Greenland Airportsimi pisortaasimasumik nakkutilliisoqarfik nutaamik pisortaqalerpoq
Kalaallit Nunaanni Sullivinnik Nakkutilliisoqarfimmi Inúnguak Abelsen pisortanngorpoq.
- Sanaatorfinniugaluarpat allaffinniugaluarpalluunniit isumannaatsumik peqqinnartumillu sulinermi atugassaqartitsinissannut qulakkeerinninnissara pingaartippara, atorfininnerminut atatillugu Inúnguak Abelsen oqarpoq.
Suliffeqarnermut Nakkutilliisoqarfik Kalaallit Nunaat
Sullivinnik Nakkutilliisoqarfik nutaamik pisortartaarpoq, tassaavorlu Inúnguak Abelsen maajip aallaqqaataani atorfinittoq.
Tusagassiuutinut nalunaarummi tamanna nakkutilliisoqarfimmit ilisimatitsissutigineqarpoq.
Inúnguak Abelsen Nuummeersuuvoq sanaartornermut ingeniøritut ilinniagaqarluni, Greenland Airportsimilu sanaartornermut pisortap tulliatut atorfimmeersuulluni.
Nakkutilliisoqarfiup pisortaata Karsten Refsgaardip pisortaq nutaaq tikilluaqqusinnaagamiuk nuannaarutigaa:
- Sullivinnik Nakkutilliisoqarfimmi pisortaasimasup Casper Kronowip Kalaallit Nunaanni sulinermi isumannaatsumik peqqinnartumillu atugassaqartitsinermik suliniuteqarluarneranik, sanaartornermik ingeniøritut ilinniagaqarsimanermigut ilaatigullu siunnersortitut suliaqarnermi misilittagaqarluarnermigut piginnaanini atorlugit ingerlatitseqqiilluassaaq, Karsten Refsgaard, Tilsynscenter Østimi pisortaq oqarpoq.
Sanaartorfiit allaffiillu ukkatarigai
Inúnguak Abelsen 37-nik ukioqarpoq, taannalu nulianilu pingasunik qitornaqarput.
Suliffittaassani pillugu ima oqarpoq:
- Sullivinnik Nakkutilliisoqarfimmi pisortatut atorfittaassanni Kalaallit Nunaanni suliffippassuarnut iluaqutaasumik suleqatigiissimasut iliuuserisimasaannik ingerlatitseqqinnissara qilanaaraara.
- Sanaatorfinniugaluarpat allaffinniugaluarpalluunniit isumannaatsumik peqqinnartumillu sulinermi atugassaqartitsinissannut qulakkeerinninnissara pingaartippara, Inúnguak Abelsen oqarpoq.
Sullivinnik Nakkutilliisoqarfik Kalaallit Nunaanni Danmarkimi naalagaaffiup akisussaaffiisa ilagaat.
