Hotel Arcticip angusai 'naammaginanngillat'
Avannaata Kommunianut Hotel Arctic nunaminertamik qinnuteqarsimavoq, taamaalilluni suliffeqarfik Air Greenlandimit pigineqartoq akunnittarfimmik nutaamik sanaartornissamut periarfissaqalerpoq. Pilersaarut malillugu Ilulissani mittarfik nutaaq 2025-mi ammarneqarpat akunnittarfik piareerneqassaaq. Akunnittarfilli 2023-mi unammilligassaqarnikuuvoq, tamannalu angusanut sunniuteqarpoq.
Init arlallit Hotel Arcticip nutarsarnikuuai, ukiorlu manna inissiat qulit nutaat pigilissavai.
Assiliisoq: Hotel Arctic
Pingasunik ullorialinnik 160-inik initalimmik Hotel Arctic Ilulissani nutaamik akunnittarfiliorniarpoq, Air Greenlandip 2023-mut ukiumoortumik nalunaarusiaani tamanna atuarneqarsinnaavoq.
Ukiup matuma ingerlanerani Hotel Arctic A/S-ip suleqatigisaatalu World of Greenland A/S-ip kattunneqarnissaat pilersaarutaavoq. „Atuisut pitsaanerusumik kiffartuunnissaannut periarfissap qulakkeerneqarnissaa“ suliffeqarfiit taakkua marluk kattunnissaannut nassuiaatigineqarsimavoq. Ingerlatseqatigiiffiit taakkua marluk taaguutaat namminersortutut attatiinnarneqarnissaat pilersaarutaavoq.
Angusat naammaginanngitsut
- Ingerlatseqatigiiffik (Hotel Arctic A/S, aaqq.) 2023-mi naammaginartumik angusaqanngilaq, tamannalu pingaartumik kingusinaartumik inniminniinerit amerlasuut taamaatiinnarneqartarnerannik, kiisalu Nuup avataani ataatsimeersuarnerit killeqartorujussuunerannik pissuteqarpoq. Tamatuma saniatigut ininik annertuumik nutarsaasoqarnera pissutigalugu piffissap ilaani ininik inniminniisoqarsinnaasimanngilaq, tamannalu aningaasartuutinik qaffaallunilu inissanik annikillisitsisimavoq, ukiumoortumik nalunaarusiami allassimavoq.
Ilulissani akunnittarfik sisamanik ullorialik siorna ineeqqanik 24-nik nutarterivoq, illuaqqallu arfineq-marluk arsarnernut takunninnissamut tulluarsakkat Finlandimi igalaaminernit sisammillu sanaat sananeqarput.
- Ukiukkut arsarneqarnerani illuaqqat immikkut kajungernartarput, aammali aasakkut immikkuullarissumik misigisaqartitsisinnaapput, unnuisullu ornigassaminnut pissutissaqarnerulernissaannut iluaqutaapput, nassuiarneqarpoq.
Inissiat qulit nutaat
Hotel Arctic upernaaru inissianik qulinik ilaneqassaaq, taamaalilluni init 107-iulerlutillu siniffissat 220-ulissapput. Ataatsimeersuarnermi atortorissaarutit nutarterneqarnissaat aamma pilersaarutaavoq.
- 2024-mi upernaakkut neriniartarfik nutaaq ULU ammarneqassaaq, kiisalu akunnittarfiup quleriit siullianni cocktail-bari ammarneqassalluni. Neriniartarfik 30-t missaanniittunut inissaqassaaq, kalaallillu tunisassiaannik pitsaasunik nerisassiortoqartassaaq, ukiumoortumik nalunaarusiami allassimavoq.
World of Greenlandip isertitai appariarput
World of Greenlandip, nunatsinnut takornarianik kajungilersitsinissamik siunertaqarluni misigisassarsiortitsisartup, isertitai appariarput.
-2023-mi sinneqartoorutit 2022-mut sanilliullugit ikinnerupput, tamannalu Covid-19-ip atuunnerata kingunerisaanik angalasarnissamik immikkut ittumik pisariaqartitsisoqarsimannginneranik pissuteqarsinnaavoq. Akileraarutit ilanngaatigereerlugit sinneqartoorutit 0,2 mio. kr.-iupput, 2022-mi 0,9 mio. kr.-iusimasut, 2023-milu niuernermi atugassarititaasut eqqarsaatigalugit angusat naammaginartutut nalilerneqarput, ukiumoortumik nalunaarusiami allassimavoq.
Michelinimik neriniartarfik ingerlaannassaaq
Takornarissat ornigarluartagaat tassaapput World of Greenlandip unnuisarfii: Glacier Lodge Eqi, Ilimanaq Lodge aamma Igloo Lodge. Glacier Lodge Eqi ornigarneqarnerpaasoq ilisimatitsissutigineqarpoq, taamaattumillu siorna unnuisarfinnik qulingiluanik ilassuteqarneq aallartinneqarpoq, unnuisarfinnillu pioreersunik nutarterisoqarluni.
Savalimmiormiut neriniartarfiat Koks, Michelinimik ullorissanik marlunnik ulloriallip, Ilimanaq Lodgemi ammarneqarnera nunanit tamalaanit nuannarineqarluarpoq, Savalimmiormiullu suleqatiginerat 2024-mi ingerlateqqinneqassasoq ilisimatitsissutaavoq.
