Grønlandsbanken ukiup affaani siullermi sinneqartoorutikinnerusoq – niuerninili annertusivaa
2025-mi ukiup affaani siullermi angusat suli akileraarusernagut ikinnerupput, aningaaserivimmiittuutitalli kiisalu soraarnerussutisiassaqarnermut immikkoortoq ineriartupiloorluni.
Grønlandsbanken Nuummi.
Assi: Leiff Josefsen
Grønlandsbanken ukiup affaani siullermi, akileraarutit suli ilanngaatiginagit, angusai 84,4 mio. koruuniupput, siorna piffissami matumani angusat 120,1 mio. koruuniusut. Erniat
appariartorneri pingaarnertut pissutaasut aningaaserivimmi pisortaq Martin Kviesgaard oqarpoq.
- Ukiup affaa siulleq anigorparput taarsigassarsiarititat ineriartornerat
annikinnerusoq pitsaasorli, tamannalu siumut naatsorsukkatsinnut naleqquppoq. Taarsiullugu
aningaaserivimmiittuutitat kiisalu soraarnerussutisiassaqarnermut immikkoortoq
annertuumik ineriartorput. Erniat apparnerat qullersani akeqarpoq, akerlianilli
sullitarpassuarnut aningaasaliisunut ass. Umiatsiamut, biilinut imaluunniit
illumut tamanna pitsaasuussaaq, pisortaq Martin Kviesgaard oqarpoq.
Aningaaseriviup ukiup affaani siullermi niuernera aamma annertuseriarpoq, maanna 16 mia. koruunit sinneqarluni. Aningaaserivimmiittuutitat kiisalu soraarnerussutisiassaqarnermut
immikkoortup ineriartornerannik tamanna pissuteqarpoq, taarsigassalli ineriartornerat annikinnerulluni.
Sulisut amerlanerusut ilinniartitaanerlu qitiusoq
Aningaaserivimmi sulisumik amerlaneranik atorfinititsisoqarlunilu, sulisut ilinniartinnissaat qitiutinneqartoq Grønlandsbanken tusagassiuutinut nalunaarummi ilisimatitsivoq.
- Isumaqatigiissutit iluarsinerannut atatillugu nalinginnaasumik
aningaasartuutit qaffariarput, sulilu aningaasaliiffigiuarsinnarparput sullitat
misigisaqarnerisa pitsaasuunissaat kiisalu netbankimi sullitanut aaqqiissutit
pilerinartut, aningaaseriviup pisortaa oqarpoq.
Aningaaseriviup pappialanik nalilinnik aamma nunat allat aningaasaannik uninngasuutai pitsaasumik tapersiipput.
Grønlandsbankenip sullitai aningaasaqarnikkut
pitsaasumik tunngaveqarput, taarsigassarsiarititanillu annaasat appasipput. Tamatuma
inerneraa taarsigassarsiarititanut aamma qularnaveeqqutinut nalikilliliinerit
appasissut, 2025-mi ukiup affaani siullermi 14,5 mio. koruuniusut, 2024-mi ukiup
affaani siullermi 11,3 mio. koruuninutsanilliullugit.
GrønlandsBANKEN-ip 2025-mi angusat siumut naatsorsorneqartut 150-185 mio. koruuniunissaat suli attappaa.
