Geisler tusaamasaaleriartortoq
Kalaaleq iggarissoq anguniagartooq.
Taatsiannguaq Geislerip tuttuusaq uullileruttoraa – soorunami Jyllandip avannaani aallaaniamit pisarineqartoq.
Jesper Hansen
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
24-nik ukiulik kalaallinit kingoqqisoq Taatsiannguaq Geisler Aalborgimi neriniartarfimmi Alimentumimi tassaagunarpoq maannakkorpiaq Kalaallit Nunaanni Michelinimit ullorissamik pissarsinissaminut qaninnerpaaq, Savalimmiuni neriniartarfiup Koksip Ilimanamilu suliniutip ullorissat marluk annaareeraallu ukiumoortumik Helsinkimi Michenilip ulloriaannik tunniussinermi.
Tunniussinermi Alimentum Taatsiannguaq Geislerip pisortatut tullersorfigisaa ullorissamik qorsummik taaneqartartumik tunineqarpoq, tassalu neriniartarfinnut akimasuunut nersorinninniutaasartoq mamasaakkanik nerisassiornermi immikkut piujuartitsinermik tunngaveqartunut.
Taatsiannguaq Geisler Nuummi inunngorpoq, arfinerli pingasunik ukioqarluni angajoqqaanilu Aalborgimut nuuttoq.
– Ilaquttatta amerlanersaat Aalborgip eqqaani najugaqarmata nuuppugut. Aalborgimi meeqqat atuarfianiillungalu ilinniarnertuunngorniarpunga. Pilersaarutigisimagaluarpara ingeniørinngornissara imaluunniit maskinmesteri. Tamannarpiaq peqqutigalugu svensknøglemik kakiortippunga.
Michelinip ulloriaa qorsuk
Michelinip ulloriaata qorsuusup neriniartarfiit salliullutik piujuartitsisut nittarsaattarpai. Nerisassanik eqqaaneq annikillisinniarneqarpat imaluunniit taamaallaat ukiup qanoq ilinera apeqqutaatillugu sumiiffimmi nerisassiassat atorneqarpata.
Alimentum qorsummik ullorialerneqarpoq pimoorullugu nerisassiassanik nutaaginnarnik atuinermigut nammineq naatillugillu uumasuutiminik, Hjørringip eqqaani neriniartarfiup naasorissaasoqarfianeersunik – ilaatigut uumasut piniagassat aalisakkallu Jyllandip avannaani pilersuisunit pisiat.
– Taavali igasunngorniatut ilinnialerpunga Blokhus Strandhotelimilu sungiusaammik sulilerlunga. Ilisimajuarsimavara iggarissuullunga, igaffimmili qaffasissumik pitsaassusilimmi sulineq allarluinnaavoq.
Ajornannginaarpara – soqutigalugulu.
Sungiusaammik sulereerluni pisortamut tullinngorpoq
– Ajoraluartumilli coronap nalaani ilinniarfiga annaavara – Alimentumimullu pillunga, siorna tassani ilinniarnera naammassillugu. Alimentum qaffasissupilussuarmik pitsaassuseqarpoq. Pisortalli Søren Birchip tatigaanga. Ilungersorlunga sulivunga anguniagaqaramami Alimentumilu pitsaanerpaangortinniarlugu suleqataallunga. Maannalu nutaamik kakiortippunga – Alimentumip ilisarnaataa svensknøglip sanianiippoq.
Taatsiannguaq Geislerip nassuerutigaa igasuunerup iluani anguniagartuujulluni.
Ajugaarusuttuuvoq.
– Søren Birchip ilaanni aperaanga naatsorsuutigisimaneriga taama angusaqarluartigisimanissara, angerparalu. Ingerlaqqikkusuppungami pitsaanerpaanngorniarlunga. Ilinniartuuninni unamminerpassuarni peqataasarpunga, Danmarkimilu igasunngorniat unammisinneqarneranni ilaatigut normu 2-nngorlunga.
– Unamminerit nuannareqaakka. Ajugaaniarlungalu peqataasarpunga.
