Grønlandsbanken nakkutilliisunit tallimanik peqquneqartoq

Aningaasaqarnermut Nakkutilliisoqarfik Grønlandsbankenimi juunimi misissuereerluni tallimanik peqqussuteqarpoq.

Aningaasanik peqquserluutinik malunnarunnaarsaaneq misissuiffigineqarpoq, aningaaseriviullu atuisuminik ilisimasaqarnerulertariaqartoq nakkutilliisoqarfik peqqusivoq.

Aningaaserivik "aningaasanik peqquserluttuliornermut malunnarunnaarsaanermi imaluunniit peqqarniisaarniarnermik aningaasaliinissamut atorneqarsinnaanerata ilimanassutaa akornanniittoq annertusorluunniit" nakkutilliisut naliliipput.

Aningaasanik amerlasuunik nuussisoqartarnera nakkutilliisut ilaatigut tunngavilersuutigaat:

- Aningaasanik ikisisarneq, aningaasanik peqquserluttuliornermut malunnarunnaarsaanermi peqqarniisaarnianullu aningaasaliisinnaanermik navianaateqarneq annertuvoq, nunamilu pissutsit immikkut ittut pissutigalugit periuseq illoqarfiit-nunaqarfiit-aningaaseriviup akornanni atortariaqarput, taakkualu aaqqissuussaanerat navianaateqarsinnaavoq.

Isornartorsiutigineqartut tallimat

Aningaasaqarnermut nakkutilliisoqarfiup ajornartorsiutit uku tallimat tikkuarpai:

• Aningaaseriviup sullitani pillugit ilisimasaqarluarnissaminik pisussaaffini naammaginartsumik naammassisimavaa.

• Aningaaseriviup sullitami siunertai pillugit naammattumik ilisimasaqarnissani naliliinissanilu qulakkeersimanngilai.

• Aningaaseriviup navianaatinik nalilersuinermut periaasia naammanngilaq, paasiuminarpallaarmat aamma paasissutissat pisariaqartut tamaasa atuisumut ataasiakkaanut attuumassuteqartut tamaasa ilanngunneq ajorlugit.

• Aammattaaq aningaaseriviup sullitami navianaataannik annertuunik naliliinermini sullitami navianaataannik ilisimanninnissaq pillugu malittarisassat sukannernerusut malinngilai.
  

• Kiisalu aningaaseriviup atuisunik uppernarsaatissaqanngitsunik kontoannik matusinerup naleqquttuuneranik sunniuteqarluartuuneranillu nakkutiginninnerulernissaa peqqussutigineqarpoq.

Aningaaserivimmi pisortaq: Tupaallannanngilaq

Aningaaserivimmi ajornartorsiutit pineqartut ilisimaneqareersut Grønlandsbankenimi pisortaq Martin Kviesgaard Sermitsiamut allakkatigut akissuteqarluni ilisimatitsivoq:

- Aningaasaqarnermut nakkutilliisoqarfiup aningaaserivinnut peqqusisarnera qaqutigoortuunngilaq. Uagutsinnut peqqutigineqartut tupaallannanngillat, taakkuupput aaqqiviginiarlugit iliuuseqarfigileriikkagut.

- Ingammik atuisut atugaat pillugit ilisimasaqarluarnissaq nalunaarsuiffiunerusariaqartoq, aamma immaqa inuuneq naallugu atuisuusimagaluaraanniluunniit. Illuatungaanilu misissuiffigineqartuni allani peqqusisoqannginnera soorunami nuannaarutigaarput, Martin Kviesgaard allappoq.

Maleruagassat malillugit iliuuseqarnissat taakkuupput atuisut aningaasaqarnertik pillugu, sungiusimasaminnit annerusumik, paasissutissiinerusariaqarnerat aningaaserivimmi pisortap nassuiaatigaa.

Aningaaseriviup atuisullu maleruagassat malinngippassuk, aningaaserivik akiligassinneqarsinnaavoq atuisullu kortianik kontoanillu atorunnaarsitsisoqarluni.

- Oqaatigeriikkattulli isumaqarpunga atuisut peqatigalugit inatsisinik maleruaanissaq qulakkeersinnaagipput, Martin Kviesgaard allappoq.