Helle Lynge: Erinarsuut inuuninnik annaassivoq

Helle Lynge Aasianni inunngorpoq. Politikeri tusaamasaq Frederik Lynge, Kalaallit Nunaanni Folketingimut ilaasortat siulliit marluk ilaat, Helle Lyngep aataqqeerivaa.

Helle Lynge ukiuni 31-ni uinilu nunaannarmi Svendborgimit 7 kilometerinik ungasitsigisumi illumi nuannersumi najugaqarput. Ilaqutariit aamma marlunnik meerartaqarput, taakku ullumikkut inersimasuupput qangalilu allamut nuunnikuullutik. Pinngortitamiikkaanni nunarsuaq eqqartorneqartuaannarpoq. Nunarsuaq inip igalaaviisa silatinnguaniippoq, Helle Lyngellu guitarini tigullugu Jens Rosendalip erinarsuutaa una erinarsorlugulu nipilersormagu: Du kom med alt det der var dig, nuannerluinnarpoq, piffissarlu unittuusisinnaagaluarpoq. Helle Lynge erinagissuataarpoq, taamaammat oqaluffimmi suliani assigiinngitsuni nipilersornermilu aaqqissuussani atorneqarajunnera tupinnanngilaq.

Qaammatit sisamat siorna Aasianniittoq

Helle Lynge ukiuni 50-ini Aasianniinnikuunani sapaatip-akunnera ataasiinnaq Aasianneeqqammerpoq.

- Anaanagalu tassaniippugut. Artornaqaaq. Meeraanermi misigisarpassuit annertuut qaffakaapput, Helle Lyngep misigisalikkersaanini taama aallartippaa.

- Aasianniinninni unnuit ilai suut tamarmik annertuallaalertarput, inissiamilu attartorsimasanniiginnartarpunga.

- Arfineq-marluinnarnik ukioqarlunga Danmarkimut nuuppugut. Anaanaga ataatagalu qatanngutikkalu marluk Danmarkimut nuuttariaqalerpugut. Assersuutigalugu kalaallisuinnaq oqalussinnaavunga. Pinngortitamiinneq sungiusimasorujussuullugulu illunut assigiinngitsunut arpaqattaarneq sungiusimaqaara, immaqalu nunamut allarluinnarmut kulturimullu allarluinnarmut nuunnissamut angivallaarsimavunga. Meeraq Kalaallit Nunaanni kiffaanngissusilik sulerululerpoq.

- Qinngasaarneqartarpunga pimmatigineqarlungalu. Kalaallisullu oqaluttarunnaavippunga. 14-inik ukioqarlunga sapilerpunga. Inoorusukkunnaarpunga.

- Pilersaarusiorsimasara malillugu inuunera suli kipinagu tassanngaannaq erinarsuut takkuppoq. John Denverip erinarsuutaa. Timi kissakkiartuinnarpoq, ajornartorsiullu anigorpara, maannalu maani issiavugut, Helle Lyngep qungujulalluni inuunini erinarsornermik, unammilligassaqarnermik misigissutsinillu annertuunik ulikkaartoq oqaluttuaralugu nangippoq.

Taamaattumik Helle Lyngep erinarsuut taanna inuunermini annassutigisimavaa.

Country qallunaanillu nuannarineqarluartut

Helle Lyngep erinarsugai assigiinngitsorpassuupput. Klassisk country soorlu Honky Tonk Angels imaluunniit Dolly Partonip aamma Patsy Clinep erinarsuutaasa nuannarineqarluartut ilaat. Danskit nipilersugaat nuannarineqarluartut soorlu Du skønne Danmark erinarsuutigisartagaanni amerlasuuni ilaannaraat. Dansktoppenimi nuannarineqarluartut ilaannik aamma erinarsortarsimavoq, iluatsitsigaannilu Helle Lynge Danmarks Radiomi tusarnaarneqarsinnaavoq. Helle Lyngep kalaallisut erinarsuut ataaseq, Anaanannguara, akkaata Juansi Lyngep allagaa, immiusimavaa. Soorunami aamma niperujoorutit tussiutillu atortarpai.

- Kalaallisut pikkorippallaanngilanga, kalaallisullu erinarsorusunneq ajorpunga, imminullu paarisariaqarpunga, Helle Lynge qularnani oqarpoq.

CD-nik aamma saqqummersitsisimavoq.

Sosup ikiortaa

Helle Lynge utoqqaat illuanni ukiorpassuarni sulisimavoq. Piffissap ingerlanerani suna tamarmi ingasappallaalerpoq. Suliassaqartarsimaqaaq. Pitsanngorsagassaqartuaannarsimavoq. Piffissaqanngiffiujuaannarluni.

-Tassanngaannaq sapilerpunga. Napparsimallunga sulinngiffeqartariaqarpunga, tamatumalu kingorna paaqqutarinninnermi sulisimanngisaannarpunga, Helle Lyngep qimmiaraataasa inerujussuarmi pangaleqattaarnerini akuliuttaqattaarnerinilu nuannersumik oqaloqatigiinnerput nangippaa.

- Piffiit ilaanni qaqeqqereerlunga ilisinissamik aaqqissuisartunit saaffigineqarpunga. Uattut ittunik atorfissaqartitsillutik isumaqarput, ullumikkullu ilisinissamik aaqqissuisartuuvunga, Helle Lynge nangippoq.

-Naak eqqumiiginarsinnaagunaraluartoq toqumut isiginnittaaseqarluarpunga, tamannalu pillugu suliffinniiginnarsinnaavunga, naallu inuttut qanilliuminaatsorujussuugaluarlunga oqaluffimmi erinarsorsinnaalluarpunga, qujanartumillu amerlasuut tusaarusuttorujussuusarpaannga, Helle Lynge naggasiivoq.

Helle Lyngep erinarsuutaasa ilarpassui videoliaalu YouTubemi imaluunniit Helle Lyngep Facebookiani takuneqarsinnaapput.