Meeraalluni pimmatigineqartartoq
– Meeraallunga qinngasaarneqartarpunga. Nuummi Aalborgillu atuarfiani. Sooq taamaannersoq naluara, pimmatigissallungali ajornannginnerpaasimagunarpoq. Tamanna puiguikkiuppara. Uteriitsunngorpunga - sapinngitsungalu nunarsuarmut nittarsaakkusullugu, Taatsiannguaq Geisler oqarpoq.
– Igaffimmi sulinerup nukittuunngortippaanga imminullu upperilersillunga. Ilinniartuullunga suleqatima ilaat kalaaliunera pillugu quisaarniartarput. Tamatigut akuerinagit oqaatigisarpara. Alimentumimiinnerput asuliinngilaq, taamaattumik taamatut quisaarniutit tusaarusunngilakka. Inunnut pitsaanerpaanik piserusuttunut nerisassiortussaavugut – sulerinerullu nalaani asuleertoqartussaanngilaq.
– Tamanna aamma peqqutigalugu sulinerup nalaani Geislerimik taaneqartarpunga Taatsiannguamiungitsorlu. Taava suleqatikka oqarniaasaartut tusaasariaqanngilakka – suullu tamarmik ajornannginnerulerlutik.
Nerisassiassat namminneq pilersikkaat
Geisler pisortap tulliatut ulluinnarni pilersaarusiortaqaaq aqutsillunilu.
– Maani illumi tunngavigaarput tamatigut ukiup allanngortarnera malillugu nerisassiassat atortarnerat. Naatitat amerlanersaat Hjørrinngimi naasorissaasoqarfitsinni naatittarpavut tassani aamma puulukiuteqarlutalu kukkukuujuteqarluta. Taamaattumik nerisassiat tamatigut ukiup allanngortarneranut tulluarsagaapput – piffissarujussuarlu atortarparput nerisat sinnikuinik seernartulersuinermut toqqorsisarnermullu, taamaalilluta naatitanik nutaanik pissarsisinnaannginnerup nalaani toqqortaqarlutalu.
Taamaattumik maani Alimentumimi igaanik eqqaasoqarneq ajorpoq.
– Maannakkorpiaq arnaqquassaarnissallu tungaanut aspargesit naatitani pingaarnerpaapput. Sapaatillu akunnerata naanerani nalliuttorsiussaagut Danmarkimi jordbærit siulliit takkuppata.
Mamarineqarnerpaaq arfeq siataq
Taatsiannguaq Geisler nammineq mamarinerpaasaqanngilaq, eqqarsalaareerlunili oqarpoq:
– Ilumut. Arferup neqaa siataq uanitsunik siatanik maavaartunik ilallugu, naatsiialerlugu kajortumillu misileqqillugu, soorlu ataatama igaavisut.
– Kalaaliunerma ilagaa. Ilaquttakka pingaartupilussuupput. Angajoqqaakka qatanngutikkalu marluk nukarliunerit. Aanagalu puigunngisaannarpara taamani Nuummi kalaalimineerniarfimmi puisimik pilattoq nalissaqanngitsoq. Puiguikkiuppara – tamannalu igasuuninnut pingaaruteqarsimassaaq.
– Maani Alimentumimi nerisassiornitsinni Kalaallit Nunaat aallaavigisarparput. Nerisassiassarput pingaarnertut igaassaq qitiulluni. Soorlu aalisagaq siatsivimmi puuguttamiitillugu naatsiialerlugu aalartitaq.
– Nuummi meeraallunga aamma taakku nerisarpavut – niaqua pilerngunneqartuaannarpoq mamarnerpaajummat.
Taatsianngiaq Geisler igasutut anguniagartuutut ilisimaneqaleriartorpoq – aamma TV-mi ilisimaneqartutut. Sapaatit akunnerani qaangiuttumi naalagaa Helsinimiimmat ulloriaq qorsuk aaniarlugu pisortap tullia TV2-Newsimit apersorneqarpoq.
– Tamanna ajornartorsiutitaqanngilaq, nalunngilarami sapernanga – tamannalu avammut takutikkusuppara. Aappaagu Michelinip ulloriaanik ilumoortumik pissarsissaagut, Geisler oqarpoq.
