiassaqartitsivik AFP allappoq.
Illut arlallit, ingammik quleriit portusuut, sakkutuut Hamasimeersut pigisaattut Israelimit paasineqartut aamma saassunneqassasut sakkutuut saassussinissartik sioqqullugu nalunaarput.
Saassussineq Israelip illoqarfimmik Gazamik tiguaaniarluni pilersaarutaanut ilaavoq.
"Hamasip peqqarniisaarniartui illoqarfimmi Gazami sumiiffinni assigiinngitsuni, ingammik illorsuarni, suliaqartut paasineqatoq"
Israelip sakkutuui tallimanngormat nalunaarput.
- Sakkutuut illunut Gazami peqqarniisaarniarfinngortitaasimasunut ulluni tulliuttani saassussisassaaq: assiliiviit, alapernaarsuiffiit, isertorlutik aallaasersortartut sakkutuullu qamutaat, sakkutuut nalunaarutaanni allassimavoq.
Innuttaasut: Annilaarnaqaaq
Nalunaaruteqarnermiit akunnerup ataatsip missaa qaangiutinngitsoq illu portusooq qaartartumeerneqartoq sakkutuut nalunaarput.
Tallimanngornermi saassussinissaq sioqqullugu inuit sakkutuujunngitsut ajunaartut "ikinnerpaamiitsinniarlugit" iliuuseqartoqarsimasoq, sakkutuut oqarput.
Palæstinamiut annilaangasut, 45-nik ukiulik Gazap illoqarfiata kitaani inissiami quleriit tallimaanni aserorsimasumi najugaqartoq Ahmed Abu Wutfa oqarpoq.
- Israelip napasulianik inissiarsuarnillu qaartartumeerilerneranik nutaarsiassat annilaarnarput, AFP-mut oqarasuaatikkut oqarpoq.
- Kikkut tamarmik annilaangaqaat, naluaat sumukassanerlutik.
- Qitornakka annilaangaqaat, uangalu aamma annilaangavunga. Toqqissisimanartumukarfissaqanngilaq. Toqupallannissarput neriuutigiinnarparput, oqarpoq.
Israelikkut illoqarfimmi Gazami eqqaanilu tallimanngormat saassussineranni inuit 19-it toqutaasut, Gazami innuttaasunik illersuiniaqatigiit oqarput.
