Greenland Airports Danmarkimit ikiorneqarluni isumannaallisaanermi misissuisinnaaqqilersoq

Greenland Airportsip Nuummi mittarfimmi nunanut allanut angalasut nakkutilliisunit misissuisoqarsinnaanera pillugu ajornartorsiut maanna aaqqiissutissarsivaa.

Danmarkimi mittarfinniit marlunneersut isumannaallisaanermik suliallit Nuummukartinneqartut, sisamanngornermilu nunanut allanut timmisartuussisoqaqqissinnaanngussasoq, timmisartortitseqatigiiffik ilisimatitsivoq.

Nunanut allanut angalasussanik misissuisartussat sulisut ilinniarteqqinneqarnerat, Angalanermik Aqutsisoqarfik naapertorlugu, piumasaqaatinik atuuttunik tamakkiisumik naammassineqarsimannginnera pissutaalluni misissuisarneq sisamanngornerup unnuaani atorunnaarsinneqarallaraluarpoq.

Maannalu aaqqiivigineqartoq Greenland Airports allappoq:

- Taassuma saniatigut ullut tulliuttut Nuummi Isumannaallisaavimmi sulisut piaartumik suliaminnik aallussinissaat piareersarneqassalluni., timmisartortitseqatigiiffik pisoq uissuumititsisoq pillugu ajuusaarluni allappoq:

- Nalunngilarput pingasunngornermi Nuummi Isumannaallisaaviup matuneqarnera timisartuutileqatigiinnut angalasunullu ajoqutaangaatsiartoq. Tamanna ajuusaarutigingaarparput, mittarfitsinnilu pitsaasumik misigisaqarnissaq sapinngisarput tamaat sulissutigalutigu.

Angalasut eqqugaasut timmisartortitseqatigiiffimmit angalanissaminnut atatillugu paasissutissinneqassapput.

Isumannaallisaavimmi nakkutilliinerup unitsinneqarnera pissutigalugu Air Greenlandip sisamanngornermi, tallimanngornermi arfininngornermilu nunanut allanut angallassinissaa allanngortinneqarumaartoq, timmisartortitseqatigiiffiup siusinnerusukkut nalunaarutigaa.

Isumannaallisaanikkut misissuinerit unitsinneqarnerat pissutigalugu timmisartoq United Airlinesimeersoq New Yorkimiit Nuummukaartoq marlunngormat utiinnarpoq.