KL

DK

NUNAGREEN

Greenland Airportsimi pisortaasimasoq pisortanngorpoq

Aviaaja Karlshøj Knudsen NunaGreen A/S-imi juunip aallaqqaataani 2024-mi pisortaaninngussaaq. Greenland Airportsimi suliniutinut pisortaasimavoq.

Aviaaja Karlshøj Knudsen, Greenland Airportsimi suliniutinut pisortaasimasoq, NunaGreenimi pisortaanertut atorfinitsinneqarpoq.
KASSAALUK KRISTENSEN
Digitalimik aaqqissuisoq
Saqqummersinneqarpoq

Aviaaja Karlshøj Knudsen pisortaanertut NunaGreenip atorfinitsippaa. Aviaaja Karlshøj Knudsen juunip aallaqqaataani atorfinissaaq, NunaGreen tusagassiuutinut nalunaarummi ilisimatitsivoq.

Taamaalilluni Hans-Ulrik Skifte, NunaGreenimi ukiumi ataatsimi pisortaasimasoq, februaarip qiteqqunnerani 2024-mi ingerlaannaq atuutilersumik pisortaanertut tunuartoq, taarserpaa.

- Attaveqaasersuutinut suliassat pingaaruteqartut Aviaajap aqutsinerani NunaGreenimi ukkatarineqassapput, ilanngullugit Utoqqarmiut Kangerluarsunnguanni erngup nukinganik innaallagissiorfiup allilerneqarnissaa aammalu Qeqertarsuup Tunuani nutaamik erngup nukinganik innaallagissiorfiliornissaq, NunaGreen allappoq.

Suliassat taakkua Kalaallit Nunaata siunissami nukissiamik pilersuineranut inuiaqatigiinnilu ineriartortitsinermut aalajangiisuulluinnartumik pingaaruteqalerput.

- Sanaartugassanut angisoorujussuarnut Aviaajap annertuumik ilisimasaqarnera aammalu inuiaqatigiinnut kalaallinut annertuumik paasisimasaqarnera, siulersuisut toqqaanerannut aalajangiisuulluinnartumik tunngavigineqarput, Line Frederiksen, NunaGreenimi siulersuisuni siulittaasoq, oqarpoq.

Mingutsitsinnginnissaq siunnerfiusoq

Mingutsitsinngitsumut allanngoriartortitsinerup ingerlannissaa, Kalaallit Nunaannilu nukissiamut periarfissaqarfiusut niuerutigineqarsinnaalersinnissaat, NunaGreenittaaq siunnerfigai.

- NunaGreenip siuariartorneranut suliassanullu annertuunut pilersaarutaasunut aqutsinissara qilanaaraara, taakkuuppummi inuiaqatigiinni pisariaqartinneqartunik attaveqaasersuutinik nukittorsaasussat Kalaallit Nunaannilu piujuartitsiviusumik ineriartortitsinermut tunngavissiisussat" oqarpoq Aviaaja Karlshøj Knudsen.

Aviaaja Karlshøj Knudsen aamma siulersuisuni sulinermi misilittagaqarluarpoq, INI A/S-imi siulersuisuni ukiorpassuarni siulittaasup tulliatut atorfeqarnikuugami.

aviaaja karlshøj knudsen inuiaqatigiit samfund nuuk nunagreen a/s

ATORFIIT Se alle jobs

Powered by Labrador CMS